الماتىدا تانىسىنىڭ شوتىنداعى اقشاسىن اۋدارىپ العان جىگىت ۇستالدى

سوتقا دەيىنگى تەرگەۋ بارىسىندا كۇدىكتى جابىرلەنۋشىنىڭ تەلەفونىن ۇرلاپ، بانك قوسىمشاسىنا زاڭسىز كىرىپ، اقشانى جىمقىرعانى انىقتالدى.

الماتىدا 23 جاستاعى جىگىت تانىسىنىڭ تەلەفونىن ۇرلاپ، شوتىنان اقشاسىن اۋدارىپ العان، دەپ حابارلايدى Almaty-akshamy.kz Polisia.kz-كە سىلتەمە جاساپ.

«ول گادجەت پەن اقشانى تانىسىنان ۇرلاپ كەتكەن. تاعى ءبىر جولى كۇدىكتى ءوتىپ بارا جاتقان ادامنان قوڭىراۋ شالۋ ءۇشىن تەلەفونىن سۇراپ، ءموبيلدى قوسىمشاسىن اشىپ، اقشاسىن ءوز ەسەپشوتىنا اۋدارىپ العان. جەدەل ىزدەستىرۋ ءىس-شارالارى بارىسىندا جوعارىدا اتالعان ۇرلىقتاردى جاساعان ادام ۇستالدى. ول 23 جاستاعى ح. ەسىمدى ازامات بولىپ شىقتى. قازىرگى ۋاقىتتا كۇدىكتىنىڭ ەكى ەپيزودقا قاتىسى بار ەكەنى دالەلدەندى. وسى دەرەكتەر بويىنشا ق ر قك-نىڭ 188-بابى 3-بولىگىنىڭ 2-تارماعىنا سايكەس قىلمىستىق ءىس قوزعالدى»، – دەيدى اۋەزوۆ اۋداندىق پوليسيا باسقارماسىنىڭ باستىعى ۇلان ءابىلقايىر.

ۇستالعان ازامات ءوز كىناسىن مويىنداپ، اتالعان قىلمىستارعا ءوزىنىڭ قاتىسى بارىن راستادى. وعان «قاماۋ» تۇرىندەگى بۇلتارتپاۋ شاراسى سانكسيالاندى.

«ال ءبىز جاس جىگىتتىڭ قالادا جاسالعان وسىعان ۇقساس باسقا دا قىلمىستارعا قاتىسى بار-جوعىن تەكسەرىپ جاتىرمىز. ءىستىڭ تولىق جانە جان-جاقتى تەرگەۋىن قامتاماسىز ەتۋگە باعىتتالعان ءبىرقاتار تەرگەۋ ارەكەتتەرى جۇرگىزىلۋدە، ناتيجەسىندە قازىرگى قىلمىستىق ءىس سوتقا جولداناتىن بولادى»، – دەدى ۇلان ءابىلقايىر.