قاسىم-جومارت توقايەۆتىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى.
جيىندا حالىق اراسىنداعى قۇمار ويىنعا تاۋەلدىلىك ماسەلەلەرى قاراستىرىلدى، دەپ حابارلايدى Almaty-akshamy.kz.
– سوڭعى جىلدارى ەلىمىزدە قۇمار ويىنعا تاۋەلدىلىك بەلەڭ الىپ بارادى. كەيبىر وتباسىلار ءۇشىن بۇل ۇلكەن قاسىرەتكە اينالدى، – دەدى پرەزيدەنت. پرەزيدەنت وسى جامان ادەتكە، اسىرەسە، جاستار اۋەس ەكەنىنە نازار اۋدارىپ، مەملەكەتتىك ورگاندارعا ازاماتتاردىڭ جەكەلەگەن ساناتتارى ءۇشىن قۇمار ويىندارعا قاتىستى شەكتەۋلەردى كۇشەيتۋدى تاپسىردى. – لۋدومانياعا قارسى كۇرەستە تاربيە ءىسى مەن ءتۇسىندىرۋ جۇمىستارىنا ەرەكشە ءمان بەرىلۋگە ءتيىس، – دەدى پرەزيدەنت. وسىعان بايلانىستى مەملەكەت باسشىسى سالالىق مينيسترلىكتەرگە ناقتى مىندەتتەر جۇكتەدى.
قاسىم-جومارت توقايەۆ قۇمار ويىنعا تاۋەلدى ازاماتتاردىڭ قاتىسى بار قىلمىستار كوبەيگەنىنە قۇقىق قورعاۋ ورگاندارىنىڭ نازارىن اۋدارىپ، الدىن الۋ جۇمىستارىن جۇرگىزىپ، زاڭدىلىق پەن قۇقىقتىق ءتارتىپتى قامتاماسىز ەتۋ ءۇشىن شارالار قابىلداۋ جونىندە تاپسىرما بەردى. پرەزيدەنت ەلىمىزدە لۋدومانيانىڭ بەلەڭ الۋىنا قارسى باعىتتالعان الەۋمەتتىك داعدىلاردى قالىپتاستىرۋدا قوعامنىڭ، ءدىن قىزمەتكەرلەرىنىڭ جانە بۇقارالىق اقپارات قۇرالدارىنىڭ اتقاراتىن ءرولى ەرەكشە ەكەنىن اتاپ ءوتتى.
سونىمەن قاتار، مەملەكەت باسشىسى ويىن بيزنەسى سالاسىنداعى قارجىلىق جانە باسقا دا قۇقىق بۇزۋشىلىقتاردىڭ الدىن الۋ جۇمىستارىن جانداندىرۋ قاجەت ەكەنىنە نازار اۋداردى.
– بارلىق قارجى قوزعالىسىن قاداعالاپ، زاڭعا قايشى ارەكەت انىقتالعان جاعدايدا ءتيىستى شارالار قابىلداۋ ماڭىزدى، – دەدى پرەزيدەنت.
جيىن بارىسىندا ۇكىمەت مۇشەلەرى مەن ءبىرقاتار مەملەكەتتىك ورگان باسشىلارى بايانداما جاسادى. كەڭەس وتىرىسىنىڭ قورىتىندىسى بويىنشا قاسىم-جومارت توقايەۆ حالىق اراسىنداعى قۇمار ويىنعا تاۋەلدىلىكپەن كۇرەسۋ ءۇشىن زاڭنامالىق، ۇيىمداستىرۋشىلىق جانە اقپاراتتىق-يدەولوگيالىق شارالار كەشەنىن قابىلداۋدى تاپسىردى.