شىمكەنتتەگى ادام قۇقىقتارى جونىندەگى ۋاكىلدىڭ وڭىرلىك وكىلى نۇرجان ابدەزوۆ سوتتالعانداردىڭ ءبىرىن جەكە قابىلداپ، قابىلداۋ بارىسىندا ول ازاپتاۋ دەرەگى بويىنشا شاعىم تۇسىرگەنىن ايتتى، - دەپ حابارلايدى aqshamnews.kz ءتىلشىسى.
تۇتقىننىڭ ايتۋىنشا، 2025 جىلعى ماۋسىمدا مەكەمە قىزمەتكەرلەرى ونى سوققىعا جىعىپ، قولىنا كىسەن سالىپ، تەمىر تورعا ءىلىپ، 4 ساعات بويى سول كۇيى قالدىرعان. سونداي-اق، ونىڭ اياق كيىمىن شەشىپ الىپ، تابانىنان ۇرعانى ايتىلعان.
"سونىمەن قاتار، قابىلداۋ كەزىندە باسقا ءبىر سوتتالعاننىڭ دا سوققىعا جىعىلعانى انىقتالدى: ونىڭ جاق سۇيەگى سىنعان"، - دەلىنگەن قازاقستانداعى ادام قۇقىقتارى جونىندەگى ۋاكىلدىڭ سايتىنداعى حابارلامادا.
ءوتىنىش قورىتىندىسى بويىنشا مەديسينالىق كومەكتى ۋاقىتىلى كورسەتپەگەنى ءۇشىن مەديسينا قىزمەتكەرلەرى جازالانعان. سونداي-اق، مەكەمە قىزمەتكەرلەرىنە قاتىستى ق ر قىلمىستىق كودەكسىنىڭ 362-بابى ("بيلىكتى نەمەسە لاۋازىمدىق وكىلەتتىكتەردى اسىرا پايدالانۋ") بويىنشا سوتالدى تەرگەپ-تەكسەرۋ تىركەلگەن.
"جوعارى قاداعالاۋ ورگانىنا قىزمەتكەرلەردىڭ ارەكەتتەرىن قايتا قاراۋ تۋرالى ءوتىنىش جولداندى، ويتكەنى وندا ازاپتاۋ بەلگىلەرى بار"، - دەپ تە كورسەتىلگەن حابارلامادا.
ناتيجەسىندە باس پروكۋراتۋرا بۇل ۇستانىمدى قولداپ، سوتالدى تەرگەپ-تەكسەرۋ ق ر قىلمىستىق كودەكسىنىڭ 146-بابى 3-بولىگى ("قاتىگەز، ادامگەرشىلىككە جاتپايتىن نەمەسە قادىر-قاسيەتتى قورلايتىن قارىم-قاتىناس، ازاپتاۋ") بويىنشا قايتا سارالانعان. مەكەمەنىڭ ءۇش قىزمەتكەرى قاماۋعا الىندى.