شىمكەنتتە ەكى جاس جىگىت قالاداعى سمارت-دارەتحانادان شاش كەپتىرگىشتى سىمىمەن بىرگە جۇلىپ الىپ كەتكەنى تۋرالى اقپارات تارادى، دەپ حابارلايدى Aqshamnews.kz ءتىلشىسى.
وقيعاعا بايلانىستى جوبا كوورديناتورلارى پوليسياعا ارىز تۇسىرگەن. قۇقىق قورعاۋ ورگاندارىنا حابار بەرىلگەننەن كەيىن ەكى شىمكەنتتىك ەرىكتى تۇردە بولىمشەگە كەلىپ، كىنالارىن مويىنداعان ءارى كەلتىرىلگەن شىعىندى وتەۋگە دايىن ەكەنىن جەتكىزگەن.
جاس جىگىتتەردىڭ ءبىرىنىڭ سوزىنشە، ول دارەتحانادا بەتى-قولىن جۋىپ تۇرعان كەزدە فەندى ابايسىزدا جۇلىپ العان. ونىڭ ايتۋىنشا، ولار قۇرىلعىنى ۇرلاۋدى ماقسات ەتپەگەن، "جوندەپ، قايتا ورنىنا قويۋدى ويلاعان". سونداي-اق اكىمدىك پەن جوبا ۇيلەستىرۋشىلەرىنەن كەشىرىم سۇراپ، جوندەۋ شىعىندارىن تولەۋگە دايىن ەكەنىن ايتتى.
ەسكە سالايىق، شىمكەنتتەگى سمارت-تۋالەتتەردىڭ جابدىقتارى ءجيى بۇزىلىپ، قۇبىرلارى بىتەلىپ، ينتەرەرىنە زاقىم كەلەتىن جاعدايلار تىركەلىپ تۇرادى. مالىمەتكە سايكەس، ءبىر نىساننىڭ قۇنى شامامەن 50 ملن تەڭگە.