الماتىدا «تازا قازاقستان» رەسپۋبليكالىق باعدارلاماسى اياسىندا ىسكە قوسىلعان پلاستيكالىق قاقپاقتاردى جيناۋ بويىنشا ەكولوگيالىق اكسيانىڭ العاشقى ماۋسىمى اياقتالدى، دەپ حابارلايدى aqshamnews.kz
اكسياعا مەكتەپ وقۋشىلارى مەن بالاباقشا تاربيەلەنۋشىلەرى قاتىسىپ، بىرلەسكەن كۇش-جىگەردىڭ ارقاسىندا 1،26 ميلليوننان استام قاقپاق جينالدى. ەكولوگيالىق ماسەلەلەرگە نازار اۋدارۋ جانە وسكەلەڭ ۇرپاقتا ەكولوگيالىق مادەنيەتتى قالىپتاستىرۋعا باعىتتالعان باستاما جاستار مەن ولاردىڭ اتا-انالارىنىڭ تاراپىنان ۇلكەن قولداۋ تاپتى. اكسياعا قالانىڭ 200-دەن استام مەكتەبى مەن بالاباقشاسىنىڭ وقۋشىلارى قاتىستى.
اكسيا قورىتىندىسى بويىنشا ەڭ كوپ ۇلەس قوسقان ءۇش اۋدان:
● جەتىسۋ اۋدانى – 570 كگ قاقپاق (جالپى كولەمنىڭ 22،7%-ى)؛
● المالى اۋدانى – 484 كگ (19،3%)؛
● اۋەزوۆ اۋدانى – 328 كگ (13،0%).
16 جەلتوقساندا اكسيانىڭ العاشقى ماۋسىمى قورىتىندىلانىپ، ال 21 جەلتوقسان كۇنى مولل اپورت East ساۋدا ورتالىعىندا جەڭىمپازدار مەن قاتىسۋشىلاردى سالتاناتتى ماراپاتتاۋ ءراسىمى وتەدى. ءىس-شارا باعدارلاماسىندا ەكو-جارمەڭكە، شەبەرلىك دارىستەرى جانە قالدىقتاردى قايتا وڭدەۋ مەن ەكولوگيالىق تاجىريبەلەرگە ارنالعان وقىتۋ سەسسيالارى جوسپارلانعان.
پلاستيكالىق قاقپاقتاردى جيناۋ اكسياسىمەن قاتار KSC PLAST كومپانياسى مەن ەكو-حابتىڭ قولداۋىمەن قايتا وڭدەلگەن پلاستيكتەن بىرەگەي جاڭا جىلدىق شىرشا جاسالدى. بۇل ەرەكشە تۋىندىنىڭ اۆتورى – بەلگىلى ءمۇسىنشى تالعات جۇماعۇل. شىرشا ەكولوگيالىق ماسەلەلەردى شەشۋگە ءۇمىتتىڭ سيمۆولى رەتىندە قاراستىرىلىپ، جاڭا جىل قارساڭىندا قالانىڭ ءسانىن كەلتىرمەك.
«ءبىز دوستارىمىزبەن بىرنەشە اپتا بويى قاقپاق جينادىق. بۇل ەكولوگيا ءۇشىن پايدالى عانا ەمەس، وتە قىزىقتى ءىس بولدى. ەندى جيناعان قاقپاقتارىمىز قالامىزدا ادەمى شىرشالاردىڭ جاسالۋىنا كومەكتەسەتىنىن بىلگەندە، وسى جوبانىڭ ءبىر بولىگى بولعانىما ماقتانامىن»، – دەيدى №147 مەكتەپ-گيمنازياسىنىڭ وقۋشىسى توميريس نامازبەكوۆا.
سونىمەن قاتار، «مەيىرىمدىلىك» ەرىكتى قوعامى»، «مەيىرىم» قورى، «ءاۋتيزمدى جەڭەمىز» جوباسى مەن «ينسايت» مەكتەبىنىڭ ەرەكشە بالالارى ەكو-حاب ەكو-جاتتىقتىرۋشىلارىنىڭ جەتەكشىلىگىمەن قايتا وڭدەلگەن ماتەريالداردان مەرەكەلىك جاڭا جىلدىق ويىنشىقتار جاسادى.
بۇل بۇيىمداردى بولات وتەمۇراتوۆ قورى، RAMS، ەۋرازيالىق بانك، المالى حولدينگى، ZanHub سەكىلدى ءىرى كومپانيالار ساتىپ الدى. اكسيانىڭ ماڭىزدى بولىگى قالانىڭ ءتۇرلى اۋدانىندا ۋاقىتشا قاقپاقتاردى قابىلداۋ پۋنكتىنە اينالعان كوميۋنيتي-ورتالىقتار بولدى.
«بۇل جوبا – ەكولوگيالىق تاربيەنى شىعارماشىلىق تاسىلمەن ۇيلەستىرۋدىڭ تاماشا ۇلگىسى. بالالاردى تابيعاتتى ايالاۋعا ۇيرەتۋ عانا ەمەس، شاعىن ارەكەتتىڭ ۇلكەن ناتيجەگە اكەلەتىنىن كورسەتۋ دە ماڭىزدى»، – دەدى №147 مەكتەپ-گيمنازياسى تاربيە جۇمىسى جونىندەگى ديرەكتوردىڭ ورىنباسارى رايسا ساحييەۆا.
ۇيىمداستىرۋشىلار 2025 جىلى پلاستيكالىق قاقپاقتاردى جيناۋ اكسياسى الماتىنىڭ ەكولوگيالىق مادەنيەتىن قالىپتاستىرۋ بويىنشا تۇراقتى ناۋقانعا اينالاتىنىن ايتتى. مۇنداي باستامالار قالانى بەزەندىرىپ قانا قويماي، قايتا وڭدەۋدىڭ ماڭىزدىلىعىن ەسكە سالىپ، قورشاعان ورتانى ساقتاۋعا جاۋاپكەرشىلىك قالىپتاستىرادى.
ەسكە سالا كەتەيىك، مەملەكەت باسشىسىنىڭ باستاماسىمەن قولعا الىنعان «تازا قازاقستان» رەسپۋبليكالىق باعدارلاماسى ەلدى مەكەندەردىڭ اۋماعىن كوركەيتۋگە جانە كوگالداندىرۋعا باعىتتالعان. باعدارلامانىڭ باستى ماقساتى – قورشاعان ورتاعا ۇقىپتى قاراۋ قۇندىلىقتارىن قالىپتاستىرۋ، حالىق اراسىندا جوعارى ازاماتتىق جاۋاپكەرشىلىك پەن ەكولوگيالىق مادەنيەتتى تاربيەلەۋ.