زاڭسىز شىعارىلعان اكتيۆتەردى ەلگە قايتارۋ ەسەبىنەن: شىمكەنتتەگى مەكتەپ-ينتەرنات-كوللەدج تاربيەلەنۋشىلەرىنە ارنالعان 300 ورىندىق جاتاقحانا سالىنادى
مەملەكەت باسشىسىنىڭ تاپسىرماسىنا سايكەس ەلگە زاڭسىز شىعارىلعان اكتيۆتەردى قايتارۋ ارقىلى الەۋمەتتىك ماڭىزى بار جوبالاردى ىسكە اسىرۋ جۇمىستارى جالعاسۋدا، دەپ حابارلايدى aqshamnews.kz
وسى ورايدا ۇكىمەت شىمكەنت قالاسىنداعى «سايرام كومەكشى مەكتەپ-ينتەرنات-كوللەدجى» كەشەنىنە 300 ورىندىق جاتاقحانا سالۋ ءۇشىن ارناۋلى مەملەكەتتىك قوردان 2،6 ملرد تەڭگەدەن استام قارجى ءبولدى.
جاڭا عيمارات زاماناۋي تالاپتارعا تولىق ساي ەتىپ جوبالانعان. جاتاقحانادا ۇلدار مەن قىزدارعا ارنالعان جەكە بلوكتار، مەديسينالىق ءبولىم، كەڭ اسحانا، ويىن بولمەلەرى جانە باسقا دا قاجەتتى نىساندار قاراستىرىلعان.
قازىرگى ۋاقىتتا «سايرام كومەكشى مەكتەپ-ينتەرنات-كوللەدجىندە» 363 بالا ءبىلىم الىپ جاتىر. الايدا جاتاقحاناداعى ورىن تاپشىلىعى سالدارىنان وقۋ عيماراتىنداعى كەيبىر كابينەتتەر ۋاقىتشا جاتىن بولمەلەر رەتىندە پايدالانىلىپ وتىر. 120 ورىنعا ارنالعان جاتاقحانا تالاپتاردى تولىق قامتاماسىز ەتە المايدى، بۇل سەبەپتى 67 بالا ۇيدە وقۋعا ءماجبۇر.
جاڭا جاتاقحانانىڭ سالىنۋى بالالاردىڭ ءبىلىم الۋىنا جانە جايلى ءومىر سۇرۋىنە جاعداي جاساپ قانا قويماي، ورىن تاپشىلىعىن دا تولىقتاي شەشەدى.
زاڭسىز شىعارىلعان اكتيۆتەر ەسەبىنەن ەلىمىزدە باسقا دا الەۋمەتتىك جوبالار جۇزەگە اسىرىلدى. ولاردىڭ قاتارىندا:
- اقمولا وبلىسى زەرەندى اۋىلىندا سپورت كەشەنىن سالۋ؛
- تۇركىستان وبلىسى تەمىرلان اۋىلىندا مۋزىكا مەكتەبىن اشۋ؛
- ارقالىق قالاسىندا دارىندى سپورتشى بالالارعا ارنالعان سپورت كەشەنى؛
- استانادا تىرەك-قيمىل اپپاراتى بۇزىلعان بالالارعا ارنالعان وڭالتۋ ورتالىعى؛
- الماتىدا ەرەكشە قاجەتتىلىكتەرى بار ازاماتتارعا ارنالعان جاتتىعۋ ورتالىعى؛
- اقتوبەدە ەرەكشە بالالارعا ارنالعان ارنايى بالاباقشا؛
- اتىراۋ وبلىسى جامانسور اۋىلىندا مەكتەپ سالۋ؛
- ريددەر قالاسىندا كوپبەيىندى اۋرۋحانا كەشەنىن اياقتاۋ.
الەۋمەتتىك جوبالاردى ىسكە اسىرۋ جۇمىستارى جالعاسۋدا.