ەركىن كۇرەستەن قازاقستان كومانداسىنىڭ باس باپكەرى ماديار قۇرامىسوۆ بالۋانداردىڭ بيىلعى ماۋسىمداعى كورسەتكىشىن قورىتىندىلاپ، قۇراماداعى وزگەرىستەر تۋرالى ايتتى، دەپ حابارلايدى اlmaty-akshamy.kz.
بيىل وتاندىق ەركىن كۇرەس شەبەرلەرى ازيا چەمپيوناتى، الەم بىرىنشىلىگى مەن ازيا ويىندارى سىندى ءىرى باسەكەلەردە ب ا ق سىناعان بولاتىن.
«الەم چەمپيوناتىنان ءبىر التىن، ءبىر قولامەن ورالدىق. ريزابەك ايتمۇحاننىڭ اراعا جىلدار سالىپ، تاريحتى جاڭارتقانىن بىلەسىزدەر. ازامات داۋلەتبەكوۆ قولا مەدالمەن بىرگە، وليمپيادا ويىندارىنىڭ ليسەنزياسىن جەڭىپ الدى. بىزگە ءالى دە جولداما كەرەك. جىلدىڭ سوڭعى جاتتىعۋ جيىنىن بالۋاندار تاۋدا وتكىزەدى. 18 كۇن بويى تاۋدا جاتتىعامىز. جاڭا جىلدا جاڭا جارىستار كۇتىپ تۇر»، - دەدى باس باپكەر.
ماديار قۇرامىسوۆتىڭ ايتۋىنشا، الداعى ماۋسىم وتە جاۋاپتى بولماق.
«ءساۋىر ايىندا قىرعىزستان استاناسى بىشكەكتە ازيا ايماقتىق ليسەنزيالىق ءتۋرنيرى وتەدى. سول باسەكەدە تاعى دا ەكى جولداما جەڭىپ الۋدى ماقسات ەتىپ وتىرمىز. ءبىزدىڭ بالۋاندار ءۇشىن 57 جانە 65 كەلىدە ليسەنزيا الۋ قيىن بولماق. سەبەبى، بۇل سالماقتاعى باسەكەلەستىك الەم بويىنشا وتە جوعارى. اتالعان تۋرنيرگە ۇلكەن دايىندىقپەن بارۋدى جوسپارلاپ وتىرمىز. ودان بولەك، رەيتينگىلىك تۋرنيرلەر مەن قازاقستان چەمپيوناتى دا بار»، - دەدى قۇرامىسوۆ.
قاڭتار ايىندا استانادا وتەتىن قازاقستان بىرىنشىلىگىندە ليسەنزيالىق تۋرنيرگە قاتىساتىن بالۋاندار بەلگىلى بولماق. سول سىندا الەم چەمپيونى ريزابەك ايتمۇحاننىڭ دا جاڭا سالماقتاعى اۋسەلەسى انىقتالادى.
«ريزابەك وليمپيادالىق سالماق سانالاتىن 97 كەلىگە اۋىستى. قازىرگى تاڭدا ازامات داۋلەتبەكوۆپەن بىرگە وسەتيادا جاتتىعىپ جاتىر. بۇل سالماقتا الىشەر ەرعالي سىندى بالۋانىمىز بارىن دا بىلەسىزدەر. كىم مىقتى ەكەنى ۇلتتىق چەمپيوناتتا شەشىلەدى. سول باسەكەدە كىم جەڭسە، ليسەنزياعا سول تالاسادى»، - دەپ قورىتىندىلادى ءسوزىن باس باپكەر.