مۇسىندەردىڭ بيىكتىگى - ورتاشا ەسەپپەن 210 سم
ق ر تاۋەلسىزدىگىنىڭ 30 جىلدىعىنا وراي شىمكەنت قالاسىندا «الاش ارىستارى» ەسكەرتكىشىنىڭ سالتاناتى اشىلۋ ءراسىمى ءوتتى، دەپ حابارلايدى Almaty-akshamy.kz.
جيىنعا قالا اكىمى مۇرات ايتەنوۆ، ءماسليحات حاتشىسى ب.نارىمبەتوۆ، قالالىق ارداگەرلەر كەڭەسىنىڭ ءتوراعاسى كەنجەحان تولەبايەۆ، «الاش ارىستارى» ەسكەرتكىشىنىڭ يدەيا اۆتورى بەكەت تۇرعارايەۆ، حالىقارالىق «الاش» سىيلىعىنىڭ يەگەرى مارحابات بايعۇت، كورنەكتى اقىن ءحانبيبى ەسەنقارا قىزى جانە تاعى باسقا زيالى قاۋىم وكىلدەرى قاتىستى.
قالا اكىمى كوپشىلىكتى ەسكەرتكىشتىڭ اشىلۋىمەن قۇتتىقتاپ، ءىس-شارانىڭ ماڭىزدىلىعىنا توقتالدى.
«كۇنى كەشە وتانداستارىمىز ەل تاۋەلسىزدىگىنىڭ 30 جىلدىق مەرەكەسىن سان-سالتاناتىمەن اتاپ ءوتتى. بولاشاعىن باياندى ەتكەن مەملەكەت، ءوز تاريحىن ايرىقشا قاستەرلەپ، دارا تۇلعالارىن، ەل بولىپ ەڭسە كوتەرۋگە قىزمەت ەتكەن اسىل ازاماتتارىن ەرەكشە قۇرمەتكە بولەيدى. ۋاقىت وزعان سايىن ۇلت ازاتتىعى ءۇشىن ايانباي كۇرەسكەن الاش قايراتكەرلەرىنىڭ دانالىعىن، دارالىعىن، كەمەڭگەرلىگىن ايقىن سەزىنىپ كەلەمىز. ولاردىڭ ءومىر جولى ءبىز ءۇشىن، بولاشاق ۇرپاق ءۇشىن – تاعىلىم الار تاربيە. مۇنداي كەشەندەر – جاستارىمىزدى وتانشىلدىققا تاربيەلەپ، ءوز ەلىنە، جەرىنە، وتكەنى مەن بولاشاعىنا دەگەن سىي-قۇرمەتتى قالىپتاستىرۋ قۇرالى دەپ بىلەمىز»، - دەدى قالا اكىمى.
كومپوزيسيالىق ءمۇسىن شىمكەنت قالاسىنىڭ ورتالىق ساياباعى اۋماعىندا ورنالاسقان. تۇعىر گرانيتپەن قاپتالعان. مۇسىندەردىڭ بيىكتىگى - ورتاشا ەسەپپەن 210 سم. تۇعىردىڭ ۇزىندىعى - شامامەن التى مەتر، ەنى - شامامەن ءۇش مەتر.
جيىنالعاندار كومپوزيسيالىق مۇسىنگە گۇل شوقتارىن قويدى.