2024 جىلدىڭ ءساۋىر ايىندا الماتىدا Cambridge International كومپانياسىنىڭ ماتەماتيكا جانە ناقتى عىلىمدار بويىنشا جالعىز ازيالىق سەرىكتەس كومپانياسى – Marshall Cavendish-پەن بىرلەسكەن ءبىلىم بەرۋ باعدارلاماسىن ىسكە اسىرۋ باستالادى. بۇل تۋرالى مەملەكەت باسشىسىنىڭ الدىندا بايانداما جاساعان الماتى اكىمى ەربولات دوسايەۆ ايتتى.
جاڭا ءبىلىم بەرۋ ادىستەرىن ەنگىزۋ، سونىڭ ىشىندە سينگاپۋر – Marshall Cavendish – PISA كورسەتكىشتەرىن جاقسارتۋ ءۇشىن قاجەت. بۇل حالىقارالىق تەستىلەۋ ءارتۇرلى ەلدەردەگى وقۋشىلاردىڭ فۋنكسيونالدىق ساۋاتىن جانە تەوريالىق ءبىلىمدى تاجىريبەدە قولدانا ءبىلۋىن باعالاۋعا مۇمكىندىك بەرەدى.
«بيىل مامىر-جەلتوقسان ايلارى ارالىعىندا ەىدۇ (ەكونوميكالىق ىنتىماقتاستىق پەن دامۋ ۇيىمى) ستاندارتتارىن قولدانا وتىرىپ، 50 PISA جاتتىقتىرۋشىسى وقىتىلادى. قىركۇيەك ايىندا 14 PISA قۇزىرەتتىلىك ورتالىقتارىندا تابىستى مەكتەپ مودەلى – School Excellence Model ەنگىزىلەدى. الداعى وقۋ جىلىنىڭ باسىندا قالانىڭ بارلىق مەملەكەتتىك مەكتەبىندە PISA Artificial Intelligence پلاتفورماسى ەنگىزىلەدى»، - دەدى ەربولات دوسايەۆ.
ونىڭ ايتۋىنشا، ۇسىنىلعان شارالار تەستىلەۋ ناتيجەسى بويىنشا وقۋشىلاردىڭ كورسەتكىشىن جاقسارتۋعا مۇمكىندىك بەرەدى.
ايتا كەتەيىك، PISA-2022 حالىقارالىق زەرتتەۋىنىڭ قورىتىندىسى بويىنشا الماتىلىق وقۋشىلار قازاقستان بويىنشا ءبىرىنشى ورىندى يەلەندى.