قازاقستاندىق-يندونەزيالىق بيزنەس-فورۋم
يندونەزيانىڭ سۋرابايا قالاسىندا قازاقستاننىڭ قۇرمەتتى كونسۋلدىعى سالتاناتتى جاعدايدا اشىلدى، سودان كەيىن قازاقستاندىق-يندونەزيالىق بيزنەس-فورۋم ءوتتى، دەپ حابارلايدى Almaty-akshamy.kz سىرتقى ىستەر مينيسترلىگىنىڭ رەسمي سايتىنا سىلتەمە جاساپ.
قازاقستاننىڭ قۇرمەتتى كونسۋلى بولىپ سۋرابايا قالاسىنىڭ ساۋدا-ونەركاسىپ پالاتاسى ءتوراعاسىنىڭ ورىنباسارى، اقپاراتتىق تەحنولوگيالار، تاماق ونەركاسىبى، اۋىل شارۋاشىلىعى سالالارىنداعى ءبىرقاتار كومپانيالاردىڭ باسشىسى ابدۋل عوفۋر تاعايىندالدى.
قازاقستان ەلشىسى دانيار سارەكەنوۆ شىعىس ياۆادا كونسۋلدىق اشۋعا تۇرتكى بولعان العىشارتتار قاتارىندا يندونەزيانىڭ جالپى ىشكى ءونىمنىڭ 15%-ىن قۇرايتىن ولكەنىڭ جوعارى ەكونوميكالىق بەلسەندىلىگىن، شىعىس ياۆا كاسىپكەرلەرىنىڭ قازاقستاندىق ارىپتەستەرمەن ءوزارا ءىس-قيمىل جاساۋعا قىزىعۋشىلىقتارىن، سونداي-اق ينۆەستيسيالىق، مادەني-گۋمانيتارلىق سالالاردا ىنتىماقتاسۋ پەرسپەكتيۆالارىن اتاپ ءوتتى. قۇرمەتتى كونسۋلدىق قازاقستاندىق جانە شىعىس ياۆالىق ىسكەرلىك توپتاردى بايلانىستىراتىن بۋىنعا اينالادى دەپ كۇتىلۋدە.
شىعىس ياۆا ولكەسىنىڭ ساۋدا-ونەركاسىپ پالاتاسىنىڭ ءتوراعاسى اديك پۋترانتو يندونەزيانىڭ ساۋدا-ونەركاسىپ پالاتاسى باسشىلارىنىڭ ءبىرىن قازاقستاننىڭ قۇرمەتتى كونسۋلى ەتىپ تاعايىنداۋ قازاقستاندىق كاسىپكەرلەرمەن پراكتيكالىق ءوزارا ءىس-قيمىلدى ىلگەرىلەتۋدە ۇلكەن ماڭىزعا يە ەكەنىن اتاپ ءوتتى. ول قۇرمەتتى كونسۋلدىقتىڭ اشىلۋى ساۋدا اينالىمىن ارتتىرۋعا، ينۆەستيسيالار مەن تۋريزم سالاسىنداعى ىنتىماقتاستىقتى نىعايتۋعا قوسىمشا سەرپىن بەرەتىنىنە سەنىم ءبىلدىردى.
سۋرابايا قالاسىنىڭ ساۋدا-ونەركاسىپ پالاتاسىنىڭ ءتوراعاسى الي اففاندي مەن الماتى قالاسىنىڭ كاسىپكەرلەر پالاتاسى ءتوراعاسىنىڭ ورىنباسارى اقەركىن ەرالييەۆا قاتىسقان بيزنەس-فورۋم شەڭبەرىندە ەكى قالادا بيزنەس جۇرگىزۋدىڭ پەرسپەكتيۆتى باعىتتارى تۋرالى تانىستىرىلىمدار جاسالدى.
40 ميلليوننان استام حالقى بار شىعىس ياۆا ولكەسىندە يندونەزيانىڭ نەگىزگى ونەركاسىپتىك كلاستەرى، سونىڭ ىشىندە توقىما، اياقكيىم، جيھاز، حيميا، مەتاللۋرگيا، فارماسيەۆتيكا وندىرىستەرى شوعىرلانعان. سۋرابايا – ىرىلىگى جاعىنان دجاكارتادان كەيىنگى ەكىنشى قالا، ەكونوميكالىق ورتالىق جانە ەلدىڭ پورتى.