ولجاس بەكتەنوۆ وتاندىق وندىرۋشىلەردى قولداۋ شارالارىن كۇشەيتۋ جونىندە كەڭەس وتكىزدى
پرەمەر-مينيستر ولجاس بەكتەنوۆ مەملەكەت باسشىسىنىڭ تاپسىرماسى بويىنشا وتاندىق كاسىپكەرلەرگە ارنالعان مەملەكەتتىك قولداۋ شارالارىنىڭ اشىقتىعى مەن تيىمدىلىگىن ارتتىرۋ ماسەلەسىن تالقىلاۋ ماقساتىندا جۇمىس كەڭەسىن وتكىزدى.
نەگىزگى ماقسات — مەملەكەتتىك ساتىپ الۋلار مەن قولداۋ شارالارىنا باسىم قولجەتىمدىلىك الاتىن كاسىپورىنداردى ساناتتارعا ءبولۋ ادىستەمەسىن سيفرلاندىرۋ. بۇل مەملەكەتتىك قولداۋ العان كاسىپورىنداردىڭ مىندەتتەمەلەرىن ناقتىلاۋعا مۇمكىندىك بەرەدى. سونداي-اق ءونىمنىڭ ساپاسى، ءوندىرىستى لوكاليزاسيالاۋ، قازاقستاندىق قامتۋ ۇلەسى مەن كاسىپورىننىڭ ايماق پەن ەل ەكونوميكاسىنا قوسقان ۇلەسى ەسكەرىلەدى. سيفرلىق فورمات جەمقورلىق تاۋەكەلدەرىن تومەندەتىپ، ادامي فاكتوردىڭ اسەرىن جويادى.
قازىرگى تاڭدا ۇكىمەت مەملەكەتتىك قولداۋ شارالارىنىڭ ونەركاسىپ سالاسىن دامىتۋعا اسەرىن كەڭ كولەمدە تالداپ جاتىر. جاڭا اقپاراتتىق پلاتفورما كاسىپكەرلىك بەلسەندىلىكتى قولداۋ شارالارىن العانعا دەيىنگى جانە كەيىنگى ديناميكادا كورسەتەدى.
پلاتفورمادا وتاندىق كاسىپورىندار تۋرالى مالىمەتتەر، وندىرىستىك جۇكتەمەلەرى، ءونىم تۇرلەرى، سىرتقى ساۋدا قىزمەتى، قىزمەتكەرلەر سانى، سونداي-اق ۇزاق مەرزىمدى كەلىسىمشارتتار تۋرالى اقپارات ساقتالادى. بۇل جۇيە مەملەكەتتىك ورگاندارعا پرواكتيۆتى تۇردە مونيتورينگ جۇرگىزۋگە، تالداۋ جاساۋعا جانە بيزنەسكە قولداۋ كورسەتۋ ءۇشىن شەشىم قابىلداۋعا كومەكتەسەدى.
ونەركاسىپ جانە قۇرىلىس ءمينيسترى قانات شارلاپايەۆ پلاتفورمانىڭ 2 مىڭنان استام كاسىپورىننىڭ دەرەكتەر بازاسىن قامتيتىنىن، سونداي-اق رەتتەلەتىن ساتىپ الۋلار سۋبەكتىلەرىنىڭ مالىمەتتەرىن قامتيتىنىن حابارلادى. بۇل بازا جەر قويناۋىن پايدالانۋشىلار مەن بيزنەس اراسىنداعى ۇزاق مەرزىمدى شارتتار تۋرالى اقپاراتپەن تولىقتىرىلعان.
Smart Data Ukimet نەگىزىندە قۇرىلعان بۇل پلاتفورما ءارتۇرلى اقپاراتتىق جۇيەلەردەن الىنعان مالىمەتتەردى بىرىكتىرىپ، جۇيەلەۋدى قامتاماسىز ەتەدى. ول قارجى، ەڭبەك جانە الەۋمەتتىك قورعاۋ مينيسترلىكتەرىنىڭ، سك-فارماسيا، «سامۇرىق-قازىنا كەلىسىمشارت»، Mitwork جانە NadLock جۇيەلەرىمەن تولىق ينتەگراسيالانعان. سونىمەن قاتار «دامۋ» كاسىپكەرلىكتى دامىتۋ قورى مەن «بايتەرەك» حولدينگىنىڭ قولداۋ شارالارى تۋرالى مالىمەتتەر جۇكتەلگەن. اقپارات اۆتوماتتى تۇردە جاڭارتىلىپ وتىرادى.
سيفرلىق دامۋ، يننوۆاسيالار جانە اەروعارىش ونەركاسىبى، دەنساۋلىق ساقتاۋ جانە قارجى مينيسترلىكتەرىنىڭ وكىلدەرى پلاتفورمانى تولتىرۋ جانە قولدانۋ بويىنشا اتقارىلعان جۇمىستاردى باياندادى.