الماتى قالاسى پوليسيا دەپارتامەنتىنىڭ كيبەرقىلمىسپەن كۇرەس باسقارماسى سوڭعى ۋاقىتتا "1414' ابونەنتتىك نومىرىنەن جىبەرىلەتىن سمس-كودتاردى زاڭسىز پايدالانۋعا قاتىستى ينتەرنەت-الاياقتىق دەرەكتەرىنىڭ كوبەيۋىنە الاڭداۋشىلىق ءبىلدىردى.
ۆەدومستۆونىڭ مالىمەتىنشە، الاياقتار سمس-كودتاردى پسيحولوگيالىق ايلا-شارعى جاساۋ قۇرالى رەتىندە پايدالانادى. ادەتتە، جابىرلەنۋشىگە ءوزىن پوشتا، سالىق، كوممۋنالدىق قىزمەت نەمەسە قۇقىق قورعاۋ ورگانىنىڭ قىزمەتكەرى رەتىندە تانىستىرعان بوتەن ادام قوڭىراۋ شالادى، دەپ حابارلايدى aqshamnews.kz Polisia.kz-كە سىلتەمە جاساپ.
ولار جابىرلەنۋشىنى ءۇشىنشى تاراپ قوسىمشالارىن ورناتۋعا نەمەسە سىرتقى سىلتەمەلەردى باسۋعا ماجبۇرلەيدى. مۇنداي ارەكەتتەر جەكە دەرەكتەردىڭ، سونىڭ ىشىندە سمس-كودتىڭ قولدى بولۋىنا اكەلەدى. ناتيجەسىندە بۇل بانك شوتتارىن بۇزۋعا جانە قارجىلىق زالال كەلتىرۋگە سەبەپ بولۋى مۇمكىن. الايدا، ول "1414" نومىرىنەن كەلگەن سمس-كودتاردىڭ نەسيە الۋعا مۇمكىندىك بەرمەيتىنىن اتاپ ءوتتى. سەبەبى بانكتەر بيومەتريالىق اۋتەنتيفيكاسيا جۇيەسى مەن ارنايى قاۋىپسىزدىك شارالارىن قولدانادى.
دەگەنمەن الاياقتار بۇل كودتاردى جابىرلەنۋشىلەردىڭ سەنىمىن جاۋلاپ الۋ جانە پسيحولوگيالىق قىسىم كورسەتۋ قۇرالى رەتىندە پايدالانادى. مۇنداي الاياقتىق ارەكەتتەردىڭ نەگىزگى قۇرباندارى كوبىنەسە ەگدە جاستاعى ادامدار بولادى. ءبىرقاتار جاعدايلاردا الاياقتار ازاماتتاردى دەپوزيتتەردەن اقشالارىن شەشىپ الىپ، "ساقتاندىرۋ شوتىنا" سالۋعا كوندىرگەن.
سونىمەن قاتار، نەسيە الۋ ارەكەتى تۋرالى جالعان اقپارات تاراتىپ، ادامداردى مۇلكىن كەپىلگە قويۋعا نەمەسە ساتۋعا يتەرمەلەگەن جايتتار تىركەلگەن. كوپ جاعدايدا جابىرلەنۋشىلەر الاياقتاردىڭ كورسەتكەن شوتتارىنا ءوز ەرىكتەرىمەن اقشا اۋدارادى نەمەسە قاراجاتتى جەتكىزۋ قىزمەتىنىڭ كۋرەرلەرى ارقىلى بەرەدى. پوليسيا ازاماتتاردى اباي بولۋعا، كۇماندى قوڭىراۋلار مەن حابارلامالارعا جاۋاپ بەرمەۋگە شاقىرادى.