شىرشا – شاھاردىڭ ءسانى

الماتى قالاسى جاسىل شىرشامەن بەزەندىرىلدى. 

جاڭا جىل قارساڭىندا قالانىڭ ءار جەرىندە اسەم ەتىپ بەزەندىرىلگەن شىرشالار شاھار جۇرتشىلىعىنا مەرەكەلىك كوڭىل كۇي سىيلادى، دەپ حابارلايدى aqshamnews.kz.

شىرشا – قالا شىرايىن اشادى

قىستاۋباي قازاقبايەۆ،
زەينەتكەر:

 – وزدەرىڭىز بىلەتىندەي، الاتاۋدىڭ بوكتەرىندە ارشا، شىرشا اعاشى كوپ وسەدى. قىسى-جازى جاپ جاسىل بولىپ، وتتەگى بولەدى. سونىسىمەن دە بۇل اعاشتىڭ ماڭىزى زور.
قالامىزدىڭ ءار جەرىندە قويىلىپ جاتقان شىرشا جاڭا جىلعا، سونىڭ ىشىندە الماتىلىقتارعا ارنالعان تارتۋ دەپ ۇعامىز.
الماتىدا تۇرىپ كەلە جاتقانىمىزعا 40 جىلدان استى. ارينە جاڭا جىلدى تويلاۋ، مەرەكەگە دايىندالۋ، اياز اتا مەن اقشاقار بەينەسى ابدەن ساناعا ءسىڭىپ كەتتى.  وتباسىمىزبەن اۋدانىمىزداعى شىرشاعا كەلىپ سۋرەتكە ءتۇسىپ، ەستەلىك جاساۋدى ادەتكە اينالدىرعانبىز. ايتارىم، ءار اتقان تاڭىمىز بەرەكەلى، كۇنىمىز ءساتتى ءوتسىن دەمەكپىز.

ءبارى ەل يگىلىگى ءۇشىن

دارحان قارابايەۆ،
شىرشا ارلەۋشى:

– بىزدەر ناتاليا ساس اتىنداعى تەاتر الدىندا شىرشا قۇردىق. كوپتەگەن جارىق شامدار، ءتۇرلى ويىنشىق بەزەندىرۋلەر ارقىلى ارلەپ قويدىق. 
بۇل – حالىقتىڭ يگىلىگى ءۇشىن جاسالىپ جاتقان دۇنيە. 
2025 جىل - جىلان جىلىن جاقسى كوڭىل-كۇيمەن قارسى الۋىمىز كەرەك. سول ءۇشىن شىرشا قۇرىپ، ەل-جۇرتقا جاقسى كوڭىل-كۇي سىيلاۋ قاجەت.

شىرشا – شاھاردىڭ ءسانى

ەركەبۇلان سوۆەتحان ۇلى،
شىرشا قۇراستىرۋشى:

ۇلتتىق كىتاپحانا الدىنا شىرشا قۇردىق. بۇل شىرشا «گيرلاندى» جارىق شامدارىمەن ارلەنگەن. شىرشانىڭ بيىكتىگى شامامەن مولشەرلەپ العاندا 8 مەتردى قۇرايدى. 
اتالعان شىرشا قالامىزدىڭ ورتاسىندا ورنالاسقان. ءارتۇرلى قالا قوناقتارى مەن تۇرعىندارىنا نەگىزدەلىپ جاسالدى. بۇعان كەلىپ فوتو-سۋرەتتەرگە ءتۇسىپ، شات-شادىمان كۇيگە بولەنۋگە بولادى.
ەڭ اۋەلى قازاق ەلىنىڭ ەگەمەندىك مەرەكەسى قۇتتى بولسىن! الدىمىزدا اتتاعالى تۇرعان جاڭا جىل تەك جاقسىلىعىمەن كەلسىن.

شىرشا – جاڭا جىلدىڭ شىرايى

قالدىعايشا قۇرمانالييەۆا،
قالا تۇرعىنى:

– الماتى ەڭ اسەم شاھار. مۇندا كەلۋگە ءبارى قۇشتار. مۇنارلى الاتاۋدىڭ شىڭدارىن قار باستى. بيىل ەرەكشە قار جاۋىپ تۇر. ناعىز قىستىڭ بەلگىسىن بىلدىرەدى. ال جاڭا جىل مەرەكەسىنىڭ جاقىنداپ قالعانىن شىرشا تىگىلگەننەن بىلەمىز. 
شىرشا – ادامزات بالاسىنا شابىت، جاڭا جىلدىق كوڭىل-كۇي سىيلايدى. سوندىقتان قالادا شىرشا قۇرىلىپ، بەزەندىرىلگەنى قۋانتادى. "شۇعىلا" مولتەك اۋدانىندا جاڭا جىلدىق شىرشا بەزەندىرىلىپ، حالىققا جاقسى اسەر بەرىپ تۇر.
الداعى جىل بارىمىزگە قۇت-بەرەكەسىن الا كەلسىن!

«حالىق ارەنا» الاڭىندا شىرشا ورناتىلدى

داۋلەت دۇيسەنقۇلوۆ،
مەردىگەر:

اتالعان شىرشا قاجەتتى ارلەۋشى اسپالى ويىنشىقتار، سارعىش تۇستەس جارىق شامدارمەن كومكەرىلگەن.   بۇل جاڭا جىلدىق شىرشانىڭ بيىكتىگى – 21، 5 مەتردى قۇرايدى.
ءبىزدىڭ جىگىتتەر 2-3 كۇن بويى بار كۇش-جىگەرىن، بويىنداعى ونەرىن قولدانىپ، جۇمىس ىستەدى.
قالا تۇرعىندارىن الدىمىزعى جاڭا 2025 جىلمەن قۇتتىقتايمىز!

جاڭا جىل سيمۆولى – شىرشا

داۋرەن كۇمىسبايەۆ،
تۇركسىب اۋدانىنىڭ تۇرعىنى:

بالا-شاعامدى الىپ كەلىپ، جاڭا جىلدىق كوڭىل-كۇيدى سەزىنىپ قايتىپ ءجۇرمىز. اۋدانىمىزدا ورتالىق شىرشا ورناتىلعانى قۋانتادى.
كەز كەلگەن ادام ءۇشىن شىرشا جاڭا جىلدىڭ سيمۆولى دەپ تۇسىنەمىز.
شىرشانىڭ جانىندا شاعىن مۇز ايدىنى حالىققا قىزمەت ەتىپ، ادەمى ۇيلەسىم بەرىپ تۇر. بالالار ويناپ، سىرعاناپ ماز-مەيرام بولادى.
ەلىمىز تىنىش، جۇرتىمىز امان بولسىن!