سكيفتەر ومىرىنەن ماعلۇمات بەرەتىن ەسكەرتكىشتەر زەرتتەلدى

وزبەكستاننىڭ سارميشساي مەملەكەتتىك مۋزەي-قورىعىنداعى شاتقالداردا 10 مىڭعا جۋىق پەتروگليف بار

«قازاقستانداعى تامعالى تاس پەتروگليفتەرى مەن وزبەكستانداعى سارميشساي قورىعىنداعى تاسقا قاشالعان جازبالار اراسىندا ۇقساستىق بار»، – دەيدى عالىمدار. تامعالىدا كۇن تەكتى ادامنىڭ بەينەسى كوپ كەزدەسسە، سارميشساي پەتروگليفتەرىندە بۇعى مەن جابايى وگىزدىڭ سۋرەتتەرى كوپ باسىلعان، دەپ حابارلايدى اlmaty-akshamy.kz

«بۇل تاستارعا سالىنعان بۇقالاردى جەرگىلىكتى جەردە كەزىكتىرمەيسىز. ءتىپتى ۇقسايتىندارى دا جوق. ەندى «بۇل بۇقالار قايدا كەتىپ قالدى؟» دەگەن ساۋال تۋىندايدى. بۇعان قاتىستى عالىمداردىڭ بىرنەشە پىكىرى بار. العاشقىسى – ەكولوگيانىڭ كۇرت وزگەرۋى. بۇقالار جەيتىن ازىق تابا الماي، قىرىلىپ قالۋى مۇمكىن. ال ەكىنشى پىكىر – بۇل تۇياقتىلار موڭعولياعا كەتىپ قالعان. ءقازىر سول ەلدە شىنىمەن دە ەرەكشە تۇقىمدى بۇقالاردى كورۋگە بولادى»، - دەيدى سارميشساي مەملەكەتتىك مۋزەي-قورىعىنىڭ ديرەكتورى رامازون ەگاموۆ.

وزبەكستاننىڭ ناۋاي وبلىسىندا ورنالاسقان سارميشساي مەملەكەتتىك مۋزەي-قورىعىنداعى شاتقالداردا 10 مىڭعا جۋىق پەتروگليف بار. كوبى قولا داۋىرىنە تيەسىلى بولعانىمەن، پالەوليتتەن باستاپ ساق كەزەڭىندە سالىنعان سۋرەتتەر دە كوپتەپ كەزدەسەدى.

«بۇل شاتقالداردى نورۆەگيا، قازاقستان، رەسەي ەلدەرىنىڭ عالىمدارى بىرنەشە مارتە كەلىپ زەرتتەگەن. تاستاعى پەتروگليفتەردەن ءتۇرلى كەزەڭدە ءومىر سۇرگەن ادامداردىڭ مادەنيەتىن كورۋگە بولادى. ماسەلەن، بيلەپ جاتقان ەكى ادامنىڭ سۋرەتتەرى بار. ياعني سول كەزدە تايپالاردىڭ ءوز مۋزىكاسى بولعاندىعىن، مادەنيەتتىڭ دامىعاندىعىن اڭعارتادى»، - سارميشساي مەملەكەتتىك مۋزەي-قورىعىنىڭ ديرەكتورى رامازون ەگاموۆ.

سكيفتەردىڭ دۇنيەتانىمىنان مول ماعلۇمات بەرەتىن ەسكەرتكىشتىڭ اشىلماعان قۇپياسى ءالى كوپ. بۇگىندە ول مەملەكەت قورعاۋىنا الىنعان.