كۇن تارتىبىندەگى ەڭ وزەكتى ماسەلەلەردى تالقىلاندى.
14 شىلدە كۇنى تاجىكستان رەسپۋبليكاسىنىڭ توراعالىعىمەن وتكەن شانحاي ىنتىماقتاستىق ۇيىمىنا مۇشە مەملەكەتتەردىڭ سىرتقى ىستەر مينيسترلەرى كەڭەسىنىڭ (شىۇ سىمك) كەزەكتى وتىرىسى ءوتتى، دەپ حابارلايدى Almaty-akshamy.kz.
اتالمىش شاراعا قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى قاتىستى.
وتىرىس الدىندا شىۇ ەلدەرىنىڭ سىرتقى ىستەر مينيسترلەرىن تاجىكستان رەسپۋبليكاسىنىڭ پرەزيدەنتى ەمومالي راحمون قابىلدادى.
«سىمك بارىسىندا شىۇ ەلدەرىنىڭ سىرتقى ساياسي ۆەدومستۆولارىنىڭ باسشىلارى ۇيىمنىڭ 20 جىل ىشىندەگى قىزمەتىن قورىتىندىلاپ، حالىقارالىق جانە وڭىرلىك كۇن تارتىبىندەگى ەڭ وزەكتى ماسەلەلەردى تالقىلادى. شىۇ قىزمەتىن ودان ءارى دامىتۋدىڭ ءبىرىنشى كەزەكتەگى مىندەتتەرى جانە ۇيىمنىڭ باسقا دا كوپجاقتى قۇرىلىمدارمەن ءوزارا ءىس-قيمىل جاساۋ ماسەلەلەرى قارالدى»،– دەلىنگەن قازاقستاننىڭ سىرتقى ىستەر مينيسترلىگىنىڭ باسپا ءسوز قىزمەتىنىڭ حابارلاماسىندا.
ءوز سوزىندە مينيستر مۇحتار تىلەۋبەردى شىۇ-نىڭ حالىقارالىق قاۋىپسىزدىك پەن وڭىرلىك ىنتىماقتاستىقتى نىعايتۋداعى ءرولى مەن ماڭىزىن اتاپ ءوتتى.
«ۇيىمنىڭ باسقا مۇشەلەرىمەن بىرگە قازاقستان ۇيىمنىڭ زور الەۋەتىن تولىققاندى ىسكە اسىرۋعا ءوزىنىڭ تۇراقتى تۇردە لايىقتى ۇلەسىن قوسۋعا ۇمتىلۋدا»، - دەدى قازاقستان ءسىم باسشىسى.
ءۇندىستان، قازاقستان، جۇڭگو، قىرعىزستان، پاكىستان، رەسەي، تاجىكستان جانە وزبەكستان سىرتقى ىستەر مينيسترلەرى 2021 جىلعى قىركۇيەكتە دۋشانبەدە وتەتىن شىۇ-عا مۇشە مەملەكەتتەر باسشىلارى كەڭەسىنىڭ وتىرىسىنا دايىندىق بارىسىن ماقۇلداپ، سونداي-اق دۋشانبە دەكلاراسياسى جانە مەرەيتويلىق ءسامميتتىڭ باسقا دا قورىتىندى شەشىمدەرىنىڭ جوبالارىن بەكىتتى.
وتىرىس قورىتىندىسى بويىنشا شىۇ سىرتقى ىستەر مينيسترلەرىنىڭ اقپاراتتىق حابارلاماسى قابىلداندى.
سول كۇنى سىرتقى ىستەر مينيسترلەرى دەڭگەيىندە «شىۇ – اۋعانستان» بايلانىس توبىنىڭ وتىرىسى ءوتتى، ونىڭ بارىسىندا قاتىسۋشىلار اير-داعى اعىمداعى اسكەري-ساياسي جاعدايدى جانە شىۇ-نىڭ اۋعانستانمەن ودان ءارى ىنتىماقتاستىق ماسەلەلەرىن تالقىلادى. شىۇ بايلانىس توبىنىڭ اۋعانستانمەن كەزدەسۋ قورىتىندىسى بويىنشا شىۇ مۇشە مەملەكەتتەرى سىرتقى ىستەر مينيسترلەرىنىڭ بىرلەسكەن مالىمدەمەسى قابىلداندى.
ءىس-شارا اياسىندا مۇحتار تىلەۋبەردى پاكىستان سىرتقى ىستەر ءمينيسترى ماحمۋد كۋرەشيمەن ەكىجاقتى كەلىسسوزدەر جۇرگىزدى. تاراپتار ەكىجاقتى ىنتىماقتاستىق پەن وڭىرلىك ىنتىماقتاستىقتى نىعايتۋ ماسەلەلەرىن تالقىلادى.
