قازاقستاندا 48 ورفاندىق نەمەسە سيرەك كەزدەسەتىن اۋرۋلار بويىنشا 96 دارىلىك زاتپەن امبۋلاتوريالىق دەڭگەيدە تەگىن قامتاماسىز ەتۋ كوزدەلگەن، دەپ حابارلايدى almaty-akshamy.kz
بۇل رەتتە ورفاندىق اۋرۋلارى بار پاسيەنتتەردى ەمدەۋگە ارنالعان پرەپاراتتاردى قارجىلاندىرۋ ۇلەسى امبۋلاتوريالىق دارى-دارمەكپەن قامتاماسىز ەتۋدىڭ جالپى بيۋدجەتىنىڭ 25%-دان استامىن قۇرادى، سيرەك كەزدەسەتىن اۋرۋلاردان زارداپ شەگەتىن پاسيەنتتەردىڭ وزدەرىنىڭ سانى دارى-دارمەك الاتىن پاسيەنتتەردىڭ جالپى سانىنىڭ 1%-ىن عانا قۇرايدى.
2023 جىلى رەسپۋبليكالىق بيۋدجەتتىڭ ەسەبىنەن ءبىرىڭعاي ديستريبيۋتور امبۋلاتوريالىق دارى-دارمەكپەن قامتاماسىز ەتۋ ءۇشىن 74 ملرد. تەڭگە سوماسىنا ورفاندىق پرەپاراتتاردى ساتىپ الدى، دەگەنمەن 2020 جىلى بۇل سوما 29،3 ملرد. تەڭگەنى قۇرادى جانە 20 ملرد. تەڭگەگە ستاسيونارلىق دەڭگەيدە دارى-دارمەكتەر ساتىپ الىندى.
سونىمەن قاتار، ءماسليحاتتاردىڭ شەشىمى بويىنشا 2023 جىلى جەرگىلىكتى بيۋدجەتتىڭ ەسەبىنەن ورفاندىق اۋرۋلاردى ەمدەۋگە 15،7 ملرد.تەڭگە كولەمىندە قارجى ءبولىندى.
پاسيەنتتەردىڭ شەكتەۋلى سانى ءۇشىن قىمبات پرەپاراتتار ەل بيۋدجەتىنە جوعارى اۋىرتپالىق تۇسىرەتىنىن ايتا كەتۋ كەرەك. ورفاندىق دارى-دارمەكتەردى ساتىپ الۋ شىعىستارىن تالداۋ 47 ورفاندىق پرەپاراتتىڭ ەڭ قىمبات ەكەنىن كورسەتتى. مىسالى، 1 پاسيەنتتى ەمدەۋ كۋرسىنىڭ ورتاشا قۇنى مۋكوپوليساحاريدوز اۋرۋى كەزىندە ەلوسۋلفازا الفا 131،3 ملن. تەڭگەنى، جۇلىن بۇلشىقەت اتروفياسى اۋرۋى كەزىندە نۋسينەرسەن 114،3 ملن. تەڭگەنى، ديۋشەننىڭ بۇلشىقەت ديستروفياسى اۋرۋى كەزىندە اتالۋرەن پرەپاراتى 147،8 ملن. تەڭگەنى، فابري اۋرۋىمەن اۋىرعان كەزدە اگالزيدازا بەتا پرەپاراتى 68،3 ملن. تەڭگەنى قۇرايدى.
حالىقارالىق پراكتيكادا مۇنداي پاسيەنتتەردى ەمدەۋ مەن قولداۋ ءۇشىن نەگىزگى شىعىندار كوبىنەسە قايىرىمدىلىق كومەك ارقىلى جابىلادى.
ەل پرەزيدەنتىنىڭ جارلىعىمەن قۇرىلعان "قازاقستان حالقىنا" قوعامدىق قورى 2022 جىلدان باستاپ 40 ملرد تەڭگەگە جۋىق سوماعا ورفاندىق اۋرۋلارى بار 389 پاسيەنتتى قايىرىمدىلىق قاراجاتىنىڭ ەسەبىنەن قامتاماسىز ەتتى. قازاقستان رەسپۋبليكاسىندا ورفاندىق (سيرەك كەزدەسەتىن) اۋرۋلارعا 100 000 حالىققا شاققاندا 50 جاعدايدان اسپايتىن اۋرۋلار جاتادى.