شىعىس قازاقستان وبلىسىندا تاعى دا الاپات ءورت تۇتاندى.
زايسان، التاي، ۇلان جانە گلۋبوكوە اۋدانىندا قۇرعاق ءشوپ جانىپ جاتىر. ال وسكەمەن قالاسىندا ساياجاي مەن جەكە ۇيلەر جانە كەيبىر كوممەرسيالىق نىساندار جانىپ كەتتى. وڭىردەگى ءورت سوندىرۋشىلەرگە كەشەدەن بەرى 60-قا جۋىق شاقىرۋ تۇسكەن، دەپ حابارلايدى Almaty-akshamy.kz. Qazaqstan.tv سايتىنا سىلتەمە جاساپ.
الاپات ءورت ءالى تولىق سونگەن جوق. قۋراپ تۇرعان ءشوپ تۇتانعان سوڭ، سوندىرۋگە دەس بەرمەي جاتىر. كەشەدەن بەرى توقتاۋسىز سوققان قارا داۋىل جاعدايدى مۇلدە قيىنداتىپ جىبەردى. ءقازىر ۇلان، زايسان، كۇرشىم، التاي اۋداندارىنداعى ءورت ءالى تولىق سونگەن جوق. ءدال قازىرگە دەيىن 2000 گەكتارداي جەر جانىپ كەتكەن. ءورتتىڭ ناقتى اۋماعى ءالى تولىق انىقتالعان جوق. جالپى، ءار اۋدانداعى ءورتتىڭ كولەمى ءار ءتۇرلى. ەڭ اۋقىمدىسى - ۇلان اۋدانىندا. ءبىر عانا بورساق اۋىلى اۋماعىندا 600 گەكتار جەر جانىپ كەتتى. ءتىلسىز جاۋمەن كۇرەسكە جالپى وبلىس بويىنشا 120 تەحنيكا مەن 800-گە جۋىق ادام جۇمىلدىرىلدى. تەك ءورت سوندىرۋشىلەر ەمەس، ورمان شارۋاشىلىعى ماماندارى جانە قورعانىس مينيسترلىگىنىڭ ساربازدارى دا كومەكتەستى. ءبىر مي-8 تىكۇشاعى دا تارتىلدى. توتەنشە جاعداي قىزمەتى تاراتقان اقپارات بويىنشا، ورتتەن ەشكىم زارداپ شەكپەگەن. اۋقىمدى ءورتتىڭ كوبى يەن دالادا. ءيا، وسكەمەندە تاڭعا جۋىق ازداپ جاۋىن جاۋدى. بۇل جالىندى تولىق سوندىرمەسە دە، ءورتتىڭ ءورشۋىن باسۋعا سەپتىگىن تيگىزدى. وتكەن تۇندە وسكەمەنىڭ شەتىندەگى "سوگرا" شاعىناۋدانىندا قۋ ءشوپ ورتەندى. جەل ۇرلەگەن جالىن لەزدە تارالىپ، سول ماڭداعى سپورتتىق قۇرال ساقتايتىن قويما مەن جەكە ءۇيدى دە شارپىعان. ءقازىر سول نىسانعا قانشا شىعىن كەلگەنى ەسەپتەلىپ جاتىر.