ءتارتىپ ساقشىلارى حالىقارالىق FIS ەرەجەسىنىڭ ساقتالۋىن قاداعالايدى
ارنايى دايىندىقتان وتكەن پوليسەيلەر «شىمبۇلاق» تاۋ شاڭعىسى بازاسىندا قوعامدىق ءتارتىپتى قاداعالايدى. ولار اسىنىپ جۇرەتىن ۇيرەنشىكتى اسكەري قارۋلارىنىڭ ورنىنا، شاڭعى الادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«شىمبۇلاق» تاۋ شاڭعىسى كۋرورتىنىڭ ديرەكتورى رينات ءابدىراحمانوۆتىڭ ايتۋىنشا، اتالعان جوبا 2019 جىلدان بەرى جۇزەگە اسىرىلىپ كەلەدى.
«بىزدە كورىنبەيتىن مايدان جاۋىنگەرلەرى بار. دەسەك تە، بيىل قالادان شيپاجاي اۋماعىن شاڭعىمەن ءجۇرىپ باقىلايتىن پوليسيا قىزمەتكەرلەرىن سۇرادىق. ءوتىنىشىمىز قاناعاتتاندىرىلدى. كەلەسى دۇيسەنبىدەن باستاپ 10 پوليسيا قىزمەتكەرىن شاڭعى تەبۋگە ۇيرەتۋ ءۇشىن وقۋ پروسەسىن باستايمىز»، - دەيدى سپيكەر.
سونداي-اق ول كۋرورتتا شاڭعى پاترۋلدەرى دە جۇمىس ىستەيتىنىن ايتتى. بيىل ولاردىڭ سانى 16 ادامعا ارتتى.
«ولاردىڭ تورتەۋى شاڭعى تەبۋدىڭ قاۋىپسىزدىگىن باقىلاپ، پوليسيامەن بىرگە ءوزارا جۇمىس ىستەيدى»، - دەپ قوستى ول.
سونىمەن قاتار، سپيكەر دەمالىس ورنىنداعى قاۋىپسىزدىك ماسەلەسى تاۋ شاڭعىسى كۋرورتتارىنىڭ قىزمەتىن رەتتەيتىن زاڭنىڭ جوقتىعىنان تۋىنداپ وتىرعانىن تىلگە تيەك ەتتى.
ونىڭ ايتۋىنشا، شاڭعى پاترۋلدەرى نەمەسە كۋرورت قىزمەتكەرلەرى ەرەجەنى بۇزۋ تۋرالى ەسكەرتكەندەرى ءۇشىن كليەنتتەردەن ءجيى زارداپ شەگەدى.
رينات ءابدىراحمانوۆ ءتارتىپ ساقشىلارى حالىقارالىق FIS ەرەجەسىنىڭ ساقتالۋىن قاداعالايتىنىن ءتۇسىندىردى.
«دەمالىس كۇندەرى بەس پوليسيا قىزمەتكەرى مەن ەكى كۋرورت ماماندارى، ال جۇمىس كۇندەرى ەكى پوليسيا مەن ەكى كۋرورت قىزمەتكەرى كەزەكشىلىكتە بولادى. ءتارتىپ ساقشىلارى Police دەگەن جازۋى بار ارنايى كەۋدەشە كيەدى»،- دەدى ول.
جالپى، «شىمبۇلاق» ديرەكتورىنىڭ ايتۋىنشا، شيپاجايعا كەلۋشىلەر سانى جىل سايىن ارتىپ كەلەدى جانە وتكەن ماۋسىمدا ول ءابسوليۋتتى رەكوردقا جەتتى – 1 ملن استام ادام.