سولتۇستىك قازاقستان وبلىسى لوكداۋنعا جابىلۋى مۇمكىن

سوڭعى ەكى اپتادا وبلىستا كوروناۆيرۋستىڭ تارالۋى 1،5 ەسە وسكەن

سولتۇستىك قازاقستان وبلىسىنىڭ سانيتار دارىگەرلەرى وڭىردە كوروناۆيرۋستىڭ كۇشەيۋىن ۆاكسينالاۋ قارقىنىنىڭ تومەندىگى مەن دەلتا شتامىنىڭ تارالۋىمەن بايلانىستىرىپ وتىر، دەپ حابارلايدى Almaty-akshamy.kz

سقو باس سانيتارلىق دارىگەرىنىڭ ورىنباسارى ارمان كۇشباسوۆتىڭ ايتۋىنشا، كەيىنگى كەزدەرى وبلىس بويىنشا تەك 200-300 ادام ۆاكسينا سالدىرادى، بۇل ەپيداحۋالعا كەرى اسەر ەتە باستاعان.

ءبىراق قازاقستاننىڭ بارلىق وڭىرىندەگى جاعداي بىردەي ەمەس. مىسالى، تۇركىستان وبلىسىندا جانە شىمكەنتتە ۆاكسينالاۋ جوسپارى 30 قىركۇيەكتە ورىندالعان. بۇگىندە ەكى ءوڭىر دە «جاسىل» ايماقتا. ۆيرۋس تاراۋ قارقىنى ازايىپ، شەكتەۋ شارالارى جەڭىلدەگەن. 

ال سولتۇستىك قازاقستان وبلىسىندا، كەرىسىنشە، ۆاكسينالاۋ قارقىنى ازايىپ، اۋرۋ دەڭگەيى ءوسىپ جاتىر.  

«ەكى اپتادان بەرى سولتۇستىك قازاقستان وبلىسى «قىزىل» ايماقتا. ەگەر اۋرۋ دەڭگەيى ازايماسا، مەكەمەلەردىڭ جۇمىسىن توقتاتىپ، لوكداۋن جاريالاۋىمىزعا تۋرا كەلەدى. ارينە، بۇل ءماجبۇرلى شارا، سەبەبى ناۋقاستار سانىنىڭ كوبەيۋى مەديسينالىق مەكەمەلەرگە سالماق ءتۇسىرۋى مۇمكىن»،- دەيدى ارمان كۇشباسوۆ.