ءمۇسىن قالانىڭ ورتالىق ساياباعىنا ورناتىلدى
ق ر تاۋەلسىزدىگىنىڭ 30 جىلدىق مەرەكەسىنە وراي شىمكەنت قالاسى اكىمدىگىنىڭ قولداۋىمەن قوعام قايراتكەرى، عالىم-ەتنوگراف وزبەكالى جانىبەكوۆتىڭ كومپوزيسيالىق ءمۇسىنىنىڭ اشىلۋ سالتاناتى جانە «دارا» اتتى ءفيلمنىڭ تۇساۋكەسەرى ءوتتى، دەپ حابارلايدى Almaty-akshamy.kz شىمكەنت قالاسى اكىمدىگىنىڭ باسپا ءسوز قىزمەتىنە سىلتەمە جاساپ.
ءىس-شاراعا قالا اكىمى مۇرات ايتەنوۆ، شىمكەنت قالاسى ءماسليحاتىنىڭ حاتشىسى باحادىر نارىمبەتوۆ، حالىقارالىق «الاش» ادەبي سىيلىعىنىڭ لاۋرەاتى، جازۋشى مارحابات بايعۇت، «پاراسات» وردەنىنىڭ يەگەرى ءحانبيبى ەسەنقارا قىزى، قوعام قايراتكەرىنىڭ ۇرپاقتارى مەن عالىمدار، تاعى باسقا زيالى قاۋىم وكىلدەرى قاتىستى.
كومپوزيسيالىق ءمۇسىننىڭ قالا ورتالىعىندا بوي كوتەرۋىنە ىقپال ەتكەن قالا اكىمى مۇرات ايتەنوۆ قۇتتىقتاۋ ءسوز سويلەپ، ءىس-شارانىڭ ماڭىزدىلىعىنا توقتالىپ ءوتتى.
«مەملەكەت جانە قوعام قايراتكەرى وزبەكالى جانىبەكوۆتىڭ ۇلت رۋحانياتىن كوتەرۋدەگى ورنى ايرىقشا. عالىم-ەتنوگراف مادەنيەت مينيسترلىگىندە جاۋاپتى قىزمەت اتقارعان جىلدارى ەلىمىزدە 400-گە جۋىق ارحەولوگيالىق نىسان قالپىنا كەلتىرىلگەنىن جاقسى بىلەمىز. تاريحىمىزدى تانىپ، رۋحانياتىمىزدى بىلۋگە ۇلكەن وزگەرىستەر جاسالدى. بۇل وزبەكالى جانىبەكوۆتىڭ ۇلت قايراتكەرى، وتانشىل ازامات رەتىندەگى تۇلعاسىن كورسەتەدى. مەملەكەتىمىزدىڭ ماڭىزدى تاريحي بەلەسى - تاۋەلسىزدىگىمىزدىڭ 30 جىلدىعى قارساڭىندا اشىلعان بۇل ەسكەرتكىش بۇگىنگى ۇرپاقتىڭ ۇلت ازاماتىنا كورسەتكەن زور قۇرمەتى دەپ بىلەمىن»، - دەدى قالا اكىمى.
شىمكەنت قالاسىنىڭ ورتالىق ساياباعىنا ورناتىلعان شاعىن ساۋلەت ءمۇسىنى ءو.جانىبەكوۆتىڭ 90 جىلدىق مەرەيتويىنا ارنالىپ وتىر. ونداعى ماقسات - ۇلتىمىزدىڭ ۇلتتىق قۇندىلىقتارىن، ءومىر سالتىمىزدى زامانعا ساي ودان ءارى بايىتۋدا، ءسالت-داستۇر، ادەت-عۇرىپتارىمىز ارقىلى جاڭا ۇرپاق تاربيەلەۋدە ءو.جانىبەكوۆتىڭ بيىك تۇلعاسىن دارىپتەۋ.
سونداي-اق شىمكەنت قالاسىنىڭ «ادەت-عۇرىپ جانە ءسالت-داستۇر ورتالىعىندا» قوعام قايراتكەرىنىڭ ءومىر جولىن باياندايتىن «دارا» اتتى دەرەكتى ءفيلمنىڭ تۇساۋى كەسىلدى. فيلمدە قايراتكەردىڭ ومىرلىك پوزيسياسى، ۇلتتىق يدەولوگيانىڭ نەگىزىن قالاۋداعى وي-پىكىر ۇستانىمى، قازاقتىڭ ءومىر-سالتى مەن ءبولمىس-بىتىمى، دۇنيەتانىمىن تۇبەگەيلى زەرتتەپ، قايتا جاڭعىرتۋ جولىنداعى ىزدەنىستەرى، ت.ب.، كوپتەگەن ەڭبەكتەرى سارالانادى.