ستانسيا قولدانىسقا ەنگىزىلگەننەن كەيىن وعان الدىمەن قىتايلىق استروناۆتار، سودان كەيىن باسقا سەرىكتەس ەلدەردىڭ عارىشكەرلەرى بارا الادى
حالىقارالىق ايدى زەرتتەۋ ستانساسىنىڭ نەگىزگى كونسترۋكسياسى شامامەن 2028 جىلعا دەيىن سالىنادى. بۇل تۋرالى قىتايدىڭ ايدى يگەرۋ باعدارلاماسىنىڭ باس كونسترۋكتورى ۋ ۆەيجەن مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ونىڭ ايتۋىنشا، حالىقارالىق ايدى زەرتتەۋ ستانساسىنىڭ (ILRS) نەگىزگى كونسترۋكسياسىنىڭ قۇرىلىسى 2028 جىلعا دەيىن اياقتالادى.
ستانسا ايعا قونۋ اپپاراتتارىنان، اي بەتىندە ءجۇرۋ جانە ادام تىرشىلىگىن قامتاماسىز ەتۋ جۇيەسىنەن تۇرادى.
«ءبىز اتوم ەنەرگياسى ارقىلى ۇزاق ۋاقىت بويى ەنەرگيامەن قامتاماسىز ەتۋگە مۇمكىندىك بەرەتىن جاڭا ەنەرگەتيكالىق جۇيەنى ازىرلەپ جاتىرمىز. ال كوممۋنيكاسيالىق ينفراقۇرىلىم اي مەن جەر اراسىنداعى نەمەسە مارس سياقتى باسقا پلانەتالارمەن بايلانىستى قامتاماسىز ەتەدى»، - دەپ كەلتىرەدى قىتايلىق عالىمنىڭ ءسوزىن CCTV.
ILRS نەگىزگى كونفيگۋراسياسى «چانە-6،7 جانە 8» ميسسيالارى بارىسىندا ىسكە قوسىلادى.
ستانسيا قولدانىسقا ەنگىزىلگەننەن كەيىن وعان الدىمەن قىتايلىق استروناۆتار، سودان كەيىن باسقا سەرىكتەس ەلدەردىڭ عارىشكەرلەرى بارا الادى.
الايدا، كوبىنە ستانسا بوس تۇرادى.