ارنايى قۇرىلعان كوميسسيا شىمكەنت قالاسىنداعى جارىلىس شىعىنىن ەسەپتەپ جاتىر. وقيعادان كوپقاباتتى ءۇي، كولىكتەر عانا ەمەس، وبلىستىق پەريناتالدىق ورتالىقتىڭ عيماراتى مەن قىمبات مەديسينالىق قۇرال-جابدىقتار زارداپ شەككەنى بەلگىلى، دەپ حابارلايدى Almaty-akshamy.kz Inform.kz-كە سىلتەمە جاساپ.
توتەنشە جاعداي ورىن العان جەردىڭ جانىندا ءبىرىنشى قاباتتا جانساقتاۋ ءبولىمى ورنالاسقان. وندا شالا تۋعان نارەستەلەر جاتقان ەدى. ۇشەمنىڭ ءبىرى قايتىس بولدى. بريفينگتە قوعامدىق دەنساۋلىق ساقتاۋ باسقارماسىنىڭ باسشىسى مارات ءپاشىموۆ ولاردىڭ اناسىنىڭ قايعىلى وقيعادان بىرنەشە ساعات بۇرىن تاعى ءبىر بالاسىنان ايىرىلعانىن مالىمدەدى. جەرگىلىكتى اكىمدىك قازا تاپقان ءۇش ادامنىڭ وتباسىنا ماتەريالدىق كومەك كورسەتەدى.
قازا بولعاندار اراسىندا پەرزەنتحانانىڭ كۇزەتشىسى مەن بريگادا قۇرامىندا كۇردەلى جوندەۋ جۇمىستارىن جۇرگىزىپ جاتقان قۇرىلىس كومپانياسىنىڭ قىزمەتكەرى دە بار. ءقازىر دارىگەرلەر اپات سالدارىنان زارداپ شەككەندەردىڭ ءومىرى ءۇشىن كۇرەسىپ جاتىر. ولاردىڭ اراسىندا پەريناتالدىق ورتالىق قىزمەتكەرلەرى: سانيتارلار، مەدبيكە جانە پەرزەنتحاناعا ينتەرنەت ورناتۋعا كەلگەن تاعى ءبىر ەر ادام بار. ناۋقاستاردىڭ جاعدايى ەرەكشە باقىلاۋعا الىندى.
بۇگىندە №1 وبلىستىق پەريناتالدىق ورتالىقتىڭ پاسيەنتتەرى №2 وبلىستىق پەريناتالدىق ورتالىقتىڭ عيماراتىنا، شىمكەنت قالاسىنىڭ №1، 2 قالالىق اۋرۋحانالارىنا، قالالىق پەريناتالدىق ورتالىققا جانە وبلىستىق بالالار اۋرۋحاناسىنا كوشىرىلدى. ولار دارىگەرلەر مەن پسيحولوگتاردىڭ تۇراقتى باقىلاۋىندا تۇرعانىن كەشە وڭىردە وتكەن باسپا ءسوز كونفەرەنسياسىندا دسم انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا ەمبەرگەنوۆا حابارلادى.
«تۇركىستان وبلىسى قوعامدىق دەنساۋلىق باسقارماسىنىڭ باستىعى مارات پاشيموۆپەن جانە مەديسينالىق ۇيىمداردىڭ ءبىرىنشى باسشىلارىمەن بىرلەسىپ، جارىلىس كەزىندە زارداپ شەككەندەر جاتقىزىلعان كلينيكالاردى ارالاپ شىقتىق. ەكى پاسيەنتتىڭ جاعدايى تۇراقتى، ورتاشا اۋىر جاعدايدا 7 پاسيەنت بار، قاجەتتى بەيىندى مەديسينالىق كومەك تولىق كولەمدە كورسەتىلدى. ناۋقاستارمەن اڭگىمە جۇرگىزىلدى، كورسەتىلەتىن مەديسينالىق كومەكتىڭ ساپاسىنا پاسيەنتتەر قاناعاتتاندى»، - دەپ حابارلادى مينيسترلىك وكىلى.
ايتا كەتەيىك، بۇعان دەيىن شىمكەنتتەگى پەريناتالدىق ورتالىقتىڭ قاسىنداعى ءدارى ساقتايتىن ەكى قاباتتى عيماراتتا جارىلىس بولعانىن حابارلادىق. پەرزەنتحانا عيماراتى مەن تۇرعىن ۇيگە زاقىم كەلىپ، ونداعى ادامدار ءقاۋىپسىز جەرگە كوشىرىلگەن ەدى. شىمكەنتتەگى جارىلىستان كۇزەتشىمەن قوسا ءبىر نارەستە شەتىنەگەنى ءمالىم بولدى. كەيىنىرەك جارىلىستان ءۇشىنشى ادامنىڭ قايتىس بولعانى حابارلاندى.