رەسپۋبليكا سارايىندا قازاقستان كارىستەر قاۋىمداستىعىنىڭ ۇيىمداستىرۋىمەن «سولنال-2023» جاڭا جىل مەرەكەسىنە ارنالعان مەرەكەلىك جيىن ءوتتى.
اتالمىش مەرەكە قىستىڭ ايازدى كۇندەرىنە ءدال كەلگەنىمەن، جىلىلىققا تولى. بۇل كۇندى تەك ءبىزدىڭ ەلىمىزدەگى عانا ەمەس، بۇكىل دۇنيە جۇزىندەگى كورەيلەر اسىعا كۇتەدى. ەڭكەيگەن كارىدەن ەڭبەكتەگەن بالاعا دەيىن بۇل كۇنى بىر-بىرىنە جىلى ءسوز ايتىپ، كەڭ پەيىلدىلىك تانىتادى. كوپتەن كورىسپەگەن جاندارداي بىر-بىرىمەن ساعىنىسىپ، ىستىق كوڭىلمەن قاۋىشىپ، مەرەكەنىڭ ماڭىزىن ءتىپتى ارتتىرا تۇسەدى. بۇل كۇنى ايتۋلى مەرەكەنى اتاپ وتۋگە ەرەسەكتەرمەن بىرگە بۇلدىرشىندەر دە كەلدى.
اي كۇنتىزبەسىنىڭ ءبىرىنشى كۇنىنە ءدال كەلگەن بۇل مەرەكە - كورەي حالقىنىڭ ءداستۇرلى مەيرامدارىنىڭ ءبىرى. جالپى، الماتىدا اتالمىش مەرەكە 1989 جىلدان بەرى اتاپ ءوتىلىپ كەلەدى.
العاشقى ءسوز كەزەگىن العان الماتى قالاسىنىڭ اكىمى ەربولات دوسايەۆ مەرەكەگە ارنايى كەلگەن قوناقتار مەن قالا تۇرعىندارىن ىستىق ىقىلاسپەن قۇتتىقتادى.
"سولنال – جاڭارۋدىڭ، تازالىقتىڭ جانە جاقسىلىققا دەگەن ءۇمىتتىڭ سيمۆولى. ول جاقسىلىقتىڭ، اقيقاتتىڭ جانە ادىلەتتىلىكتىڭ سالتانات قۇرۋىن بىلدىرەدى. مەرەكە ءبارىمىزدى يگى ىستەرگە، ىزگىلىككە، باۋىرمالدىلىققا شاقىرادى. شىعىس جاڭا جىلىنىڭ باستالۋى - ءار ادامنىڭ ومىرىندەگى وتە ماڭىزدى وقيعا. مەرەكە جاڭارۋ، جاسارۋمەن قاتار بارشامىزدى جاقسىلىققا ۇندەپ، دوستىق بايلانىستى نىعايتۋعا كومەكتەسەدى، جاقسىلىق پەن ءوزارا سىيلاستىققا ۇيرەتەدى"، - دەدى شاھار باسشىسى.
كەلەسى كەزەكتە قازاقستان كورەيلەر قاۋىمداستىعىنىڭ ءتوراعاسى يۋريي شين ءسوز الىپ، قازاقستاندا بارلىق ەتنوستارعا، سونىڭ ىشىندە كورەي مادەنيەتى مەن ادەبيەتىن دامىتۋ ءۇشىن بارلىق جاعدايلاردىڭ جاسالعانىن اتاپ ءوتتى.
قازاقستان كورەيلەر قاۋىمداستىعى ءتورالقاسىنىڭ مۇشەسى، «كورە يلبو» گازەتىنىڭ باس رەداكتورى كونستانتين كيم ءوز كەزەگىندە قازاقستاندىق كورەيلەر ءداستۇر بويىنشا تۋعان مادەنيەتى، ادەت-عۇرپى تۋرالى بىلىمدەرىن ۇرپاقتان-ۇرپاققا جەتكىزەتىنىن ايتتى.
بيىلعى جىلى مەرەكەدە 500-گە جۋىق جەكە ورىنداۋشىلار مەن شىعارماشىلىق ۇجىمدار ونەر كورسەتتى. ولاردىڭ قاتارىندا ق ر حالىق ءارتىسى روزا رىمبايەۆا، رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترىنىڭ ارتىستەرى، الماتى كورەي ۇلتتىق ورتالىعىنىڭ ۇجىمدارى جانە شاقىرىلعان ارتىستەر بار.
مەرەكەلىك كونسەرتكە ءداستۇرلى كورەيلىك حانبوك كوستيۋمىمەن كەلگەن ءاربىر ادامعا قازاقستان كورەيلەر قاۋىمداستىعىنان ەرەكشە سىيلىق تابىس ەتىلدى. رەسپۋبليكا سارايىنىڭ كەڭ زالىندا ءداستۇرلى كورەي جارمەڭكەسى ءوتىپ، وندا ۇلتتىق كادەسىيلار، كوسمەتيكا جانە كورەي ونىمدەرى ساتىلدى.