سولتۇستىك قازاقستان وبلىسىندا پوليسيا ەسىرتكى جاسىرۋمەن اينالىسقان قۇربىلاردى ۇستادى، دەپ حابارلادى Polisia.kz.
پەتروپاۆل قالاسىنداعى جۇمىسشى كەنتىندە سقو پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى سينتەتيكالىق ەسىرتكى تاراتتى دەگەن كۇدىكپەن Toyota RAV4-دە وتىرعان 2 ايەلدى ۇستادى. ونىڭ ءبىرى – 33 جاستاعى قالا تۇرعىنى. ول زاڭسىز جولمەن اقشا تابۋدىڭ سوڭى نەمەن اياقتالاتىنىن جاقسى بىلگەن. سەبەبى 2022 جىلعى قىركۇيەكتە ونىڭ كۇيەۋى وسىنداي قىلمىس جاساعانى ءۇشىن سوتتالىپ، ءقازىر تۇرمەدە جازاسىن وتەپ جاتىر.
Toyota RAV4 كولىگىنىڭ ىشىندە كۇدىكتىنىڭ 36 جاستاعى قۇربىسى وتىرعان. ول دا ۇستالدى.
ايەلدەردى جانە ولاردىڭ تۇرعىلىقتى مەكەنجايىن ءتىنتۋ كەزىندە 700 گرامنان اساتىن ۇنتاق ءتارىزدى جانە كەسەكتەلگەن زات تاركىلەندى. ساراپتاما ناتيجەسى ونىڭ α-PvP (تۇز) سينتەتيكالىق ەسىرتكى ەكەنىن كورسەتتى. سونداي-اق ەسىرتكىنى بۋىپ-تۇيۋگە ارنالعان ماتەريالدار دا تاركىلەندى.
بۇل دەرەك قىلمىستىق كودەكستىڭ 297-بابى 3-بولىگى بويىنشا سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىنە تىركەلدى. بۇگىندە 33 جاستاعى قالا تۇرعىنى قاماۋعا الىندى، تەرگەۋ ءجۇرىپ جاتىر. كۇدىكتىلەر بۇل قىلمىسپەن شامامەن 4 اي اينالىسقان، – دەدى سقو پد ەققىقب باسشىسى رۋسلان ساپاروۆ.
پوليسيا ەسىرتكىنى اسا ءىرى كولەمدە وتكىزگەنى ءۇشىن 10 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعانىن ەسكەرتەدى.