اۋا تەمپەراتۋراسى كليماتتىق نورما شاماسىندا بولادى.
«قازگيدرومەت» ماماندارى قاراشا ايىندا اۋا رايى قانداي بولاتىنىن بولجادى، دەپ حابارلايدى Almaty-akshamy.kz.
«قاراشا ايىنىڭ باسىندا سيكلون سكانديناۆيادان رەسەيدىڭ ەۋروپالىق اۋماعى (رەا) ارقىلى ۇلكەن جىلدامدىقپەن قازاقستان اۋماعىنا اۋىسىپ، اۋا رايىنا ىقپال ەتەدى. رەسپۋبليكانىڭ وڭتۇستىگىندە ءالى دە جاڭبىر جاۋادى. اتموسفەرالىق اعىندارمەن بايلانىستى ەڭ كۇشتى جاۋىن-شاشىن ەلىمىزدىڭ سولتۇستىك-باتىسىندا، سولتۇستىگىندە، ورتالىعىندا جاۋىپ، كوكتايعاق بولادى جانە جەل 15-28 م/س-كە دەيىن كۇشەيەدى»، - دەلىنگەن سينوپتيكتەردىڭ حابارلاماسىندا.
قاراشانىڭ العاشقى كۇندەرىندە ق ر اۋماعى بويىنشا اۋا تەمپەراتۋراسى تۇندە -5+5°س، كۇندىز +1+9°س، ەلىمىزدىڭ وڭتۇستىگى مەن وڭتۇستىك-شىعىسىندا جىلى بولادى - كۇندىز +10+18°س.
ءبىرىنشى ونكۇندىكتىڭ ورتاسىنان باستاپ بەلسەندى سيكلون شىعىس باعىتتا جىلجىپ، قازاقستان اۋماعىنان كەتەدى. بۇل سيكلوننىڭ ىزىنەن قارا تەڭىز ايماقتارىنان انتيسيكلون تارالادى. جاۋىن-شاشىن باتىس وڭىرلەردە توقتايدى، ونكۇندىكتىڭ سوڭىندا رەسپۋبليكانىڭ قالعان اۋماعىندا دا جاۋىن-شاشىن توقتايدى. اۋا تەمپەراتۋراسى ەلىمىزدىڭ سولتۇستىك جارتىسىندا تۇندە -3-13°س-قا دەيىن، كۇندىز -5+2°س-قا دەيىن، وڭتۇستىك جارتىسىندا تۇندە -5+2°س-قا دەيىن، كۇندىز 0،+8°س-قا دەيىن بىرتىندەپ تومەندەيدى.
ايدىڭ ەكىنشى جانە ءۇشىنشى ونكۇندىگىندە قازاقستان اۋماعىنا سولتۇستىك تەڭىز، باتىس جانە شىعىس ءسىبىر اۋداندارىنان سۋىق اۋا ماسسالارى كەلىپ، كۇن قۇبىلمالى بولادى. تەرمومەتر باعانى ەلدىڭ سولتۇستىك جارتىسىندا تۇندە -17-25°س-قا دەيىن، كۇندىز -5-12°س-قا دەيىن، وڭتۇستىك جارتىسىندا تۇندە -10-17°س-قا دەيىن، كۇندىز -3-10°س-قا دەيىن.
الايدا، قازاقستان اۋماعىنا اتلانتيكا مەن يران اۋماعىنان اۋا ماسسالارى كەلىپ، كۇن جىلىنۋى دا مۇمكىن.