پاتەر ۇرىلارى ۇستالدى
بۇل توپتىڭ جەتەكشىسى 45 جاستاعى ايەل ادام. ونىڭ “كومەكشىلەرى” بۇرىن سوتتالعان ەكى ەر ادام. ولار پاتەر توناۋمەن اينالىسقان، دەپ حابارلايدى Almaty-akshamy.kz Polisia.kz-كە سىلتەمە جاساپ.
«قازىرگى ۋاقىتتا قىلمىستىق ۇشتىكتە قالا اۋماعىندا جاسالعان بەس ۇرلىق ەپيزودى بار. كۇدىكتىلەردى اشكەرەلەۋگە ارنالعان ارنايى ءىس-شارا وتكەن كۇنى جۇرگىزىلدى. كەزەكتى ۇرلىق جاساعاننان كەيىن ولار بىردەن ۇستالدى. ۇرىلار مىنگەن Nexia كولىگى جەكە سەكتوردا بۇعاتتالدى. ۇستالعانداردان زاتتاي ايعاقتار: گيتارا، ناردا، بىرنەشە تەلەفون جانە باعالى زاتتار تابىلدى. سونىمەن قاتار، جاساندى شاش، ءاميان جانە كىلتتەر انىقتالدى، – دەدى الماتى قالالىق پوليسيا دەپارتامەنتى باستىعىنىڭ ورىنباسارى بەرىك ابىلبەكوۆ.
سپيكەردىڭ ايتۋىنشا، “كريمينالدىق ۇشتىكتىڭ” سوڭعى قىلمىسى "وجەت" شاعىناۋدانىندا جاسالعان. ولار بوتەن ۇيگە تەرەزەدەن كىرگەن.
«ولار ستاندارتتى تۇردە ارەكەت ەتتى، تۇرعىن ۇيگە كىرەر الدىندا ءۇي يەلەرىنىڭ بار-جوعىن تەكسەردى، سودان كەيىن عانا قۇلىپتى اشتى. ولار بارلىق قۇندى زاتتاردى: اقشانى، شاعىن قۇرال-جابدىقتاردى، ءتۇرلى زەرگەرلىك بۇيىمداردى الىپ شىقتى. ەكەۋى بىرەۋدىڭ ۇيىندە ۇرلىق جاساپ جاتقاندا، ءۇشىنشىسى كولىكتە كۇتكەن، بىلايشا ايتقاندا قاۋىپسىزدىكتى باقىلاپ تۇرعان. ايتپاقشى، كۇدىكتىلەر 45 جاستاعى ح. ەسىمدى ازاماتشا جانە 44 جاستاعى ك. ەسىمدى ازامات، بۇرىن وسىعان ۇقساس قىلمىستاردى جاساعانى ءۇشىن سوتتى بولعان، ال ءۇشىنشى قاتىسۋشى 35 جاستاعى ازامات، ءبىرىنشى رەت “قىلمىستىق جولعا” تۇسكەن. قازىرگى ۋاقىتتا پاتەر ۇرلىعىنا قاتىسۋشىلار ۋاقىتشا ۇستاۋ يزولياتورىنا قامالدى. سوتقا دەيىنگى تەرگەۋ امالدارى جۇرگىزىلىپ، ولاردىڭ باسقا دا قىلمىستىق ەپيزودتارعا قاتىسى بار-جوعى انىقتالۋدا»، – دەدى ب. ابىلبەكوۆ.