ۆەنەسۋەلا جوعارعى سوتى ەلدىڭ بۇرىنعى اتقارۋشى ۆيسە-پرەزيدەنتى دەلسي رودريگەستى ۋاقىتشا مەملەكەت باسشىسى ەتىپ تاعايىندادى، - دەپ حابارلايدى aqshamnews.kz ءتىلشىسى DW اگەنتتىگىنە سىلتەمە جاساپ حابارلادى.
جوعارعى سوتتىڭ شەشىمى نەگە بايلانىستى قابىلداندى؟
سوت سۋدياسى تانيا د’امەليونىڭ ايتۋىنشا، شەشىم 3 قاڭتاردا بولعان وقيعالارعا بايلانىستى قابىلدانعان. ۆەنەسۋەلا بيلىگى بۇل جاعدايدى سىرتقى اسكەري اگرەسسيا جانە ەلدىڭ قازىرگى پرەزيدەنتى نيكولاس مادۋرونى ۇرلاۋ ارەكەتى رەتىندە باعالاعان.
جوعارعى سوت بۇل قادامنىڭ ۋاقىتشا سيپاتتا ەكەنىن اتاپ ءوتتى. نەگىزگى ماقسات – مەملەكەتتىك ينستيتۋتتاردىڭ ۇزدىكسىز جۇمىسىن، ۇلتتىق قاۋىپسىزدىك پەن قورعانىستى قامتاماسىز ەتۋ.
نيكولاس مادۋرو قىزمەتىنەن الىندى ما؟
AFP اگەنتتىگىنىڭ مالىمەتىنشە، نيكولاس مادۋرو رەسمي تۇردە پرەزيدەنتتىك قىزمەتىنەن شەتتەتىلگەن جوق. بۇل – ماڭىزدى جايت. سەبەبى، مەملەكەت باسشىسى قىزمەتىنەن الىنعان دەپ تانىلسا، ۆەنەسۋەلا كونستيتۋسياسى بويىنشا 30 كۇن ىشىندە جاڭا پرەزيدەنت سايلاۋى وتۋگە ءتيىس بولار ەدى.
دەلسي رودريگەس نە دەيدى؟
DPA اگەنتتىگىنىڭ حابارلاۋىنشا، دەلسي رودريگەس ۋاقىتشا پرەزيدەنت مىندەتىن اتقارۋعا دايىن ەكەنىن مالىمدەگەن. سونىمەن بىرگە ول كوپشىلىك الدىندا نيكولاس مادۋروعا ادالدىعىن جاسىرعان جوق.
«بۇل ەلدە ءبىر عانا پرەزيدەنت بار. ونىڭ اتى – نيكولاس مادۋرو موروس»، – دەدى دەلسي رودريگەس ۇلتتىق قورعانىس كەڭەسىنىڭ وتىرىسىندا.
اقش مالىمدەمەلەرى جاعدايدى ۋشىقتىردى
بۇعان دەيىن اقش پرەزيدەنتى دونالد ترامپ امەريكالىق اسكەريلەردىڭ كاراكاستاعى تۇنگى وپەراسيا كەزىندە نيكولاس مادۋرو مەن ونىڭ جۇبايىن ۇستاپ، ەلدەن الىپ شىققانىن مالىمدەگەن ەدى. اقپارات كوزدەرى اسكەري جانە ستراتەگيالىق نىساندارعا، سونىڭ ىشىندە پارلامەنت عيماراتىنا سوققىلار جاسالعانىن حابارلادى.