الماتىدا جۋرناليست-شاڭعىشىلار كلۋبى دەيتىن ءبىر ەرەكشە قاۋىمداستىق بار. ول 2012 جىلى قۇرىلىپ، SCIJ Kazakhstan دەپ اتالادى. وسى جىلدار ىشىندە قاۋىمداستىق قازاقستاندى 30 ەلدىڭ جۋرناليستەرىن بىرىكتىرەتىن بەدەلدى حالىقارالىق ۇيىم – SCIJ (International Ski Club of International Journalists) قۇرامىندا تانىستىرىپ كەلەدى. بۇگىندە SCIJ Kazakhstan 45 ءجۋرناليستى بىرىكتىرگەن، ونداعان ستارتتارعا قاتىسقان، حالىقارالىق مەدالدار جەڭىپ العان ۇلكەن قاۋىم.
SCIJ 67 جىلدان بەرى جۇمىس ىستەپ كەلەدى. كلۋب 1951 جىلى فرانسۋز ءجۋرناليسى ءارى تاۋ شاڭعىشىسى جيل دە لا روككتىڭ باستاماسىمەن قۇرىلعان. العاشقى كەزدەسۋ 1955 جىلى فرانسيانىڭ مەريبەل كۋرورتىندا ءوتتى. سودان بەرى الەمنىڭ ەڭ ۇزدىك تاۋ شاڭعىسى كۋرورتتارىندا جىل سايىن كەزدەسۋ ۇيىمداستىرىلادى. وعان ءارتۇرلى ەلدەن 100–200 جۋرناليست قاتىسىپ، گيگانت-سلالوم مەن شاڭعى جارىستارىندا ب ا ق سىناپ، كاسىبي تاقىرىپتاردى تالقىلاپ تۇرادى. وسى جىلدار ىشىندە جۋرناليست-شاڭعىشىلاردى الەمنىڭ 74 كۋرورتى قابىلداعان.
قازاقستاندىق كلۋبتىڭ تاريحى ءبىر ادامنان باستالدى. 2012 جىلى جۋرناليست اناستاسيا ناۋمەسكايا تۇركيادا وتكەن SCIJء-دىڭ جىل سايىنعى كەزدەسۋىنە قوناق رەتىندە العاش رەت قاتىستى. بۇل يدەيا ونى سونشالىقتى شابىتتاندىرىپ، 2013 جىلى يرينا باجەنوۆا مەن اندرەي كۋكۋشكينمەن بىرگە قازاقستاندىق كوماندا قۇرىلدى. يتاليادا وتكەن SCIJء-دىڭ 60 جىلدىق مەرەيتويلىق كەزدەسۋىندە قازاقستان حالىقارالىق كلۋبتىڭ رەسمي مۇشەسى اتاندى. اناستاسيا ناۋمەسكايا بۇگىندە كلۋبتىڭ ۆيسە-پرەزيدەنتى ءارى قازاقستاندىق كوماندانىڭ تۇراقتى كاپيتانى.
SCIJ Kazakhstan تاريحىنداعى ماڭىزدى تۇلعانىڭ ءبىرى – «ۆرەميا» اپتالىق گازەتىنىڭ باس رەداكتورى، كلۋبتى 13 جىل بويى باسقارعان يرينا باجەنوۆا.
«جەكە ءوزىم تاۋ شاڭعىسىمەن 40 جىلدان استام ۋاقىت بويى اينالىسىپ كەلەمىن. بۇل اۋەستىكتى ماعان اكەم دارىتتى. ول كەزدە بۇل سپورت ساندە بولماعان، ولار كوتەرگىشتەردى وزدەرى جاساپ، ءتىپتى شاڭعى باتەڭكەلەرىن قولمەن تىگەتىن. سەبەبى كەڭەس زامانىندا ولاردى دۇكەننەن ساتىپ الۋ مۇمكىن قيىن ەدى.
مەن شىمبۇلاقتا راتراك تا بولماعان كەزدەردى كوردىم، قار جاۋعاننان كەيىن بەتكەيلەردى اياقپەن تاپتاپ شىعاتىنبىز.
ماعان مۇندا اشىق اسپان استىندا جاتتىعاتىنى ۇنايدى. ءبىزدىڭ ستاديون – تاۋ. تازا اۋا، قىس مەزگىلىندە دە بەلسەندى بولىپ، سپورتپەن اينالىسۋ – وسىنىڭ ءبارى ادامعا ەرەكشە اسەر بەرىپ، كادىمگىدەي سەرگىتەدى.
SCIJ Kazakhstan كلۋبى قۇرىلعان كەزدە مەن ارىپتەستەرىمە قىسقى سپورتتىڭ قىزىعىن كورسەتىپ، قارلى، ايازدى كۇندەرى دە ۋاقىتتى تاۋدا وتكىزۋگە بولاتىنىن دالەلدەگىم كەلدى. ءبىز شەتەلدىك جارىستارعا بارعاندا كوپ ادام العاش رەت ەۋروپانى كوردى، ونداعى تاۋ شاڭعىسى كۋرورتتارىنىڭ قالاي جۇمىس ىستەيتىنىن ءبىلدى.
مەنىڭ ويىمشا، كلۋبتىڭ ماڭىزدى اعارتۋشىلىق ميسسياسى بار. تۋريزم مەن سپورت تۋرالى جازاتىن جۋرناليستەر تراسسالاردىڭ، كوتەرگىشتەردىڭ، سەرۆيستىڭ قالاي ۇيىمداستىرىلاتىنىن، كاسىبي تەرميندەردى جاتقا ءبىلۋى كەرەك. بۇل اسىرەسە ءقازىر، الماتى تاۋ كلاستەرى دامىپ جاتقان كەزدە وتە ماڭىزدى.
قازاقستاندا تاۋ شاڭعىسى مەن سنوۋبوردتىڭ تانىمال بولعانىنا، كۋرورتتارىمىزدىڭ دامىپ جاتقانىنا قۋانىشتىمىن. ووەز مۇمكىندىكتەرىڭىزدى دۇرىس باعالاڭىزدار، باستى قاتەرگە تىكپەڭىزدەر، ماڭايىڭىزداعى باسقا ادامدارعا ءقاۋىپ توندىرمەڭىزدەر.
12 جىل ىشىندە كلۋب 3 ادامنان 45 ادامعا دەيىن ءوستى. ولار – تەلەارنا، گازەت، اقپارات اگەنتتىگى مەن ونلاين-باسىلىم جۋرناليستەرى. SCIJ Kazakhstan-نىڭ باستى ماقساتى – سالاۋاتتى ءومىر سالتىن ناسيحاتتاپ، جۋرناليستەردى تارتىپ، ولار ارقىلى قىسقى حالىقتى سپورت تۇرلەرىنە شاقىرۋ، سونداي-اق قازاقستاننىڭ تۋريستىك الەۋەتىن شەتەلدە ىلگەرىلەتۋ. وسى كلۋبتىڭ ارقاسىندا شامامەن ون جۋرناليست ومىرىندە العاش رەت شاڭعى تەپتى. SCIJ Kazakhstan سەرىكتەسى – شىمبۇلاق مەن وي-قاراعاي كۋرورتى.
قازىرگى تاڭدا كلۋبتى سرايىل سمايىل – «كتك» اق باس ديرەكتوردىڭ ورىنباسارى، SCIJ Kazakhstan پرەزيدەنتى باسقارادى.
«مەن بۇل كلۋبقا 2014 جىلى كەلدىم. ياعني 11 جىل بولدى. ءار بەس جىل سايىن ەسەپتىك-سايلاۋ جينالىسى وتەدى، وتكەن جىلى اشىق جينالىستا مەنى كلۋب پرەزيدەنتى ەتىپ سايلادى. سونداي-اق ۆيسە-پرەزيدەنتتەر مەن باس حاتشى سايلاندى. جىل وتكەن سايىن ارىپتەستەرىمىزدىڭ كلۋبقا قىزىعۋشىلىعى ارتىپ كەلە جاتقانىن اتاپ وتكەن ءجون.
وليمپيادا چەمپيونى، ايگىلى فرانسۋز شاڭعىشىسى جان-كلود كيللي: “تاۋ شاڭعىسى – باقىتتىڭ ءوزى ەمەس، ءبىراق ونى تولىقتاي الماستىرا الادى” دەگەن ەكەن. شاڭعى – بۇل سپورت، دەنساۋلىق، بيىك تاۋلاردىڭ رومانتيكاسى. ءبىراق بۇل ءقاۋىپتى سپورت ءتۇرى دە، ول بەلگىلى ءبىر تەحنيكانى جانە تاۋعا دەگەن قۇرمەتتى تالاپ ەتەدى.
مەن ءوزىم 2014 جىلى شىمبۇلاقتا شاڭعى تەبۋدى ۇيرەندىم. العاشقى كۇنىم ءالى ەسىمدە: نۇسقاۋشىم ءبىر مەتر ءجۇرىپ، قۇلاپ، سوسىن قايتا تۇرۋدى ۇيرەتتى. ول كەزدە 51 جاستا ەدىم. وتە قيىن بولدى. ءوزىمدى ءالى دە كاسىبي شاڭعىشىمىن دەپ ەسەپتەمەيمىن، ءالى ۇيرەنىپ ءجۇرمىن.
كەيىن كتك-عا ورالعاندا ارىپتەستەرىمدى كلۋبقا تارتتىم. كوپشىلىگى مۇلدە سىرعاناي المايتىن. سول كەزدە شىمبۇلاق بىزگە نۇسقاۋشىلار ءبولىپ، ءبىر ماۋسىم ىشىندە ءبارىن شاڭعى تەبە الاتىن قىلىپ شىعاردىق.
ەگەر شىمبۇلاق پەن وي-قاراعايدى الەمدەگى باسقا كۋرورتتارمەن سالىستىرساق، ولاردىڭ ءسوزسىز ارتىقشىلىعى بار. ەڭ باستىسى – جاقىن ورنالاسۋى: قالا ورتالىعىنان جارتى ساعاتتا جەتۋگە بولادى. سوندىقتان ءبىز، جۋرناليست-شاڭعىشىلار، الماتى تاۋ كلاستەرىن دامىتۋعا باعىتتالعان اۋقىمدى جوبالاردى قولدايمىز».
جىل سايىن SCIJ Kazakhstan شىمبۇلاق پەن وي-قاراعاي كۋرورتتارىندا جۋرناليستەر اراسىندا گيگانت-سلالوم بويىنشا جارىس، سونداي-اق «الاتاۋ» شاڭعى-بياتلون كەشەنىندە شاڭعى جارىسىن وتكىزەدى.
2024 جىلى قازاقستان العاش رەت SCIJء-دىڭ 69-شى حالىقارالىق كەزدەسۋىن الماتىدا قابىلدادى. ۇيدەگى ستارت ناعىز تريۋمف بولدى: قازاقستاندىق كوماندا 7 مەدال، ونىڭ ىشىندە 3 التىن مەدال جەڭىپ الدى. بۇل جەتىستىك 2025 جىلى يتالياداعى Bardonecchia كۋرورتىندا وتكەن كەزدەسۋدە دە راستالىپ، قازاقستاندىق جۋرناليستەر تاعى 7 مەدال، سونىڭ ىشىندە 4 التىن مەدال ەنشىلەدى.
2025–2026 قىسقى ماۋسىمىن كلۋب 19 جەلتوقساندا شىمبۇلاقتا، جۋرناليستەر اراسىندا تاۋ شاڭعىسىنان قازاقستاننىڭ اشىق چەمپيوناتىن وتكىزۋ ارقىلى اشتى. SCIJ Kazakhstan مۇشەلەرى ءۇشىن بۇل جارىس قانا ەمەس، تاۋعا قۇشتار جانداردىڭ تاعى ءبىر باسقوسۋى ىسپەتتى بولدى.