اباي ۋنيۆەرسيتەتى وقىتۋشىلارى «الماتىكىتاپ» باسپاسىنىڭ وقۋلىقتارىن سيفرلاندىرۋدا.
مەملەكەت باسشىسى ق.توقايەۆتىڭ 28 قىركۇيەكتەگى رەفورمالار جونىندەگى وتىرىسىندا بالالاردىڭ وقۋلىققا تولى سومكەلەرى دەنساۋلىققا زيان كەلتىرەتىنى جايلى ايتىلعان بولاتىن. وقۋ-اعارتۋ ءمينيسترى ا.ايماعانبەتوۆ ماسەلەلەردى شەشۋگە باعىتتالعان مىندەتتەردى بايانداپ، سيفرلىق وقۋلىققا كەزەڭ-كەزەڭمەن كوشۋ جۇرگىزىلەتىندىگىن ايتتى. وسى ورايدا، «الماتىكىتاپ باسپاسى «TopIQ.kz» تۇڭعىش وتاندىق ەلەكتروندىق وقۋلىقتار پلاتفورماسىن ۇسىنىپ وتىر، دەپ حابارلايدى Almaty-akshamy.kz
اباي اتىنداعى قازاق ۇلتتىق پەداگوگيكالىق ۋنيۆەرسيتەتى، ينفورماتيكا جانە ءبىلىمدى اقپاراتتاندىرۋ كافەدراسىنىڭ وقىتۋشىلارى تۇراشوۆا ش.پ. جانە ناۋرىزبايەۆ د.ب. «الماتىكىتاپ» باسپاسىنىڭ سيفرلاندىرۋ بولىمىندە وقۋلىقتاردى سيفرلاندىرۋ بويىنشا فريلانسەر قىزمەتىن اتقارۋدا.
بۇگىنگى كۇنى سيفرلاندىرۋشى وقىتۋشىلارىمىز شامامەن 20-دان استام وقۋلىقتاردى سيفرلاندىرۋ ۇدەرىسىنە قاتىستى. اتاپ ايتقاندا، «ينفورماتيكا» (5-6-سىنىپ)، «سيفرلىق ساۋاتتىلىق» (4-سىنىپ)، «فيزيكا» (7-سىنىپ)، «ماتەماتيكا» (6-سىنىپ)، «گەومەتريا» (7-سىنىپ)، «جاراتىلىستانۋ» (3 سىنىپ)، جانە ت.ب. جالپى ءبىلىم بەرۋ مەكتەپتەرىنە ارنالعان باسپا وقۋلىقتارىنىڭ سيفرلىق نۇسقاسىن جاساۋدا «الماتىكىتاپ باسپاسىنىڭ» سيفرلىق كونتەنت دەپارتامەنتىڭ قىزمەتكەرلەرى جانە وقۋلىقتاردىڭ اۆتورلارىمەن بىرلەسە وتىرىپ جۇمىس جاساۋدا. وقۋلىقتار https://topiq.kz/ru پلاتفورماسىنا قازاق، ورىس، اعىلشىن تىلدەرىندە جۇكتەلگەن.
قازىرگى تاڭدا وقۋشىلار مەن مۇعالىمدەر پلاتفورمادا ورنالاسقان ەلەكتروندىق وقۋلىقتاردى، وقۋلىقتاعى ينتەراكتيۆتى تاپسىرمالاردى ساباق ۋاقىتىندا قولدانىپ، ونىڭ تيىمدىلىگى مەن زامان سۇرانىسىنا ساي ازىرلەنگەنىن اتاپ وتۋدە.
اباي ۋنيۆەرسيتەتى مەن «الماتىكىتاپ» باسپاسى اراسىنداعى ءبىلىم سالاسىن سيفرلاندىرۋ بويىنشا جۇمىستار ءارى قارايدا جالعاسىن تابادى جانە ناتيجەلى بولادى دەپ سەنەمىز.
