ايەل ءوز اتىنان وزگە بىرەۋدىڭ نەسيە العانىن ءبىلىپ، جەدەل تۇردە پوليسياعا جۇگىنگەن
شىمكەنتتە ءۇي يەسى بالا كۇتۋشىنىڭ اڭعالدىعىن پايدالانىپ، اتىنان نەسيە راسىمدەگەن، دەپ حابارلايدى Almaty-akshamy.kz Polisia.kz-كە سىلتەمە جاساپ.
شىمكەنتتەگى اباي اۋدانىنىڭ پوليسيا باسقارماسىنا تۇركىستان وبلىسىنىڭ 57 جاستاعى تۇرعىنى ارىزدانعان. ونىڭ ايتۋىنشا، 2022 جىلى شىلدە ايىندا شىمكەنتتە اۋقاتتى تۇراتىن وتباسىندا بالا كۇتۋشىسى بولىپ قىزمەت ەتكەن. سول كەزدە اتالعان جانۇيانىڭ مۇشەسى جاسىرىن تۇردە ونىڭ تەلەفونىن الىپ، بانك قوسىمشاسى ارقىلى 1 ملن تەڭگە كولەمىندە زاڭسىز نەسيە راسىمدەگەن. ايەل ءوز اتىنان وزگە بىرەۋدىڭ نەسيە العانىن ءبىلىپ، جەدەل تۇردە پوليسياعا جۇگىنگەن.
"ءتارتىپ ساقشىلارى اتالعان جايتتى ق ر قك-نىڭ 190-بابىمەن (الاياقتىق) تىركەپ، جەدەل ىزدەستىرۋ شارالارىنا كىرىستى. كريمينالدىق پوليسيا ءبولىمىنىڭ قىزمەتكەرلەرى جۇرگىزگەن جەدەل-ىزدەستىرۋ جۇمىستارى ناتيجەسىندە كۇدىكتى ءبىر تاۋلىك ىشىندە قالا اۋماعىندا قولعا ءتۇستى. ول شىمكەنت قالاسىنىڭ 26 جاستاعى تۇرعىنى بولىپ شىقتى. كۇدىكتى ۋاقىتشا جۇمىسسىز"، - دەلىنگەن حابارلامادا.
تەرگەۋ بارىسىندا ۇستالعان ازاماتشا بالا كۇتۋشىنىڭ اڭعالدىعىن پايدالانعانىن مويىنداپ، زاڭسىز ارەكەتكە قارىزىنان قۇتىلۋ ءۇشىن بارعانىن جانە بۇل ءۇشىن وكىنەتىنىن ايتتى. قازىرگى تاڭدا سوتقا دەيىنگى تەرگەۋ ارەكەتتەرى جالعاسىپ جاتىر.