الماتى قالالىق جەدەل شۇعىل كومەك كورسەتۋ اۋرۋحاناسىنا (قجشككا) 60 جاستاعى ناۋقاس سول كوزىنىڭ شىعىڭقىلىعى، قىزارۋى جانە قوزعالىسىنىڭ شەكتەلۋىنە شاعىمدانىپ ءتۇستى. دارىگەرلىك تەكسەرۋ ناتيجەسىندە وتە سيرەك كەزدەسەتىن دياگنوز – كوزدىڭ ارتەريوۆەنوزدى فيستۋلاسى انىقتالدى.
قجشككا نەيروحيرۋرگ مامانى ماكسيم ارگۋمبايەۆتىڭ ايتۋىنشا، بۇل اۋرۋدىڭ الەمدە سوڭعى 30 جىل ىشىندە بار بولعانى 42 جاعدايى عانا تىركەلگەن.
"اۋرۋدىڭ ءقاۋپى – ەكزوفتالمانىڭ (كوزدىڭ شىعىڭقىلىعىنىڭ) ۇدەمەلى دامۋىندا. ول كورۋ قابىلەتىن جوعالتۋعا نەمەسە ءتىپتى كوز الماسىن الىپ تاستاۋعا ماجبۇرلەيتىن جاعدايعا اكەلۋى مۇمكىن"، – دەپ اتاپ ءوتتى دارىگەر.
ارتەريوۆەنوزدى فيستۋلا – ارتەريالار مەن تامىرلار اراسىنداعى قان اعىمىنىڭ بۇزىلۋىنا اكەلەتىن پاتولوگيالىق بايلانىس.
ناۋقاستىڭ ەمدەلۋىن وتالىق بريگادا – نەيروحيرۋرگيا بولىمشەسىنىڭ مەڭگەرۋشىسى كونستانتين لي، نەيروحيرۋرگ ماكسيم ارگۋمبايەۆ، انەستەزيولوگ رينات قاسەنوۆ، جانە وتالىق مەدبيكە ەلميرا ايۋپوۆا جۇزەگە اسىردى. كوماندا كوزدەگى فيستۋلاعا كۇردەلى رەنتگەنوەندوۆاسكۋليارلىق ەمبوليزاسيا وتاسىن ءساتتى جاسادى.
وتا ۇزاقتىعى بار بولعانى 60 مينۋتتى قۇرادى.
كوماندا مۇشەلەرىنىڭ جوعارى كاسىبي بىلىكتىلىگى مەن ۇيلەسىمدى جۇمىسىنىڭ ارقاسىندا ناۋقاستىڭ كورۋ قابىلەتى ساقتالىپ قالدى. وتادان كەيىنگى ديناميكادا ايتارلىقتاي جاقسارۋ بايقالدى: كوزدىڭ شىرىشىنىڭ (حەموز) رەگرەسى ورىن الىپ، كوزدى تولىق جابۋ قابىلەتى قالپىنا كەلتىرىلدى.
"مۇنداي وتا كورۋ قابىلەتىن ساقتاپ قالۋعا قاتىستى جوعارى قاۋىپپەن بىرگە جۇرەدى. ءبىز ناۋقاسقا كومەكتەسە العانىمىزعا، زاماناۋي تەحنولوگيالار مەن كوماندا تاجىريبەسىن قولدانعانىمىزعا قۋانىشتىمىز. بۇل جاعداي دارىگەرلىك كومەككە ەرتە جۇگىنۋ مەن كاسىبي كوزقاراستىڭ ماڭىزدىلىعىن ايقىن كورسەتەدى"، – دەپ تۇيىندەدى ماكسيم ارگۋمبايەۆ.