زارداپ شەككەندەر جوق
شىمكەنتتە يگىلىك-بادام تەمىر جولىنىڭ 3266 شاقىرىمىندا 18 جۇك ۆاگونى اۋدارىلىپ قالدى. بۇل ۆاگوندار «شىمكەنت-ارىس» باعىتىنداعى 2489 جۇك پوەزىنىڭ قۇرامىندا بولعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
قالالىق تجد باسپا ءسوز قىزمەتىنىڭ مالىمەتىنشە، بۇل جاعداي بۇگىن كۇندىزگى ساعات 16.37-دە ورىن العان. اۋدارىلعان ۆاگونداردىڭ 17ء-سى بوس بولعان. ناتيجەسىندە اۋە ەلەكتر جەلىلەرىنىڭ 11 تىرەگى زاقىمدالىپ، تەمىر جول توسەمىنىڭ ءىشىنارا زاقىمدانعان. زارداپ شەككەندەر جوق.
«تەمىرجولدا جوندەۋ-قالپىنا كەلتىرۋ جۇمىستارىنا «قتج ۇك» اق (55 ادام جانە 1 قالپىنا كەلتىرۋ پويىزى) كۇشتەرى جۇمىلدىرىلدى. وقيعا ورنىنا قالالىق تجد باسشىلىعى مەن جەكە قۇرامنىڭ 14 ادامى جانە 4 بىرلىك تەحنيكاسى شىقتى. اتالعان ستانسادا ۆاگونداردىڭ ىستەن شىعۋىنا بايلانىستى «الماتى-ماڭعىستاۋ» باعىتىنداعى 77 جولاۋشىلار پويىزى 1 ساعات 15 مينۋتقا كىدىردى. قازىرگى ۋاقىتتا پويىزداردىڭ قوزعالىسىنا اسەرى جوق»، - دەلىنگەن حابارلامادا.