بۇگىندە ءىرى مۇناي كومپانياسىنىڭ ينجەنەرى
ماقپال ەسىمدى قازاق قىزى قىرعىزستاندا، شاعىن قالاشىقتا تۋعان. وتباسىنىڭ كەدەي تۇرعانىن ايتادى. ءتىپتى، كەيدە مايعا پياز قۋىرىپ، ونى نانمەن جەگەن كۇندەرى دە بولعانىن جاسىرمايدى. ال بۇگىندە اقش-تىڭ ءىرى ConocoPhillips مۇناي كومپانياسىنىڭ ينجەنەرى بولىپ ەڭبەك ەتىپ ءجۇر.
سەگىز جاسىنان باستاپ اتا-اناسىنا، شارۋاشىلىقا كومەكتەسە باستايدى. بۇل وتباسى جيعان-تەرگەن اقشاسىنا ەكى سيىر ساتىپ الىپ، كىشكەنتاي ماقپال دا سيىر ساۋۋدى ۇيرەنىپ، ءتىپتى، اجەسىمەن بىرگە سۇزبە دە دايىندايدى. كەيىنىرەك بازارعا اتا-اناسىنا ىلەسىپ كەلىپ، ساۋدا جاساۋعا كومەكتەسە باستايدى.
ماقپال بۇعاناسى بەكىمەي جاتىپ، ءۇيدىڭ قىرۋار شارۋاسىن اتقارا ءجۇرىپ، الدىنا «مەكتەپتى اياقتاپ، جوعارى وقۋ ورنىنا ءتۇسۋىم كەرەك، قالايدا ءبىرىنشى بولامىن» دەگەن ماقسات قويادى. اعىلشىن تىلىنە دە سول بالا شاعىنان قىزىعا باستاعان. ءسويتىپ، كىتاپ ساتىپ الۋعا ءوز بەتىنشە اقشا جيناي باستايدى. شىنى بوتەلكەلەر جيناپ، ودان تۇسكەن بولماشى تيىندارىن اسقان توزىمدىلىكپەن جيناي بەرگەن. كىتاپتىڭ قۇنى 200 سوم بولاتىن. اقىرى سول قاراجاتتى جيناپ، ارمانىنداعى ءتىل ۇيرەتەتىن كىتابىن ساتىپ الادى.
ونىڭ وتباسىندا قازاقستانعا – اتامەكەنگە كوشۋ تۋرالى ۇنەمى اڭگىمە بولاتىن. سەبەبى، ولار جوعارى ءبىلىم الۋ ءۇشىن كوبىرەك مۇمكىندىكتەر قازاقستاندا بار دەپ ەسەپتەيتىن. ءبىراق ءبىر ءۇيلى جاننىڭ اتاجۇرتقا كوشىپ كەلۋىنە ماتەريالدىق جاعدايى كوتەرمەيتىن بولعان سوڭ، 15 جاستاعى ماقپال ءبىر ءوزى كەلەدى ءبىلىم قۋىپ. وندا دا قىرعىزستانمەن شەكارالاس جاتقان قورداي اۋدانىنا تابان تىرەيدى. بىلىمگە قۇشتار وجەت قىز ءوز بەتىنشە پاتەر جالداپ تۇرىپ، جەرگىلىكتى مەكتەپتە ورتا ءبىلىمىن جالعاستىرادى. ءار سەنبى، جەكسەنبىدە اتا-اناسىنا كومەكتەسۋ ءۇشىن قىرعىزستانعا قايتاتىن. ول سوندا دا تەك «بەستىك» دەگەن باعامەن وقىعان. ءتۇرلى پاندىك وليمپيادالارعا قاتىسقان. اسىرەسە، اعىلشىن جانە ماتەماتيكانى جاقسى كوردى. مەكتەپتى ۇزدىك ءبىتىردى.
بىردە ماقپال اناسىنا ءبىر قۇربىسىنىڭ اقش ۋنيۆەرسيتەتىندە وقىعان ۇلى تۋرالى ماقتانىشپەن ايتىپ وتىرعانىن ەستىپ قالادى. بالا كۇنىنەن اعىلشىن تىلىنە ىنتىق قىزعا اناسى بىردەن قولداۋ كورسەتەدى. قولداۋ بولعاندا دا، امەريكاندىق ءبىلىم بەرۋ ۆيزاسىن الۋ ءۇشىن بىرنەشە نەسيە الادى. ءسويتىپ، ماقپال تەحاس شتاتىنداعى ەڭ ۇلكەن قالا – حيۋستونعا جول تارتادى. سەنەمىز بە، ونىڭ قولىندا نوۋتبۋك تۇرماق، ەشقاشان ۇيالى تەلەفون دا بولعان ەمەس. تەك ۇشۋ بيلەتى جانە جول سومكەسى عانا بولعان ەدى. ءتىلدى دە جەتىك بىلمەيتىن.
شامامەن ءبىر جىلدان كەيىن ءتىل ۇيرەنىپ، اقشا جيناپ العاننان كەيىن، قىز حيۋستون قوعامدىق كوللەدجىنە وقۋعا تۇسەدى. وندا ەكى باعىت بويىنشا ءبىلىم الدى: Business جانە اssociate of science. 2016 جىلى كوللەدجدى ۇزدىك بىتىرەدى. سول جىلى ول حيۋستون ۋنيۆەرسيتەتىنە بيزنەس باعىتىندا وقۋعا تۇسەدى. ءبىراز ۋاقىتتان كەيىن ول تەحاستا وتە دامىعان مۇناي-گاز سالاسىنا قىزىعۋشىلىق تانىتادى. سول جىلدىڭ كۇزىندە ونىڭ ۋنيۆەرسيتەتىندە الەۋەتتى جۇمىس بەرۋشىلەر ءۇشىن «اشىق ەسىك» كۇنى وتكەن بولاتىن. ماقپالدىڭ جۇلدىزى جانعان كۇن ول. بۇگىندە ول ConocoPhillips ءىرى مۇناي كومپانياسىندا كىشى ينجەنەر بولىپ ەڭبەك ەتىپ ءجۇر.
ازىرلەگەن نۇرجامال الىشيەۆا.