كوممۋنالدىق قىزمەتكەرلەر الماتىدا قار تازالاۋ جۇمىستارى قالاي ءجۇرىپ جاتقانىن ايتتى
الماتىدا 15-16 جەلتوقسان كۇندەرى قالىڭ قار جاۋىپ، قالانىڭ جاعدايىنا ەلەۋلى اسەر ەتتى. جەلتوقسان ايىنداعى ايلىق نورمانىڭ ۇشتەن ءبىر بولىگى بولاتىن بۇل جاۋىن-شاشىننىڭ ناتيجەسىندە الماتى كوشەلەرىندە قار قالىڭدىعى 22 سم-گە جەتتى، ال تاۋ بوكتەرلەرىندە، اتاپ ايتقاندا كامەنسك ءۇستىرتى مەن شىمبۇلاقتا قاردىڭ قالىڭدىعى 40 سم جانە 42 سم بولدى. مۇنداي قولايسىز اۋا رايى جاعدايىندا قالاداعى كوممۋنالدىق قىزمەتتەر كوشەلەردى ءقاۋىپسىز ءارى جۇرۋگە قولايلى كۇيگە كەلتىرۋ ءۇشىن قار تازالاۋ جۇمىستارىنا بەلسەندى كىرىستى.
الماتىدا قاردىڭ سالدارىن جويۋ ءۇشىن تاۋلىك بويى 600-دەن استام ارنايى تەحنيكا مەن 1080 جۇمىسشى جۇمىلدىرىلعان. قار جاۋا باستاعان ساتتەن باستاپ قالا كوشەلەرىنەن 6 520 م³ قار شىعارىلدى.
«تازا قازاقستان» باعدارلاماسى اياسىندا جۋرناليستەرگە قالانىڭ كولىك كوپ جۇرەتىن كوشەلەرىنىڭ ءبىرى – ابىلاي حان داڭعىلىنداعى تاڭعى قار تازالاۋ جۇمىستارى كورسەتىلدى. بۇل جۇمىستارعا سىپىرۋشى ارنايى تەحنيكالار، كوپفۋنكسيونالدى جول ماشينالارى، Pony 4، كاماز كولىكتەرى جانە جۇمىسشىلار اتسالىستى. بۇل تەحنيكالار كوشەلەردى قار مەن مۇزدان جەدەل تازارتىپ، تۇرعىندار ءۇشىن قاۋىپسىزدىك پەن جايلىلىقتى قامتاماسىز ەتەدى.
كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى جانات جاقىپبەكتىڭ ايتۋىنشا، قاردى شىعارۋ ءۇشىن الدىمەن جول جيەكتەرىندە قار ۇيىندىلەرىن جيناۋ بويىنشا دايىندىق جۇمىستارى جۇرگىزىلەدى. بۇل جۇمىستار ءىرى گاباريتتى تەحنيكانىڭ (اۆتوگرەيدەرلەر، جۇك تيەگىشتەر) كومەگىمەن تۇنگى ۋاقىتتا جۇزەگە اسادى. تاڭەرتەڭگى ۋاقىتتا جول بويىندا قار ۇيىندىلەرىنىڭ بولۋى – جۇمىس پروسەسىنىڭ تەحنولوگيالىق قاجەتتىلىگى. قار ۇيىندىلەرى كەلەسى جۇمىس اۋىسىمىندا شىعارىلادى. كەيىن قاردى تازارتقاننان كەيىن جيەكتاستار ماڭىن مۇزدان تازارتۋ، مۇزدى ويۋ جانە قار ارالاس تۇزىلىمدەردى جويۋ جۇمىستارى قولعا الىنادى.
قالانىڭ نەگىزگى كوشەلەرىنەن قار شىعارۋ جۇمىستارى 17-18 جەلتوقسانعا قاراعان ءتۇنى اياقتالادى دەپ جوسپارلانعان، ءبىراق قار كۇرەۋ جۇمىستارى قىس مەزگىلى اياقتالعانعا دەيىن جالعاسادى.
قىستا قار تازالاۋ جۇمىستارى الماتىداعى جالپى اۋماعى 25،1 ملن م² بولاتىن 2 300-دەن استام كوشە مەن ۇزىندىعى 2 777 كم جولدى قامتيدى. بۇل جۇمىستاردى 10 مەردىگەرلىك ۇيىم اتقارادى، ال اۋماقتىڭ 70%-ىن «الماتى تازالىق» مكك كۇشىمەن تازالانادى. قالا كوممۋنالدىق قىزمەتتەرىنىڭ قولىندا 1 084 ارنايى تەحنيكا جانە 1 240 جۇمىسشى بار، بۇل ولارعا اۋا رايىنىڭ وزگەرىستەرىنە ساي تەز قيمىلداپ، قاردىڭ سالدارىن ءتيىمدى جويۋعا مۇمكىندىك بەرەدى.
قورىتىندىلاي كەلە، كوممۋنالدىق قىزمەتتەر قالا تۇرعىندارىنان قاردى ۋاقىتىلى شىعارۋ جۇمىستارىن ۇيىمداستىرۋ ءۇشىن تۇنگى ۋاقىتتا كولىك قۇرالدارىن جول جيەكتەرىنە قويماۋدى ءوتىندى.