مەملەكەت باسشىسى بەيجىڭدە ءابۋ ناسىر ال-فارابيگە قويىلعان ءبيۋستتى سالتاناتتى تۇردە اشتى
پرەزيدەنت قاسىم-جومارت توقايەۆ ءوزى ءبىلىم العان بەيجىڭ ءتىل جانە مادەنيەت ۋنيۆەرسيتەتىنىڭ اۋماعىندا ورتا عاسىرلىق فيلوسوف، عالىم ءابۋ ناسىر ال-فارابيگە ارنالعان ءبيۋستتى سالتاناتتى تۇردە اشۋ راسىمىنە قاتىستى، دەپ حابارلايدى اlmaty-akshamy.kz.
اشىلۋ راسىمىنە قحر ءبىلىم ءمينيسترىنىڭ ورىنباسارى ۆان گۋانيان، ۋنيۆەرسيتەتتىڭ پارتيا كوميتەتىنىڭ حاتشىسى ني حايدۋن، رەكتورى دۋان پەن جانە مەملەكەت باسشىسىنا ساباق بەرگەن ۋنيۆەرسيتەت پروفەسسورى ليۋ شيسين، سونداي-اق قحر مەملەكەتتىك ونەر مۇراجايىنىڭ ديرەكتورى، ءمۇسىن اۆتورى ۋ ۆەيشان قاتىستى. مەملەكەت باسشىسى، ەڭ الدىمەن، ءال-فارابيدىڭ الەمدىك وركەنيەتكە قوسقان زور ۇلەسىنە ايرىقشا توقتالدى.
– بارشاڭىزعا ءمالىم، ءال-فارابي – شىعىستىڭ ۇلى ويشىلى، ونىڭ الەمدىك وركەنيەتتىڭ دامۋىنا قوسقان ۇلەسى وراسان زور. ءال-فارابي قازاقستان اۋماعىندا ءتۋىپ-وستى، ءبىلىم ىزدەپ كوپتەگەن ەلگە باردى. ماتەماتيكا، جاراتىلىستانۋ، استرونوميا، فيلولوگيا جانە باسقا دا ءبىرقاتار ءىلىمدى دامىتۋعا زور ەڭبەك ءسىڭىردى. ادامزاتتىڭ دامۋىنا ولشەۋسىز ۇلەس قوستى. ول فيلوسوفيالىق تۋىندىلارىندا ادىلدىك يدەياسىنا ەرەكشە نازار اۋداردى. قايىرىمدى قوعام جانە ۇيلەسىمدى مەملەكەت قۇرۋ ماسەلەسىنە باسا ءمان بەردى. ادامگەرشىلىك پەن رۋحاني قۇندىلىقتاردى دارىپتەدى. عالىم مۋزىكا جانە كالليگرافيا ونەرىن زەردەلەدى، – دەدى پرەزيدەنت. قاسىم-جومارت توقايەۆ ەنسيكلوپەديالىق دەڭگەيدەگى، ياعني جان-جاقتى ءبىلىمى بار ءال-فارابيدى زامانداستارى اريستوتەلدەن كەيىنگى «ەكىنشى ۇستاز» دەپ اتاعانىنا نازار اۋداردى.
