قاڭتار وقيعاسى كەزىندە الماتى اۋەجايىنا 313 ميلليون تەڭگە شىعىن كەلگەن
الماتىدا قاڭتار وقيعاسى كەزىندە اۋەجايعا شابۋىل ۇيىمداستىردى دەپ كۇدىككە ىلىككەندەرگە قاتىستى سوت جالعاسىپ جاتىر. بۇگىن جابىرلەنۋشى تاراپ رەتىندە اۋەجاي وكىلى كەلگەن شىعىنىن جاريالادى، دەپ حابارلايدى Almaty-akshamy.kz كتك تەلەارناسىنا سىلتەمە جاساپ.
"313 ملن 250 مىڭ تەڭگە كولەمىندە ماتەريالدىق شىعىن كەلدى. كومپيۋتەرلەر ءبۇلىندى. ارنايى تەكسەرەتىن قۇرىلعىلار ىستەن شىقتى. ول كۇندەرى ۇشۋ توقتادى. ءبىز ايتىپ وتىرعان شىعىن - جوعالتقان پايدامىز ەمەس. ول - بۇزىلعان جابدىقتار. اۋەجاي ىشىندەگى قۇرال-جابدىقتاردىڭ تالايى جارامسىز بوپ قالدى. سونداي-اق، كۇدىكتىلەر اۋماقتاعى بىرنەشە كولىككە مىنگەن. قىزمەتكەرلەردىڭ راسياسى ۇرلانعان"، - دەدى الماتى حالىقارالىق اۋەجايىنىڭ وكىلى البەرت جازىبايەۆ.
بۇل ىسكە قاتىستى 5 ازاماتقا: ايگەرىم تىلەۋجانوۆاعا، قالاس نۇرپەيىسوۆكە، نۇرلان دالىبايەۆقا، ەرمۇحامەت شيلىبايەۆقا، جانايدار كارمەنوۆكە ايىپ تاعىلعان. بەسەۋى دە اۋەجايدى باسىپ الىپ، جۇمىسىن توقتاتۋعا ارەكەتتەندى دەگەن كۇدىككە ىلىكتى.
تەرگەۋ مالىمەتىنشە، ولار ستراتەگيالىق نىسانعا ارنايى بارىپ، جۇرتتى جانىنا جيناعان. ءتىپتى ۇجىمدىق قاۋىپسىزدىك تۋرالى شارت ۇيىمىنىڭ جاساعى مىنگەن ۇشاقتى قوندىرماس ءۇشىن ەلەكتر قۋاتىن وشىرۋگە تالپىنعانى تۋرالى پروكۋروردىڭ ايىپتاۋ اكتىندە جازىلعان.