قازاقستاندا سيفرلىق تەڭگەنى ەنگىزۋ بويىنشا پيلوتتىق جوبانىڭ ءبىرىنشى كەزەڭى اياقتالدى
ەلىمىزدىڭ ۇلتتىق بانكىنىڭ مالىمەتىنشە، بۇل – قولما-قول جانە تولەم تۇرىندە ەسەپ ايىرىساتىن اقشامەن قاتار جۇرەتىن ءۇشىنشى تولەم ءتۇرى، دەپ حابارلايدى Almaty-akshamy.kz
ساراپشىلار سيفرلىق تەڭگە ءداستۇرلى قارجى ينستيتۋتتارىنىڭ قاتىسۋىنسىز كۇردەلى وپەراسيالاردى جىلدام ورىنداۋعا مۇمكىندىك بەرەتىنىن اتاپ ءوتتى. سونىمەن قاتار ولار ينتەرنەتكە قوسىلۋسىز تولەم جاساي الادى. بۇل – ونىڭ باستى ەرەكشەلىكتەرىنىڭ ءبىرى.
«سيفرلىق تەڭگە» دەپ جاتقانىمىز جاڭالىق ەمەس. قازاقستان ءقازىر ءارتۇرلى نۇسقالاردى قاراستىرۋدا. بۇل – بىر-ەكى جىل بۇرىن باستالعان تاجىريبە. الەمدەگى كوپتەگەن ورتالىق بانك، سونىڭ ىشىندە قىتايدى ايتساق بولادى. بۇگىندە اتالمىش ەل سيفرلىق يۋاندى قولدانۋدا وتە بەلسەندى. بۇل باستامانىڭ بارلىعى الەم كريپتوۆاليۋتالاردىڭ نە ەكەنىن شىنىمەن تاني باستاعاننان بەرى قولعا الىندى. ءبىزدىڭ سيفرلىق تەڭگە جاعدايىندا ونىڭ رەزەرۆتىك كوشىرمەسى تولىعىمەن ۇلتتىق بانكتە بولادى. ياعني بۇل ماسەلەگە جانە ونىڭ جۇمىس ىستەۋىنە ۇلتتىق بانك كەپىلدىك بەرەدى. وسىعان بايلانىستى جوعارى سەنىمدىلىككە يە. سيفرلىق تەڭگەنىڭ وزگەلەردەن ەڭ باستى ايىرماشىلىعى كريپتوۆاليۋتالاردى جاسايتىن پلاتفورماعا ۇقساس جاڭا تەحنولوگياعا نەگىزدەلگەن»، - «Tengenomika» تەلەگرام-كانالىنىڭ اۆتورى، ساراپشى عالىمجان ايتقازين.
ۇلتتىق بانكتىڭ زەرتتەۋىنە سايكەس، سيفرلىق تەڭگەنى پايدالانۋشى سمارتفونداعى سيفرلى ءامياندا ساقتاۋعا بولادى.
«بارلىق سيفرلىق ءاميان قازاقستاننىڭ ورتالىق بانكىندە، ياعني ۇلتتىق بانكتە ساقتالادى. سونىمەن قاتار بارلىق ترانزاكسيا ۇلتتىق بانكتە جۇزەگە اسىرىلادى. ياعني بانكتەر ءوزارا اقپارات الماسا المايدى. اقپارات تەك ورتالىق بانكتىڭ ىشىندە جۇرگىزىلەدى. بۇل – بازالىق ەرەكشەلىكتىڭ ءبىر ءتۇرى. تەوريالىق تۇرعىدا، ەگەر قانداي دا ءبىر الاياقتىق ترانزاكسيالار جاسالسا، ونى تەز زەرتتەۋگە مۇمكىندىك بار»، - قازاقستان قارجىگەرلەرى قاۋىمداستىعىنىڭ قارجىلىق تەحنولوگيالار سەكتورىنىڭ ديرەكتورى كونستانتين پاك.
ەاەو اۋماعىندا سيفرلىق ۆاليۋتالاردى دامىتۋدىڭ ماڭىزدىلىعىن ەۋرازيالىق دامۋ بانكىنىڭ ساراپشىلارى اتاپ وتۋدە. ولاردى جۇزەگە اسىرۋ ترانسشەكارالىق تولەمدەردى جۇزەگە اسىرۋ شىعىندارىن ازايتىپ، ەۋرازيالىق وداق ايماعىنداعى ءوزارا ساۋدانى ىنتالاندىرادى.
«سيفرلىق تەڭگە نەگىزىنەن بارلىق سيفرلىق ۆاليۋتاعا ءتان ارتىقشىلىقتاردى الادى دەپ ايتا الامىز. كوممەرسيالىق بانكتەر ورتالىق بانك پەن كليەنت اراسىنداعى ۇردىستەن شەتتەتىلەتىندىكتەن، كاسىپورىندار تولەم ترانزاكسيالارىن جۇزەگە اسىرۋدا جىلدامىراق بولادى، شىعىندار ازايادى، ال مەملەكەت سمارت-كەلىسىمشارت تەحنولوگياسىنىڭ ارقاسىندا بيۋدجەت شىعىستارىنىڭ باعىتىن باقىلاي الادى»، - ەۋرازيالىق دامۋ بانكى ينتەگراسيالىق زەرتتەۋ ورتالىعىنىڭ باسشىسى انتون مالاحوۆ.
سونىمەن قاتار ساراپشىلار بۇل تولەم قۇرالىنىڭ ىقتيمال تاۋەكەلدەرى تۋرالى ۇمىتپاۋ كەرەك ەكەنىن اتاپ ءوتتى. ۇلتتىق بانك سيفرلىق تەڭگەنىڭ اقشا-نەسيە ساياساتىنا قالاي اسەر ەتەتىنىن زەرتتەپ جاتىر. ونى جۇزەگە اسىرۋ تۋرالى تۇپكىلىكتى شەشىم 2022 جىلدىڭ سوڭىندا جان-جاقتى زەرتتەلگەننەن كەيىن قابىلدانادى.