ساراپتاما بويىنشا ولىمگە انافيلاكتيكالىق شوك سەبەپ بولعان.
استانا تۇرعىنى ءداستۇرلى ەمەس شىعىس مەديسيناسىمەن اينالىسقانى ءۇشىن سوتتالدى، ونىڭ كىناسىنەن ناۋقاس كوز جۇمعان، دەپ حابارلايدى Almaty-akshamy.kz قالا پروكۋراتۋراسىنا سىلتەمە جاساپ.
انىقتالعانداي، كلينيكاعا جۇگىنگەن پاسيەنت ۇيقىشىلدىققا شاعىمدانعان. ەمدەۋ بارىسىندا وعان قازاقستاندا ليسەنزيالانباعان پرەپارات ەگىلەدى. سودان كەيىن ناۋقاستىڭ جاعدايى كۇرت ناشارلايدى. مارقۇم ەسىن جيماستان ءبىراز ۋاقىتتان كەيىن قايتىس بولعان.
"مەملەكەتتىك ايىپتاۋشى ابايسىزدا ادام ولىمىنە اكەپ سوققان، ءداستۇرلى ەمەس شىعىس مەديسيناسىمەن اينالىسقان سوتتالۋشىنىڭ كىناسىن دالەلدەدى. سوتتالعان ادام ءتيىستى كۋالىكتەرى مەن ليسەنزياسى جوق بولسا دا مەديسينالىق قىزمەتپەن اينالىسقان. ساراپتاما قورىتىندىسى ءولىم سەبەبى انافيلاكتيكالىق شوك بولعانىن كورسەتتى"، - دەلىنگەن حابارلامادا.
سوت ۇكىمىمەن كىنالى ادام مەديسينالىق قىزمەتپەن اينالىسۋ قۇقىعىنان ايىرىلىپ، سوتتالدى.
استانا قالاسىنىڭ پروكۋراتۋراسى ازاماتتاردى وسى قىزمەت تۇرىمەن اينالىسۋعا ءتيىستى رۇقساتى جوق تۇلعالارعا مەديسينالىق كومەككە جۇگىنبەۋگە شاقىرادى.