سىرتقى ىستەر مينيسترلىگىنىڭ رەسمي وكىلى ايبەك سمادياروۆ: اپاتقا ۇشىراعاندار قاۋىپسىزدىك بەلدەمشەسىن تاقپاعان، دەپ حابارلايدى Almaty-akshamy.kz.
بەلگىلى جۋرناليست، «زەيىن اتىراۋ» ەرەكشە بالالاردى وڭالتۋ ورتالىعىنىڭ نەگىزىن قالاعان ارايلىم باعىتجان انتالياداعى ءىرى جول اپاتىنا ءتۇسىپ، ومىردەن وتكەنىن بۇعان دەيىن حابارلاعان بولاتىنبىز.
«وكىنىشكە قاراي، كەشە سۋىق حابار الدىق. جول-كولىك اپاتى بولىپ، ءبىر جانۇيا زارداپ شەكتى. ونىڭ سالدارىنان 1989 جىلى تۋعان ايەل مەن ەكى جاسار قىزى قايتىس بولدى. 86 جىلى تۋعا ەر ازامات، سول ايەلدىڭ كۇيەۋى اۋىر جاعدايدا، جانساقتاۋ بولىمىندە جاتىر ءقازىر. ال 2014 جىلى تۋعان ەر بالا اۋرۋحانادا. ونىڭ دەنساۋلىعى مەن ومىرىنە ەشقانداي ءقاۋىپ ءتونىپ جۇرگەن جوق.
ءبىزدىڭ ديپلوماتتار ول وتباسىنىڭ تۋىستارىمەن بايلانىستا. بۇگىن-ەرتەڭ تۋىستارى تۇركياعا جەتۋ كەرەك. بارلىق قاجەتتى كونسۋلدىق، قۇقىقتىق كومەك كورسەتەمىز. بۇل وتباسىعا تۇركياعا دەمالۋعا كەلگەن بولاتىن. 31 تامىز كۇنى كەلگەن، بۇگىن ەلگە قايتۋ كەرەك ەدى. كەشە ءبىر ەكسكۋرسياعا شىعىپ، سافاري-كولىككە ءمىنىپ، باسقا كولىكپەن سوقتىعىسقا كەزدە ءبارى ماشينەدەن ۇشىپ كەتكەن»، - دەدى ول.
مينيسترلىكتىڭ رەسمي وكىلى كولىكتە 15 ادام بولعان دەگەن دەرەك بار ەكەنىن ايتادى.
«سونىڭ تورتەۋى ءبىزدىڭ ازاماتتار. ەكەۋى كوز جۇمدى. ەكەۋى ءقازىر اۋرۋحانادا. بۇل وتباسىندا ساقتاندىرۋ پوليۋستەرى بولعان. تۇركياعا تۋىستارى جەتكەن سوڭ، سول جەردە ناقتى شەشىم قابىلدانادى. جاقىن ارادا قازاقستانعا تەزدەتىپ جەتكىزۋگە كومەك كورسەتىلەدى»، - دەدى ول.
سونداي-اق، ءسىم رەسمي وكىلى قازاقستاندىقتاردى شەتەلدە جۇرگەن كەزدە قاۋىپسىزدىككە باسا كوڭىل بولۋگە شاقىردى.
«ايتا كەتەتىن جايت، ءبىزدىڭ ازاماتتار شەتەلگە دەمالۋعا بارعان كەزدە نەمەسە باسقا ماقساتتارمەن جۇرگەن كەزدە قاۋىپسىزدىك شارالارىن قاتاڭ ساقتاعان ءجون دەپ ويلايمىز. ءبىزدىڭ بىلۋىمىزشە، راس پا وتىرىك پە، تەرگەۋ انىقتاي جاتار، قاۋىپسىزدىك بەلدەمشەسىن تاقپاعان. سودان ماشينەدەن ءبارى ۇشىپ شىققان»، - دەدى ايبەك سمادياروۆ.