جول سالاسىنداعى نەگىزگى جوبالار بيىل تولىق اياقتالادى

«بيىل 3،1 مىڭ شاقىرىم جول جاڭعىرتۋمەن قامتىلماق. ونىڭ ىشىندە «قاراعاندى – الماتى»، «اتىراۋ - استراحان»، «اقتوبە - قاندىاعاش»، «تالدىقورعان – وسكەمەن» سىندى وتپەلى جوبالار بار. 2023 جىلى بارلىق كۇش جولدىڭ جاڭا قاباتىمەن قوزعالىستى قامتاماسىز ەتۋگە باعىتتالدى. وسى جىلى نەگىزگى جوبالار بويىنشا جۇمىستاردى تولىق اياقتاۋ كوزدەلگەن. الايدا، كەيبىر جوبانىڭ قۇرىلىس مەرزىمىنىڭ ۇزاققا سوزىلۋى ءارتۇرلى فاكتورلارعا، ونىڭ ىشىندە اۆتوموبيل جولدارى قۇرىلىس ماتەريالدارىنىڭ قىمباتتاۋىنا بايلانىستى بولعانىن اتاپ وتكەن ءجون»، - دەلىنگەن مينيسترلىكتىڭ اگەنتتىك ساۋالىنا بەرگەن جاۋابىندا.

ۆەدومستۆو مالىمەتىنشە، قازىرگى ۋاقىتتا ۇزىندىعى 946 شاقىرىم بولاتىن «قاراعاندى-بالقاش-الماتى» جولىنىڭ «قاراعاندى-بالقاش» (363 شاقىرىم)، «بالقاش-بۋرىلبايتال» (288)، «بۋرىلبايتال-كۇرتى» (228) ۋچاسكەسىن جاڭعىرتۋ جۇمىستارى جۇرگىزىلىپ جاتىر. جولدىڭ 868 شاقىرىمى جابىننىڭ تومەنگى قاباتىمەن قامتاماسىز ەتىلگەن. بيىل جۇمىستاردى اياقتاۋ جوسپارلانعان. 

ال «اتىراۋ-استراحان» جولىنىڭ 60 شاقىرىمى پايدالانۋعا بەرىلدى. قالعان 217 شاقىرىمى ەۋروپالىق قايتا قۇرۋ جانە دامۋ بانكى قاراجاتى ەسەبىنەن جۇزەگە اسىرىلادى. 2023 جىلى 192 شاقىرىم جول جاڭا اسفالتبەتون جابىنىمەن قامتاماسىز ەتىلدى. بۇل جوبانى دا وسى جىلى اياقتاۋ جوسپارلانىپ وتىر. قازىرگى ۋاقىتتا اقتوبە وبلىسىنان ينەرتتى ماتەريالداردى دايىنداۋ جالعاسۋدا. ينەرتتى ماتەريالدار تەمىرجول كولىگىمەن جەتكىزىلەدى. 

«اقتوبە-قاندىاعاش» جولىنىڭ 96 شاقىرىمى جاڭعىرتىلادى. 64 شاقىرىمدا ءبىر باعىتتا قوزعالىسقا جول اشىلعان.

«تالدىقورعان-وسكەمەن» جولىنىڭ جاڭعىرتۋمەن قامتىلعان بولىگى 768 شاقىرىمدى قۇرايدى. بۇگىنگى كۇنى 748 شاقىرىمىندا قوزعالىس اشىق. قۇرىلىستى تولىق اياقتاۋ 2024 جىلدىڭ سوڭىنا كوزدەلىپ وتىر.

«بۇل جوبالاردى ىسكە اسىرۋداعى قيىندىقتار مەن كىدىرىستەر ءارتۇرلى فاكتورعا، ونىڭ ىشىندە ماتەريالدار، جانار-جاعار ماي جانە جوبا قۇنىنىڭ وسۋىنە بايلانىستى بولدى.
«سونداي-اق، كىدىرىستەر جوسىقسىز مەردىگەرلىك ۇيىمدار تاراپىنان جۇمىستاردىڭ ۋاقىتىلى ورىندالماۋىنا دا بايلانىستى. بەلگىلەنگەن مەرزىمدەردى ساقتاماۋ جانە قۇرىلىس پروسەستەرىن جۇزەگە اسىرۋداعى تيىمدىلىكتىڭ جەتكىلىكسىزدىگى جۇمىس كەستەلەرىندەگى ۇزىلىستەرگە اكەلدى. مۇنان بولەك، ماسەلەگە ايتارلىقتاي اسەر ەتەتىن وزگە فاكتورعا مەردىگەرلىك ۇيىمدارمەن كەلىسىمشارتتاردى بۇزۋ كىرەدى. بۇل جاڭا تەندەرلەردى وتكىزۋ، قۇجاتتامانى قايتا قاراۋ جانە قۇرىلىس ءىس-شارالارىن قايتا جوسپارلاۋ، كارەرلەردى قايتا رەسىمدەۋ قاجەتتىلىگىنە الىپ كەلدى. وسىنداي وزگەرىستەردىڭ ناتيجەسىندە قۇرىلىستىڭ جالپى بارىسىنا اسەر ەتكەن اياقتالۋ مەرزىمدەرىن قوسىمشا ۇزارتۋ پايدا بولدى»، - دەدى مينيسترلىكتەن.