ينۆەستيسيالىق بەلسەندىلىك، الىس-بەرىس كولەمىن ارتتىرىپ، ەكسپورتقا باسىمدىق بەرۋ
بۇعان قوسا قىزمەت كورسەتۋ سالاسىن جەتىلدىرۋ جانە ناقتى سەكتورداعى تۇراقتى ءوسىم قارقىنىن قامتاماسىز ەتۋ، دەپ حابارلايدى Almaty-akshamy.kz
ءدال وسى قادامدار بيىل وتاندىق ەكونوميكانىڭ قارىشتاپ دامۋىنا نەگىز بولدى.
«بۇل ورايدا اقپارات جانە بايلانىس، ساۋدا، سۋ جانە ەلەكترمەن جابدىقتاۋ، قۇرىلىس جانە وڭدەۋ ونەركاسىبى سالالارىنىڭ ۇلەسى باسىم»، - دەيدى ساراپشىلار.
سىرتتان قارجى تارتۋدىڭ كوزدەرى ارتىپ، وسى باعىتتاعى الەۋەتتى بارىنشا كادەگە جاراتۋ دا ەل اۋقاتىن اسىرۋعا سەپ بولعان. قارجىنى ءتيىمدى قۇياتىن باعىت تا جەتىپ ارتىلادى. وعان ۇزدىك ينۆەستورلار كوشىندە كەلەتىن اسپاناستى ەلى كۋا.
«بۇگىنگى تاڭدا جۇڭگو – قازاقستاننىڭ نەگىزگى ساۋدا-ەكونوميكالىق سەرىكتەستەرىنىڭ ءبىرى. اسپاناستى ەلى ەكونوميكامىزعا ەڭ كوپ قارجى قۇياتىن مەملەكەتتەردىڭ بەستىگىنە كىرەدى. 2020 جىلى تاراپتاردىڭ ءوزارا تاۋار اينالىمىنىڭ كولەمى جاھاندىق پاندەمياعا قاراماستان 4% ارتىپ، 15 ملرد اقش دوللارىنان استى»، - دەدى ق ر ءسىم ينۆەستيسيالار جونىندەگى كوميتەت ءتوراعاسىنىڭ ورىنباسارى ەرلان زەينەشيەۆ.
اعىمداعى جىلى قۇرىلىس سالاسىنا سالىنعان ينۆەستيسيا كولەمى ارتقانىن دا ايتۋ كەرەك. ءوسىم ەكى ەسەدەن اسقان.
بۇل ورايدا قارجى تارتۋ وڭدەۋ ونەركاسىبىندە – 50،5%، ال اۋىل شارۋاشىلىعىندا – 40،5% جانە ساۋدادا 35% ۇلعايعان.
«ءقازىر بىزدە ساۋدا بالانسى نىعايدى. جالپى العاندا 14،1% ءوسىپ، 82،2 ملرد دوللاردى قۇرادى. بىزدە ەكسپورتتىڭ جوعارى ءوسىمى بايقالادى. وتاندىق ءونىمدى تاسىمالداۋ 23،5% ارتىپ، 49،1 ملرد دوللاردى قۇرادى. ونىڭ ىشىندە وڭدەلگەن تاۋارلاردىڭ ەكسپورتى باسىم. بىزدە بۇل باعىت قارقىن الىپ جاتقانىن ەرەكشە اتاپ وتكەن ءجون. ياعني وڭدەلگەن تاۋارلار ەكسپورتى 24،4% ءوسىپ، 15،5 ملرد دوللاردى قۇرادى»، - دەدى ق ر ۇەم ماكروەكونوميكالىق تالداۋ جانە بولجامداۋ دەپارتامەنتى باسقارماسىنىڭ باسشىسى قالىبەك ماعزۇم.
ساراپشىلاردىڭ ەسەبىنشە، 2021 جىلى تۇراقتى ءوسۋ ءۇردىسىن وڭدەۋ ونەركاسىبى كورسەتكەن. وسى جىلدىڭ 10 ايىندا ءوندىرىس كولەمى 5،2% ارتقان. ءوسۋدىڭ وڭ سەرپىنى بارلىق وڭىرلەردە بايقالادى.
وسى رەتتە الماتى قالاسى، الماتى جانە قىزىلوردا وبلىستارى كوش باستاپ تۇر.