اقورداداعى قابىلداۋ: «قازاقستان - شۆەيساريا» پارلامەنتارالىق ىنتىماقتاستىق توبىنىڭ جۇمىسىن جانداندىرۋ تۋرالى كەلىسىمگە قول جەتكىزىلدى
قاسىم-جومارت توقايەۆ قازاقستانعا رەسمي ساپارمەن كەلگەن شۆەيساريا كونفەدەراسياسى فەدەرالدى جينالىسىنىڭ ۇلتتىق كەڭەسىنىڭ (تومەنگى پالاتاسىنىڭ) ءتوراعاسى اندرەاس ەبيدى قابىلدادى، دەپ حابارلايدى almaty-akshamy.kz.
مەملەكەت باسشىسى شۆەيساريانى قازاقستاننىڭ ەۋروپاداعى ماڭىزدى سەرىكتەستەرىنىڭ ءبىرى ەكەنىن ايتا وتىرىپ، ولاردىڭ ونەركاسىپ، «جاسىل» ەكونوميكا، اۋىل شارۋاشىلىعى جانە قارجى سالاسىنداعى جوعارى يننوۆاسيالىق الەۋەتىن اتاپ ءوتتى.
قازاقستان پرەزيدەنتى ءبىزدىڭ ەلدىڭ شيكىزاتتىق ەمەس سەكتورىنا شۆەيساريا كاپيتالى مەن تەحنولوگيالارىن تارتا وتىرىپ، جاڭا ءىرى جوبالاردى ىسكە اسىرۋعا بەيىلدى ەكەنىن ءبىلدىرىلدى. مەملەكەت باسشىسىنىڭ ايتۋىنشا، بۇل قازاقستان ەكونوميكاسىنداعى شۆەيساريالىق بيزنەستىڭ ونسىز دا بەرىك پوزيسياسىن ودان ءارى نىعايتۋعا ىقپال ەتەدى.
شۆەيساريا – 2005 جىلدان بەرى ەلىمىزدىڭ ەكونوميكاسىنا 27 ميلليارد دوللاردان استام ينۆەستيسيا سالعان ەڭ ءىرى ءۇش ينۆەستورىنىڭ ءبىرى. ءبىزدىڭ ەلدە Glencore Xstrata، ABB، Philipp Morris، Rieter، Schindler، Bühler، Leica، Nestlé، Roche، Novartis، Syngenta، Ammann Group جانە باسقا دا ءىرى شۆەيساريالىق كومپانيالار تابىستى جۇمىس ىستەيدى.
سونىمەن قاتار شۆەيساريامەن اراداعى تاۋار اينالىمى بىلتىر 1،7 ميلليارد دوللارعا جەتىپ، جالپى ساۋدا سەرىكتەرىنىڭ اراسىندا 11ء-شى ورىنعا ىلىنگەن. مەملەكەت باسشىسى قازاقستان مەن شۆەيساريا اراسىنداعى قارىم-قاتىناستاردىڭ تابىستى دامۋىنا ەكى ەلدىڭ تىعىز ساياسي بايلانىستارى ىقپال ەتەدى دەگەن پىكىرىن ءبىلدىردى. وسىعان بايلانىستى قاسىم-جومارت توقايەۆ جاقىندا شۆەيساريا پرەزيدەنتى گاي پارمەلاندپەن مازمۇندى كەلىسسوزدەر وتكىزگەنىن اتاپ ءوتتى.
جەمىستى بايلانىستاردى جالعاستىرۋ ءۇشىن مەملەكەت باسشىسى كەلەسى كەزدەسۋدى بيىل قاراشا ايىنىڭ سوڭىندا وتكىزۋگە دايىن ەكەنىن ءبىلدىردى.
ءوز كەزەگىندە اندرەاس ەبي ەكىجاقتى ىنتىماقتاستىقتىڭ قازىرگى دامۋ دەڭگەيىن وڭ باعالاپ، ونى پارلامەنتارالىق بايلانىستار ارقىلى نىعايتۋعا سەپتەسۋگە دايىن ەكەنىن ءبىلدىردى. وسىعان بايلانىستى «قازاقستان - شۆەيساريا» پارلامەنتارالىق ىنتىماقتاستىق توبىنىڭ جۇمىسىن جانداندىرۋ تۋرالى كەلىسىمگە قول جەتكىزىلدى.
اڭگىمەلەسۋشىلەر اۋعانستانداعى قازىرگى جاعدايعا ەرەكشە نازار اۋداردى. تاراپتار بۇل ماسەلە بويىنشا جان-جاقتى پىكىر الماسىپ، وسى ەلدەگى اسكەري-ساياسي جانە گۋمانيتارلىق جاعدايدىڭ شيەلەنىسۋىنە الاڭداۋشىلىق ءبىلدىردى.
قاسىم-جومارت توقايەۆ 26 تامىزدا كابۋل حالىقارالىق اۋەجايىندا لاڭكەستىك جاساعانداردى ايىپتاپ، تەرروريستىك قاۋىپكە قارسى تۇرۋ، اۋعانستانداعى جاعدايدى تۇراقتاندىرۋ، الەمدەگى جانە ورتالىق ازياداعى بەيبىتشىلىك پەن قاۋىپسىزدىكتى نىعايتۋ ءۇشىن عالامدىق قوعامداستىقتىڭ كۇش-جىگەرىن جۇمىلدىرۋ قاجەت دەگەن پىكىر ءبىلدىردى.