ۇزاق ۋاقىتقا سوزىلعان كارانتيننەن كەيىن الماتى سيركى سۇيىكتى كورەرمەندەرىنە ەسىگىن قايتادان ايقارا اشتى. قازاق مەملەكەتتىك سيركى اتى اڭىزعا اينالعان قازاق بالۋانى، سيرك ءارتيسى قاجىمۇقان مۇڭايتپاسوۆتىڭ 150 جىلدىعىنا ارنالعان «HELLO CIRCUS» اتتى جاڭا باعدارلاماسىن ۇسىندى.
سيركتىڭ بۇل باعدارلاماسىنا قازاق مەملەكەتتىك سيركىنىڭ بىرەگەي نومىرلەرى مەن جۇلدىزدارى قاتىستى. اتاپ ايتساق، كۇشتىك اتلەت، دارشىلار، ورىس تاياقشاسىنداعى گيمناستار، ەكۆيليبريستەر، لوپينگتەگى ۆولتيجەر-اكروباتتارى، اۋە گيمناستارى، ۇيرەتىلگەن يتتەر، اتتار! بارلىق نومىرلەردى كورەرمەندەر ءبىر ورىندا تاپجىلماستان، قول شاپالاقتاپ قىزىعا تاماشالادى.
قازاقستان رەسپۋبليكاسىنىڭ ەڭبەك سىڭىرگەن قايراتكەرى، دۇنيەجۇزىلىك كاسكادەرلەر اكادەمياسىنىڭ (اقش) «تاۋرۋس» سىيلىعىنىڭ يەگەرى ج.كۋنگۋجينوۆتىڭ جەتەكشىلىگىمەن «نوماد» توبى اتتى-اكروباتيكالىق جاتتىعۋلارىمەن كوپشىلىكتى ءتانتى ەتتى. اتتى-اكروباتيكالىق قويىلىمدا اتتىڭ قۇلاعىندا وينايتىن شاباندوز جىگىتتەر بالاقايلاردىڭ جىلقى مالىنا دەگەن قىزىعۋشىلىعىن وياتىپ، ەرەكشە قوشەمەتكە بولەندى. مونتە-كارلودا وتكەن IX حالىقارالىق «جاڭا بۋىن» سيرك ونەرى فەستيۆالىنىڭ كۇمىس جۇلدەگەرى، حح حالىقارالىق «شابىت» شىعارماشىل جاستار فەستيۆالىنىڭ ءبىرىنشى ورىن يەگەرى، «ازيا جاڭعىرىعى» VI حالىقارالىق سيرك ونەرى فەستيۆالىنىڭ التىن جۇلدەگەرى اننا دەميدوۆا ونەر كورسەتىپ، جوعارى دەڭگەيدە ساحنالانعان قىزىقتى قويىلىمدارمەن كورەرمەندەرگە قۋانىش سىيلادى. كورەرمەن دەمىن ىشىنە تارتا وتىرىپ تاماشالاعان قويىلىمنىڭ ءبىرى تانىمال قازاقستاندىق سپورتشى، ارمرەستلينگتەن حالىقارالىق سپورت شەبەرى، ەكسترەمالدى كۇشتىك سپورت تۇرلەرىنەن بىرنەشە رەكوردتاردىڭ يەگەرى، ماس-رەستلينگ الەم كۋبوگىنىڭ ەكىنشى ورىن جەڭىمپازى تيمۋر سىپاتايەۆتىڭ قويىلىمى بولدى. ول 25 كەلى تۇراتىن قىلىشتى وپ-وڭاي سەرمەپ، ءارتۇرلى جاتتىعۋلار جاساعاندا، كورەرمەندەر شۋلاپ كەتتى. ودان كەيىن باتىردىڭ ءتورت جاعىنان ءتورت اتتى كەلىپ، ارقانمەن تارتقان كەزدە ونىڭ ناعىز قاجىمۇقاننىڭ ءىزباسارى ەكەنىنە كوز جەتكەندەي بولدى. كۇش اتاسى قاجىمۇقاننىڭ جولىن جالعاپ، حالىقارالىق ارەنادا جەتىستىككە جەتىپ جۇرگەن اتلەت العاش رەت قالا تۇرعىندارىنىڭ الدىندا ونەرىن كورسەتتى. ول وسىعان دەيىن 400 كەلىلىك تۇيەنى كوتەرىپ، رەكورد ورناتقان بولاتىن.
«اتامىزدىڭ 150 جىلدىعىنا وراي ارنايى شاقىرىلىپ كەلىپ جاتىرمىز. قانشاما تەمىردى مايىستىرۋ وڭاي ەمەس، اتامىز جاساعان تريۋكتار كوپ. اتالارىمىزدىڭ سالعان سارا جولىن ۇرپاق بوپ جالعاستىرۋ – ءبىزدىڭ پارىزىمىز»، – دەدى قازاق مەملەكەتتىك سيركىنىڭ ءارتىسى تيمۋر سىپاتايەۆ.
ال «بەلدىكتەردەگى اۋە گيمناستارى» نومىرىندەگى قويىلىمدى ساحنالاۋدا ەش قورىقپاعان قوس ارۋ – ۋحان قالاسىندا وتكەن ءحى حالىقارالىق سيرك ونەرى فەستيۆالىنىڭ كۇمىس جۇلدەگەرى، VII حالىقارالىق «ازيا جاڭعىرىعى» سيرك ونەرى فەستيۆالىنىڭ گران-پري يەگەرى مارينا ستارودۋبوۆا مەن دايانا جەتپىسوۆاعا كورەرمەندەر شاپالاقتى اياماي سوقتى. ۋچاو مەن ۋحانداعى حالىقارالىق سيرك ونەرى فەستيۆالدەرىنىڭ قولا جۇلدەگەرى تيمۋر كورجۋمبايەۆتىڭ جەتەكشىلىگىمەن «ۇيرەتىلگەن يتتەر» نومىرىنەن كىشكەنتاي كورەرمەندەردىڭ العان اسەرى مەن قۋانىشى ەرەكشە بولدى. بۇلدىرشىندەر ساحناداعى ارتىستەردىڭ ونەرى مەن يتتەردىڭ قيمىل-قوزعالىسىن سۇيسىنە تاماشالادى. اسىرەسە، ورتاعا كوڭىلدى سايقىمازاقتار شىققاندا، كەرەمەت كوڭىل كۇيگە كەنەلدى. بالالارمەن بايلانىس ورناتىپ، قىزىقتى سۇراقتار قويۋ ارقىلى ولار سيرك ءىشىن كىشكەنتايلاردىڭ سىڭعىرلاعان كۇمىس كۇلكىسىنە تولتىردى. ىشەك-سىلەسى قاتىپ ابدەن كۇلىپ العاننان كەيىن، كورەرمەندەردى تاڭقالارلىق شوۋ كۇتىپ تۇردى. حانچجوۋدا وتكەن حالىقارالىق يلليۋزيالىق ونەر فەستيۆالىنىڭ التىن جۇلدەگەرى ءلاززات بايتوقانوۆانىڭ قويىلىمى راسىمەن بالاعا دا، ۇلكەنگە دە تاڭسىق دۇنيە بولدى. جارق-جۇرق ەتكەن ارۋدىڭ قىسقا عانا ۋاقىتتىڭ ارالىعىندا كورەرمەننىڭ كوز الدىندا 8 كويلەكتى قالاي اۋىستىرىپ ۇلگەرگەنىن تۇسىنە الماي اڭ-تاڭ قالدى.
سۆەتنوي بۋلۆارداعى يۋ.نيكۋلين سيركى، ماسكەۋ حالىقارالىق جاستار سيرك ونەرى فەستيۆال-بايقاۋىنىڭ جانە II مينسك سيرك ونەرى فەستيۆالىنىڭ قولا جۇلدەگەرلەرى ادىلەت تيكانوۆتىڭ جەتەكشىلىگىندەگى جاڭا «قوس جۇڭگو ماچتاسى» ءنومىرى، راۆيل سەيدگارييەۆتىڭ جەتەكشىلىگىندەگى «دارشىلار»، قازاق مەملەكەتتىك سيركىنىڭ بي-اكروباتيكالىق بالەت جانە باسقا دا جارقىن سيرك نومىرلەرى مەن كوڭىلدى رەپريزالار دا قالىڭ كوپشىلىكتىڭ ىستىق قوشەمەتىن الدى.
- الماتى سيركىنىڭ شىعارماشىلىق ۇجىمى ءوز كورەرمەندەرىمەن بۇل كەزدەسۋدى كوپتەن كۇتتى، سيرك ارتيستەرى جەلىدەن تىس جانە وفلاين-رەجيمدە تالماي جۇمىس جاسادى. ءبىر جارىم جىلدان بەرگى دەمالىس بولعان كەزدە دە ەشقانداي ارتيست قاراپ جاتقان جوق. ويتكەنى، سيرك ءارتيسىنىڭ ءومىرى سپورت سياقتى. كۇندە شيراتىلىپ، تارتىلعان رەزەڭكەدەي بولىپ، سامداعايلىعى، كۇشتىلىگى بولماسا، ول ءوز فورماسىن جوعالتىپ الادى. سوندىقتان ارتيستەردىڭ بارلىعى ءبىر جارىم جىلدىڭ ىشىندە، قاتاڭ كارانتين بولعان كەزدە ۇيلەرىندە دايىندالدى. ءبىز ءوز سيركىمىزدە الماتىلىقتاردى جانە وڭتۇستىك استانانىڭ قوناقتارىن، سيرك ونەرىنىڭ بارلىق باعالاۋشىلارىن ۇلكەن قۋانىشپەن كۇتەمىز. كورەرمەندەردى باس اينالاتىن تريۋكتەر، تاڭعاجايىپ سيقىر، جانۋارلار، رياسىز كۇلكى كۇتۋدە،– دەدى قازاق مەملەكەتتىك سيركىنىڭ ديرەكتورى باقىت بوكەباي.
ءارتۇرلى جانرداعى قويىلىمدار كوپتەن ساعىنىپ كەلگەن بالالاردى دا، اتا-انالاردى دا ءبىر ساتكە زەرىكتىرمەدى. قويىلىمنىڭ قىزىقتى وتۋىنە اتسالىسىپ، بويىنداعى بار ونەرىن سالعان سيرك ارتىستەرى الماتىلىق كورەرمەندەردىڭ ىستىق ىقىلاسىنا بولەندى. اقىلدى جانۋارلار، تاڭ-تاماشا قالدىراتىن تريۋكتەر، جارقىن كۇلكى، تاڭعاجايىپ وزگەرۋلەر جانە جاعىمدى ەموسيالار سياقتى سيركتىڭ سيقىرىنا كەلگەن ونەرسۇيەر قاۋىم ريزا بولىپ قايتتى. قازاق مەملەكەتتىك سيركىندەگى ەرەكشە باعدارلامامەن دايىندالعان بۇل قويىلىمداردىڭ قىزىعىن الماتىلىق كورەرمەندەر 15 شىلدەگە دەيىن تاماشالاي الادى.