«سيفرلىق تەڭگە» جوباسىنىڭ كونسۋلتاتيۆتىك كەڭەسى قۇرىلدى.
ۇلتتىق بانك پەن تولەم جانە قارجىلىق تەحنولوگيالاردى دامىتۋ ورتالىعى «سيفرلىق تەڭگەنى ەنگىزۋ بويىنشا شەشىم قابىلداۋ مودەلى» بايانداماسىن جاريالادى، دەپ حابارلايدى Almaty-akshamy.kz .
وسى مودەل بويىنشا الىنعان زەرتتەۋ ناتيجەلەرىنىڭ نەگىزىندە 2022 جىلدىڭ سوڭىنا دەيىن قازاقستاندا ورتالىق بانكتىڭ سيفرلىق ۆاليۋتاسىن ەنگىزۋ تۋرالى قورىتىندى شەشىم ازىرلەنەدى.
«سيفرلىق تەڭگەنى ىسكە قوسۋ تۋرالى شەشىم قابىلداۋداعى باسىمدىق تولەم قىزمەتتەرىن تۇتىنۋشىلار ءۇشىن ايقىن ناتيجە بولادى. قۇب پەن تقتدو مودەلى حالىقارالىق ۇيىمدار (دەف، «ۇلكەن جەتىلىك» ءسامميتى، حۆق) ۇسىنعان تالدامالىق قۇرالداردى، سونداي-اق شەتەلدىك رەتتەۋشىلەردىڭ تاسىلدەرىن ەسكەرەدى. مودەلدە، سونداي-اق سيفرلىق تەڭگەنىڭ تەحنولوگيالىق ىسكە اسىرىلۋىن، الەۋەتتى ەكونوميكالىق پايدالار مەن شىعىنداردى، جۇيەنى رەتتەۋ مۇمكىندىكتەرىن، سونداي-اق ەكوجۇيەنى دامىتۋ الەۋەتىن باعالاۋ بويىنشا زەرتتەۋلەر قامتىلعان»، - دەلىنگەن ۇلتتىق بانكتىڭ باسپا ءسوز قىزمەتىنىڭ حابارلاماسىندا.
تالداۋ قۇرالدارى رەتىندە تەحنولوگيالىق ەكسپەريمەنتتەر، ەكونوميكالىق مودەلدەۋ، مۇددەلى تاراپتارمەن ديزاين-سەسسيالار قاراستىرىلعان. 2022 جىلدىڭ 4-توقسانىندا نارىققا قاتىسۋشىلارمەن جانە تۇتىنۋشىلارمەن سيفرلىق تەڭگەنىڭ تەحنولوگيالىق پلاتفورماسىن وتپەلى تەستىلەۋ جوسپارلانعان.
زەرتتەۋ ناتيجەلەرىن وبەكتيۆتى ءتۇسىندىرۋ ماقساتىندا تاۋەلسىز حالىقارالىق ساراپشىلار مەن حالىقارالىق قارجى ۇيىمدارى قىزمەتكەرلەرىنىڭ قاتىسۋىمەن «سيفرلىق تەڭگە» جوباسىنىڭ كونسۋلتاتيۆتىك كەڭەسى قۇرىلدى. قارجى نارىعىنىڭ قاتىسۋشىلارىمەن سيفرلىق تەڭگەنىڭ ەكوجۇيەسىن قۇرۋ دا جوبانى دامىتۋداعى تابىستىلىقتىڭ ماڭىزدى فاكتورى بولىپ تابىلادى. وسى ماقساتتار ءۇشىن كوللابوراتيۆتى الاڭ – Digital Tenge Hub قۇرىلدى، وعان نارىق قاتىسۋشىلارى، ينفراقۇرىلىمدىق ويىنشىلار، حالىقارالىق سەرىكتەستەر قاتىسادى، - دەلىنگەن حابارلامادا.
سيفرلىق تەڭگەنى ەنگىزۋ، ونىڭ ىشىندە وفلاين تولەۋ مۇمكىندىگى ارقىلى تولەم مەن قارجىلىق قىزمەتتەردىڭ قولجەتىمدىلىگىن ارتتىرادى.
سيفرلىق تەڭگە ينفراقۇرىلىمى قارجى نارىعىنا قاتىسۋشىلار مەن مەملەكەتتىك ورگاندار ءۇشىن قوسىمشا قۇرالعا اينالادى، بۇل سمارت-كونتراكت تەحنولوگياسى نەگىزىندە يننوۆاسيالىق قىزمەتتەردى قۇرۋعا مۇمكىندىك بەرەدى. بولاشاقتا سيفرلىق تەڭگەنى ەنگىزۋ ترانسشەكارالىق تولەمدەردىڭ تيىمدىلىگىن دە ەسەلەيدى.
«سيفرلىق تەڭگەنى ەنگىزۋ تۋرالى شەشىم قابىلداۋ مودەلى» بايانداماسىمەن قۇب سايتىنىڭ «سيفرلىق تەڭگە: پيلوتتىق جوبا» بولىمىندە، سونداي-اق، قۇب تولەم جانە قارجىلىق تەحنولوگيالاردى دامىتۋ ورتالىعى payfintech.kz سايتىندا تانىسۋعا بولادى.