اۆتورلىق جانە ساباقتاس قۇقىقتاردى ساقتاۋ
ەل سەناتى دوستاستىققا مۇشە مەملەكەتتەردىڭ اقپاراتتىق-تەلەكوممۋنيكاسيالىق جەلىلەردە اۆتورلىق جانە ساباقتاس قۇقىقتاردى ساقتاۋ جانە قورعاۋ ىنتىماقتاستىعىنا قاتىستى كەلىسىمدى ماقۇلدادى، دەپ حابارلايدى Almaty-akshamy.kz Jibek joly تەلەارناسىنا سىلتەمە جاساپ.
قۇجات ينتەرنەتتە وسى باعىتتا قۇقىقتاردىڭ بۇزىلۋىنا قارسى ءىس-قيمىل تەتىكتەرىن قۇرۋ جونىندەگى ءىس-شارالاردى ازىرلەپ، ىسكە اسىرۋعا باعىتتالعان. ياعني، قاتىسۋشى ەلدەر حالىقارالىق دەڭگەيدە وسى ورتاق ماسەلەنى رەتتەۋدىڭ وڭتايلى نۇسقالارىن بىرلەسىپ ىزدەيتىن بولادى.
ايتا كەتەيىك، بىلتىر تمد-نىڭ سەگىز مەملەكەتى وسىنداي ۋاعدالاستىققا قول جەتكىزدى. قازىرگى تاڭدا بۇعان قاتىستى مەملەكەتىشىلىك راسىمدەردى رەسەي، ارمەنيا، بەلارۋس، قىرعىز، جانە وزبەكستان ەلدەرى وتكىزىپ قويعان.
«مەملەكەتىمىزدىڭ زاڭناماسىن باسشىلىققا الا وتىرىپ، كەلىسىمدى ىسكە اسىرۋدى قامتاماسىز ەتۋ بارىسىندا: زاڭنامانى جەتىلدىرۋ؛ قاتىسۋشى مەملەكەتتەردىڭ ۋاكىلەتتى ورگاندارىمەن ىنتىماقتاستى تەرەڭدەتۋ جانە اقپارات الماسۋ؛ اتالعان سالاداعى زاڭسىزدىقتاردىڭ الدىن الۋ جانە جولىن كەسۋ جونىندەگى ءىس-شارالاردى ازىرلەۋ؛ وسى تاقىرىپ بويىنشا سەمينار، كونفەرەنسيا جانە بىرلەسكەن عىلىمي زەرتتەۋلەر وتكىزۋ باعىتتارى بويىنشا ىنتىماقتاستىقتى دامىتادى»، - دەدى ق ر پارلامەنتى سەناتىنىڭ دەپۋتتى امانگەلدى تولاميسوۆ.