الماتى مەملەكەتتىك قۋىرشاق تەاترى 1 ماۋسىم – حالىقارالىق بالالاردى قورعاۋ كۇنىنە وراي «باقىتتى بالالىق شاق» ويىن-ساۋىقتىق مەرەكەلىك باعدارلاماسىن، جۋىردا عانا تۇساۋى كەسىلگەن «ەستە ساقتا، بالاقاي!» اقپاراتتىق-تانىمدىق قويىمىنىڭ كورسەتىلىمىن قالامىزداعى مۇمكىندىگى شەكتەۋشى، از قامتىلعان، مۇگەدەك جانە كوپ بالالى وتباسىلاردىڭ بۇلدىرشىندەرىنە ۇسىنباق. سونىمەن قاتار، ونلاين فورماتتا ۇيىمداستىرىلعان «مەن باقىتتى بالامىن!» كوركەم سۋرەت بايقاۋىنىڭ جەڭىمپازدارىن العىس حاتتارمەن جانە ەستەلىك سىيلىقتارمەن ماراپاتتاۋ جوسپارلانۋدا.
«باقىتتى بالالىق شاق» ويىن-ساۋىقتىق مەرەكەلىك باعدارلاماسى:
اۋەزدى ءان مەن كوڭىلدى بي، تانىمدىق ويىندارعا قۇرىلعان زاماناۋي باعىتتاعى ويىن-ساۋىقتىق باعدارلاما بۇلدىرشىندەردى تاڭعاجايىپ ەرتەگىلەر الەمىنە جەتەلەيدى. باعدارلاما بارىسىندا بالالاردىڭ سۇيىكتى كەيىپكەرلەرى لول، كيسي-ميسي، حاگي-ۆاگي، تيمون جانە پۋمبا، ميككي ماۋس، دونالد داك، ماشا مەن ايۋ، مينوندار جانە الدار كوسە مەن شىق بەرمەس شىعايباي سىندى بويلى قۋىرشاقتار سان الۋان توسىنسىيلارىن ۇسىنادى. ۇمىتىلماس مەرەكەنى بىزبەن بىرگە كوڭىلدى وتكىزىڭىز، ءقادىرلى كورەرمەن!
«ەستە ساقتا، بالاقاي!» سپەكتاكلى:
قوعام ومىرىندە ماڭىزدى ورىن الاتىن، ءاربىر ادام بىلۋگە جانە ۇستانۋعا ءتيىس سالاۋاتتى ءومىر سالتى، دۇرىس تاماقتانۋ، ءورت قاۋىپسىزدىگى جانە جول ءجۇرۋ ەرەجەلەرىن قانشالىقتى جەتىك بىلەمىز؟! كۇندەلىكتى ومىردە وسى ەرەجەلەردى قاتاڭ ساقتاپ ءجۇرمىز بە؟! بۇلدىرشىندەر قىزىعۋشىلىعىنا ساي ينتەراكتيۆتى باعىتتا ساحنالانعان «ەستە ساقتا، بالاقاي!» اقپاراتتىق-تانىمدىق قويىلىمى وسى ساۋالدارعا جاۋاپ ىزدەيدى. استارى تەرەڭ تاربيەگە يە جاۋاپكەرشىلىككە، تازالىققا، جان-جاقتىلىققا، كىشىپەيىلدىلىككە شاقىراتىن قويىلىم كورەرمەندەردى بەيجاي قالدىرماسى انىق.
وتەتىن كۇنى: 1 ماۋسىم، 2023ج.،
وتەتىن ۋاقىتى: 14:00 (مەرەكەلىك باعدارلاما)، 15:00 (قويىلىم كورسەتىلىمى)
وتەتىن ورنى: مەملەكەتتىك قۋىرشاق تەاترى، پۋشكين كوشەسى 63.
ءىس-شارا ۇزاقتىعى: 1 ساعات، 30 مينۋت.
بايلانىس نومىرلەرى: 8 727 222 20 10، 8 777 128 94 18