ەلىمىزدەگى تۇڭعىش جاڭعاق باعى الماتى وبلىسىندا جايقالىپ تۇر

الماتى وبلىسىندا قازاق توپىراعىندا كوپ كەزەدەسە قويمايتىن جەمىس اعاشىن ءوسىرىپ وتىرعان شارۋا بار.

مانشۇك جەكسەمبەكوۆا – جاي شارۋا عانا ەمەس، بيولوگيا عىلىمدارىنىڭ دوكتورى. ۇزاق جىلدار بويى بيوتەحنولوگيا سالاسىندا زەرتتەۋ جۇرگىزگەن. ءسويتىپ، زەرتتەۋىن ءىس جۇزىندە كورەم دەپ ءبىر كەزدەرى الماتى وبلىسىنىڭ تۇرگەن اۋىلىنا تابان تىرەيدى. اكەسى دە باعبان بولعان ەكەن. ەندى وسى ءبىر كاسىپتى عىلىممەن ۇشتاستىرىپ، تابىستىڭ كوزىن تاپقان، دەپ حابارلايدى Almaty-akshamy.kz.24.kz-كە سىلتەمە جاساپ.

ديقانداردىڭ ەڭبەگى مانشۇك جەكسەمبەكوۆاعا بالا كەزىنەن تانىس. ونىڭ اكەسى دە – جەر ەمگەن شارۋا. اۋىلعا كەلىپ، جەكە شارۋاشىلىعىن جولعا قويعان مانشۇك ءقازىر التى باعىتتا كاسىبىن دوڭگەلەتىپ وتىر. سونىڭ ءبىرى – 81 گەكتار جەردى الىپ جاتقان ب ا ق. مۇندا گرەك جاڭعاعى، بادام جانە فۋندۋك ەگىلگەن. جاڭعاقتىڭ سوڭعى ءتۇرىن 2017 جىلدان باستاپ وندىرىستىك اۋقىمدا ءوسىرىپ كەلەدى. قازاقستاندا بۇعان دەيىن جاڭعاق باعى بولماعان.

«ءبىزدىڭ وڭىردە اگروتۋريزمدى دامىتۋعا مۇمكىندىك كوپ. سەبەبى شارۋا قوجالىقتارى الۋان ءتۇرلى ءونىم وسىرەدى. جەمىس-جيدەكتەر، ءجۇزىم، الما، جاڭعاق باقتارى تۋريستەر ءۇشىن قىزىق. ولاردىڭ نەشە ءتۇرلى سۇرىپتارى بار. ءبىزدىڭ فەرمەرلەردىڭ كوپشىلىگى جاقسى ءونىم الۋدىڭ ەرەكشە تەحنولوگيالارىن بىلەدى. ولار وزدەرىنىڭ تاجىريبەلەرىمەن بولىسۋگە دايىن»، - دەيدى شارۋا قوجالىعىنىڭ باسشىسى مانشۇك جەكسەمبەكوۆا.

- فۋندۋكتىڭ ىشكى نارىقتاعى باعاسى كەلىسىنە 5 مىڭ تەڭگە، - دەيدى شارۋا. سوندىقتان وندىرىستىك اۋقىمدا ءوسىرۋ يمپورتتى الماستىرۋ ماسەلەسىن شەشەدى جانە باعانى ايتارلىقتاي تومەندەتەدى. قىركۇيەك ايىندا فەرمەر العاشقى اگروتۋر ۇيىمداستىرىپتى. تۋريستەر جاڭعاق جيناۋدى تاماشالاپ، ءدامىن تاتقان. بۇل جولى قوناقتار شارۋاشىلىققا كومەكتەسىپ، باقتىڭ اينالاسىنا تەرەك كوشەتتەرىن وتىرعىزدى. تەرەك تەز وسەدى. بولاشاقتا ورمان جاڭعاعىن ۇسىك پەن جەلدەن قورعايدى.

«تەرەك ورماننىڭ العى شەبىندە تۇرادى دەسەك بولادى. تەرەكتەن كەيىن باسقا اعاشتار جاقسى وسەدى. بۇكىل الەمدە وسى تاجىريبەنى قولدانادى. بۇل قازاقستان ءۇشىن دە قولايلى»، - دەيدى قازاق وسىمدىكتەردى قورعاۋ جانە كارانتين عزي ءبولىم باسشىسى رينات فازىلبەكوۆ.

كەلۋشىلەر ۇزىن-سانى 200-گە جۋىق تەرەك ەكتى. مامانداردىڭ ايتۋىنشا، جاس قالەمشەلەر نەبارى 3 جىلدا جايقالىپ شىعا كەلەدى. وسىلايشا فۋندۋك اعاشتارىنىڭ مول ءونىم بەرۋىنە دە سەپتىگىن تيگىزەدى.