ەلوردادا ق ر ىشكى ىستەر مينيسترلىگى مەن Sergek Group كومپانياسىنىڭ ۇيىمداستىرۋىمەن «جول قاۋىپسىزدىگى سالاسىنداعى سيفرلاندىرۋ جانە جاڭا تەحنولوگيالار» تاقىرىبىندا فورۋم ءوتتى، – دەپ حابارلايدى Almaty-akshamy.kz.
Polisia.kz سايتىنىڭ مالىمەتى بويىنشا فورۋمنىڭ اشىلۋ سالتاناتىندا ءمينيستردىڭ ورىنباسارى يگور لەپەحا جول قاۋىپسىزدىگىن قامتاماسىز ەتۋ جانە ونى ءتيىمدى ۇيىمداستىرۋ باعىتىندا سيفرلىق تەحنولوگيالاردى قولدانۋدىڭ ماڭىزدىلىعىنا توقتالدى.
– وزدەرىڭىزگە بەلگىلى، ءبىز پوليسيا قىزمەتكەرلەرىنە كولىكتەردى سەبەپسىز توقتاتۋعا تيىم سالدىق. قازىرگى ۋاقىتتا تەك جول ءجۇرىسى قاعيدالارى بۇزىلعان جاعدايدا عانا توقتاتامىز. سوندىقتان دا جول ءجۇرىسى قاعيدالارىن ساقتاۋدى باقىلاۋدا سيفرلاندىرۋدىڭ ماڭىزى زور دەپ ويلايمىن، – دەدى يگور لەپەحا.
بۇگىندە ىشكى ىستەر مينيسترلىگى جول قاۋىپسىزدىگىن قامتاماسىز ەتۋ، جولدارداعى ءولىم-جىتىم دەڭگەيىن تومەندەتۋ ماقساتىندا زاماناۋي سيفرلىق شەشىمدەردى، اۆتوماتتى ستاسيونارلىق جانە ءموبيلدى كامەرالاردى پايدالانۋ بويىنشا اۋقىمدى جۇمىستار جۇرگىزىپ جاتىر. سونىڭ ناتيجەسىندە جول-كولىك وقيعالارى 11%-عا، جاراقات العانداردىڭ سانى 7%-عا، ال قازا تاپقان جاياۋ جۇرگىنشىلەردىڭ سانى 24%-عا ازايىپ وتىر. سونداي-اق كولىك جۇرگىزۋشىلەر تاراپىنان جول ءجۇرىسى قاعيدالارىن ورەسكەل بۇزۋ، ءقاۋىپتى جۇرگىزۋشىلەر مەن جالعان مەملەكەتتىك تىركەۋ نومىرلەرىن انىقتاۋ بويىنشا ەنگىزىلگەن “قورعاۋ” جۇيەسى دە ءوز جەمىسىن كورسەتىپ جاتىر.
– ءمينيستردىڭ تاپسىرماسىنا سايكەس ءبىز «قورعاۋ» جۇيەسىن شىمكەنت قالاسىندا ىسكە قوستىق. بۇل قوسىمشا ستاسيونارلىق كامەرالار ارقىلى ءقاۋىپتى جۇرگىزۋشىلەردى انىقتاپ، پاترۋلدىك پوليسيا قىزمەتكەرىنىڭ قىزمەتتىك پلانشەتىنە جىبەرىپ وتىرادى. وسىنىڭ نەگىزىندە جالعان مەملەكەتتىك نومىرلەردى پايدالانۋ ارقىلى جاۋاپكەرشىلىكتەن جالتارىپ جۇرگەن جۇرگىزۋشىلەردى دە انىقتادىق، – دەدى ق ر ءىىم اكىمشىلىك پوليسيا كوميتەتى ءتوراعاسىنىڭ ورىنباسارى سەرىك ءتۇسىپوۆ.
فورۋمعا قاتىسۋشىلار ىشكى ىستەر ورگاندارىنىڭ جۇمىسىن جەتىلدىرۋ ماقساتىندا «سيفرلىق پوليسەي» جوباسىن، سمارتبەينەجەتونداردىڭ ءتيىمدىلىن، سونداي-اق جەدەل باسقارۋ ورتالىعىنىڭ جاڭا باعدارلاماسىن باسقارۋ ءۇشىن سيفرلىق تەحنولوگيالاردى پايدالانۋ ماسەلەسىن تالقىلادى. جيىن سوڭىندا ىشكى ىستەر ءمينيسترىنىڭ ورىنباسارى ساكەن سارسەنوۆ قىلمىستاردىڭ جولىن كەسۋ، انىقتاۋ جانە اشۋ كەزىندەگى جەدەلدىك سيفرلاندىرۋدىڭ ارتىقشىلىعى ەكەنىن اتاپ ءوتىپ، فورۋمعا قاتىسۋشىلارعا العىسىن ءبىلدىردى.