شىمكەنتتە مەديسينا بۇيىمدارىن شىعاراتىن كاسىپورىن اشىلدى

تاۋەلسىزدىكتىڭ 30 جىلدىعى  

بۇگىن شىمكەنتتە «بيزنەستىڭ جول كارتاسى» مەملەكەتتىك باعدارلاما اياسىندا مەديسينا بۇيىمدارىن شىعاراتىن جاڭا كاسىپورىن اشىلدى، - دەپ حابارلايدى Almaty-akshamy.kz.

جوبانىڭ قۇنى 500 ميلليون تەڭگەنى قۇرايدى. مۇندا جاڭادان 50 جۇمىس ورنى قۇرىلدى.

كاسىپورىن جىلىنا يممۋنوفەرمەنتتى ءاناليزدىڭ 500 مىڭ جيناعىن جانە 70 ميلليون ءينسۋليندى ينە شىعارۋعا قاۋقارلى.
«تاسساي» يندۋستريالدى ايماعىندا ورنالاسقان ءوندىرىس وشاعىنىڭ اشىلۋ سالتاناتىنا قالا اكىمى مۇرات ايتەنوۆ قاتىستى.

ق ر تاۋەلسىزدىگىنىڭ 30 جىلدىق مەرەيتويىمەن قۇتتىقتاعان قالا باسشىسى وسى جىلدار ىشىندە قالانىڭ دامۋى جولىنداعى ەسەلى جەتىستىكتەردى اتادى.

«تاۋەلسىزدىك جىلدارىندا قالاعا تارتىلعان ينۆەستيسيا كولەمى 2،6 تريلليون تەڭگەگە جەتتى. ونىڭ تەڭ جارتىسى سوڭعى 3،5 جىلدىڭ ۇلەسىنە كەلەدى. وتىز جىلدا شاعىن جانە ورتا كاسىپكەرلىك سۋبەكتىلەر سانى 6 مىڭنان 74 مىڭ بىرلىككە، وندا جۇمىسپەن قامتىلعاندار سانى 35 مىڭنان 168 مىڭ ادامعا ارتتى. شىمكەنت قالاسى مەگاپوليس بولىپ قالىپتاستى. شىمكەنت – بىر-بىرىنە قىزمەت كورسەتىپ، بىر-بىرىنەن تاۋار الاتىن ۇلكەن نارىققا اينالدى»، - دەدى مۇرات ايتەنوۆ.

مەگاپوليستە ەسەپتى كەزەڭدە ونەركاسىپ سالاسىندا 500-دەن استام جاڭا جۇمىس ورنى اشىلىپ، جاڭا 10 كاسىپورىن ىسكە قوسىلدى. ال، "بيزنەستىڭ جول كارتاسى-2025" مەملەكەتتىك باعدارلاماسى شەڭبەرىندە 7،8 ميلليارد تەڭگەگە 1 946 جوباعا قولداۋ كورسەتىلگەن.