شىمبۇلاق جانە Oi-Qaragai تاۋ كۋرورتتارى SKI BUSINESS AWARDS بەدەلدى ماراپاتتارىنا يە بولدى
الماتى جانە الماتى وبلىسىنىڭ كۋرورتتارى حالىقارالىق ماراپاتتاۋ راسىمىندە ەڭ كوپ جۇلدەگە يە بولدى، دەپ حابارلايدى aqshamnews.kz
SKI BUSINESS AWARDS جىل سايىنعى ماراپاتتاۋ ءراسىمى 3-6 قازان ارالىعىندا مينەرالدى سۋلار مەكەنىندە حالىقارالىق تۋريستىك اۋماقتار فورۋمىنىڭ اياسىندا ءوتتى. مۇندا تۋريستىك يندۋستريانىڭ ماماندارى كاسىبي تاجىريبەلەرىمەن ءبولىسىپ، نارىق قاتىسۋشىلارىنىڭ ءوزارا ارەكەتتەسۋىنىڭ جاڭا فورماتتارىن جانە تمد ەلدەرىنىڭ شەتەلدىك سەرىكتەستەرىمەن تۋريستىك ينفراقۇرىلىم قۇرۋدى تالقىلادى.
ماراپاتتاۋ 2023-2024 جىلعى ماۋسىم قورىتىندىلارى بويىنشا بەرىلدى. شەشىم بىرنەشە كەزەڭنەن تۇردى – تاۋ يندۋسترياسىنداعى بەدەلدى ماماندار كوميسسياسىنىڭ الدىندا جوبانى قورعاۋ، سونداي-اق تاۋ شاڭعىسىن سۇيەتىندەر اراسىندا داۋىس بەرۋ ارقىلى شەشىم قابىلداندى.
داۋىس بەرۋ قورىتىندىسى بويىنشا «شىمبۇلاق» تاۋ كۋرورتى «تمد ەلدەرىنىڭ ۇزدىك تاۋ شاڭعىسى كۋرورتى» اتاعىنا يە بولدى. سونىمەن قاتار «تاۋ ايماعىنداعى ۇزدىك گلەمپينگ/كەمپينگ» نوميناسياسىندا جەڭىسكە جەتتى. «Oi-Qaragai» تاۋ كۋرورتى «ۇزدىك IT-شەشىم» جانە «ۇزدىك بالالار لاگەرى باعدارلاماسى» ماراپاتتارىن يەلەندى.
«SKI BUSINESS AWARDS ماراپاتتاۋ راسىمىندە ءبىزدىڭ كۋرورت تمد ەلدەرىنىڭ 150 كۋرورتىنىڭ اراسىنان تاعى دا ۇزدىكتەر قاتارىنان كورىندى! ءبىز ەكى نوميناسيادا بىردەن جەڭىسكە جەتتىك: «ۇزدىك گلەمپينگ/كەمپينگ»، سونداي-اق ەڭ بەدەلدى كاتەگوريادا – «تمد ەلدەرىنىڭ ۇزدىك كۋرورتى» اتاعىن الدىق. جەڭىمپازداردى تاڭداۋ بىرنەشە كەزەڭنەن تۇردى، وعان داۋىس بەرۋ جانە ساراپشىلار كوميسسياسىنىڭ الدىندا جوبانى قورعاۋ كىردى. بۇكىل كوماندامىزدى وسى تاماشا جەتىستىكپەن قۇتتىقتايمىن! ءۇشىنشى جىل قاتارىنان ەڭ بەدەلدى نوميناسيا قازاقستانعا ورالىپ وتىر! بۇل كەرەمەت ناتيجە جانە ءبىزدىڭ جۇمىسىمىزدىڭ جوعارى دەڭگەيىنىڭ دالەلى. وسى جەتىستىككە ۇلەس قوسقان ءارقايسىڭىزعا العىس ايتامىن! قازاقستاندىقتار، ءبىز بۇعان قول جەتكىزدىك!»، - دەپ پىكىر ءبىلدىردى «شىمبۇلاق» تاۋ كۋرورتى باس ديرەكتورى رينات ابدراحمانوۆ.
ماراپاتتاۋ راسىمىندە «Oi-Qaragai» تاۋ كۋرورتىنىڭ PR ءبولىمىنىڭ باسشىسى ماكسيم كوزلوۆ پىكىر ءبىلدىردى :
«ءبىزدىڭ كوماندا ءاردايىم قىزمەت كورسەتۋ دەڭگەيىن جەتىلدىرۋگە تىرىسادى. سوندىقتان كەلۋشىلەرگە قىزمەت الۋ قاراپايىم ءارى ىڭعايلى، ال ۇسىنىلاتىن قىزمەتتەردىڭ ساپاسى جوعارى بولۋى ءۇشىن بارىمىزدى سالۋدامىز. كۋرورتتىڭ IT سالاسىنداعى ۇزدىك دەپ تانىلۋى – ۇلكەن جەتىستىك، ويتكەنى ءقازىر كۋرورت كەڭەيىپ، جاڭا «اقتاس» ايماعىن اشۋدا. بۇل – شامامەن 55 شاقىرىم جاڭا تراسسالار، جاڭا اسپالى جولدار مەن جاڭا اۋماقتار. پروسەستەردى وڭتايلاندىرۋ – باسىم مىندەتتەردىڭ ءبىرى. «تاۋ كۋرورتىنداعى ۇزدىك بالالار لاگەرى باعدارلاماسى» ماراپاتى – بۇل جەكە جەتىستىك، ول وسى باعىتتى جاساۋشىلاردىڭ ەڭبەگى. ولار ۇسىنىلعان قىزمەتتەردىڭ ەڭ جوعارى دەڭگەيدە بولۋىن قامتاماسىز ەتۋدە».
انىقتاما:
شىمبۇلاق – الەمدىك ستاندارتتارعا ساي كەلەتىن قازاقستاننىڭ باستى كورىكتى جەرلەرىنىڭ ءبىرى. جىل سايىن 1،5 ميلليوننان استام كەلۋشىنى قابىلدايدى جانە ءىرى حالىقارالىق سپورتتىق جارىستاردى وتكىزۋ تاجىريبەسىمەن بولىسە الادى. سونىمەن قاتار، 2023 جىلدىڭ ناۋرىزىندا «شىمبۇلاق» تاۋ كۋرورتى الەمدەگى ەڭ بيىك تۇنگى تاۋ شاڭعى ەڭىسى رەتىندە گيننەستىڭ رەكوردىن ورناتتى، ونىڭ بيىكتىگى – 3200 مەتر.
Oi-Qaragai – تيان-شان تاۋلارىنىڭ باۋرايىندا ورنالاسقان قازاقستاننىڭ ەڭ تانىمال تاۋ كۋرورتتارىنىڭ ءبىرى. كۋرورت شاڭعىشىلار مەن سنوۋبوردشىلارعا ارنالعان ءتۇرلى تراسسالاردى، زاماناۋي اسپالى جولداردى جانە دامىعان ينفراقۇرىلىمدى ۇسىنادى. Oi-Qaragai وتباسىلىق دەمالىسقا ەرەكشە نازار اۋدارا وتىرىپ، بالالار مەن جاسوسپىرىمدەرگە ارنالعان باعدارلامالاردى ۇسىنادى. كۋرورت جاڭا تەحنولوگيالار مەن IT-شەشىمدەردى بەلسەندى ەنگىزۋدە، بۇل ونى وڭىردەگى تاۋ شاڭعى ءتۋريزمىنىڭ كوشباسشىلارىنىڭ بىرىنە اينالدىرادى.